3
Meññ-tzu idoo xcargü
1 Nirieꞌ ni uli we leeu: Bâḻ dxuhch riuꞌladzy tzu idoo xcargü la, to ni mos‑e riuꞌladzy me.
2 Per meññ-tzu idoo xcargü la, rquihñu gac me to meññ ni nehx nu bia gynii ndruhty contr lee; di gap me zrieñ ngünaa, mazyg tohzy tziahl me, no güieꞌ me leegahcme, no cu ihqy me no gyre ni rtzoo me, no gap xpeeiy me, no gdee xiryuꞌ me gydzihñ meññ-mbiuhz, no gann me zaꞌgndzi lehdy gluu me;
3 no di gac me ngüee, ni di teḻyno me meññ, ni di gyzaꞌladzy me ctzoo me gan medy no to mod-nahcsy, mazyg ctzoo me ni rxilyno meññ, no gyo me mód tzu meññ dzie tziaawy, no di gyzîbyladzy me medy.
4 Racladzyu ctzoo me mdad xmiꞌñ me zaꞌgndzi, no gluu me gyre xiiñ me gzobdiidz yâme no gap xpeeiy yâme;
5 porni bâḻ leeme dgann ctzoo mdad xmiꞌñ la, ¿bia mód‑e naꞌ ñahp me xmeññ Dioz?
6 No di gac me meññ ni leer güyuꞌ lo xtiidz Crist, porni duhn nlesyguia leegahcme no ñahc guîlguxtisy chehsh me beeiy guhcu chehsh bêndzab.
7 Zegahc rquihñu gap xpeeiy me no meññ ni nehx rlíladzy Crist, lehdy di gynii ndruhty contr leeme, no lehdy di guiahb me ladzyña bêndzab.
Meññ-gac diácono
8 No zegahc, meññ-gac diácono, racladzyu gap xpeeiy yâme, no di gynii yâme to cos no luxu ctzee ni ba günii yâme, no vin di ctzoou mdad leeyâme, no di gyzaꞌladzy yâme ctzoo yâme gan medy no to mod-nahcsy.
9 Racladzyu sunáḻ yâme ni nac ni uli ni bluu Dioz nó mod-rlídadzy nó, no di yqueꞌladzy yâmeu.
10 Racladzyu nier gyduhn bâḻ neññ beeiyu leeyâme, were beeiy gac yâme diácono, bâḻ nehx nu bia gynii ndruhty contr leeyâme.
11 No zegahc ngünaa yahc ni rtzoo dziiñ lahd meññ-idoo, racladzyu gap xpeeiy yâme, di gynii yâme ni nehx uli contr zrieñ, no güieꞌ yâme leegahc yâme no ctzoo yâmeu zaꞌgndzi.
12 Meññ ni nac diácono di gap me zrieñ ngünaa, mazyg tohzy tziahl me, no ctzoo me mdad xiiñ me zaꞌgndzi no zegahc zrieñ xmiꞌñ me,
13 porni meññ-nac diácono bâḻ rtzoo yâme dziñ-rieꞌ zaꞌgndzi, were tzuguia yâme, no nehx qytuꞌ yâme gynii yâme mod-rlíladzy yâme Crist Jesúz.
Xroꞌ we guîlrzacbeeiy ni güyungaꞌdzy
14 Riuꞌdadzyaꞌ tzan ngueeḻy gahc dzictixloꞌn lii; per gaza gan guetzy-rieꞌ cshaalaꞌu loꞌy,
15 lehdy bâḻ gyleeraꞌ la, ganniꞌ xnahc ctzoo mu lahd xmeññ yahc Dioz; leeyâme we zidguiahc beeiy xiydoo Dioz-mbahñ, no nnaazy yâme ni uli no rla yâme leeu.
16 Nehx nu ni nqueꞌladzy meññ de ni xroꞌ we guîlrzacbeeiy ni güyungaꞌdzy ni bluu Dioz nó:
Crist biahd me, guhl me lo guiedzylie,
bluu Spirt-Sant nehx nzahby me guîlquie,
no bwieꞌ ángel yahc leeme.
Xmeññ me bigyuno xtiidz me meññ-gyre nacióṉ,
no byzaꞌzy lo guiedzylie bylíladzy xtahl meññ leeme,
no zia me gybaa gyzac lo guîlbyniꞌ.