12
Wkyiits xpén Jesus xebzun zhobxtil dxe ne rne men-Israel
(Mr. 2:23-28; Lc. 6:1-5)
1 Cheguin ke wdee Jesus ledne nuu zhobxtil yra Ne xpén Ne dxe ne rne men-Israel. Kom rlaanen xpén Ne, wzelo men wkyiits men xebzun zhobxtil, wboo men zhobxtil wu men.
2 Chene wii yra men ne nak farisew neguin, re men lo Ne:
―Gukwii, le yra xpén de kalaa ne ndux ylaa be dxe ne rne be.
3 Wke Ne re Ne:
―¿Pe gardet gool de lo xgyiich Dëdyuzh ledne re ne wlaa David chene wlaanen zhaa yra zhaa xkompanyer zhaa?
4 Wdee zhaa lenxeydoo Dëdyuzh, wu zhaa gyëtxtil ne nakleey yra zhaa xkompanyer zhaa, no ndux gu zhaa gyëtxtil guin, nonchee fxuz rak ru we.
5 ¿U pe gardet gool de lo ley ne wdee Dëdyuzh lo Moises ne let doldet rlaa fxuz dxiin lenxeydoo Dëdyuzh dxe ne rne be?
6 Yna noo lo de yra de ne nee zu te men ne nondee ke lo ydoo.
7 Belnaal ne ndee de kwent gan pe rna ne re lo xgyiich Dëdyuzh ledne re: “Logne rlaan noo nak ne yles lextoo de semén de, lugar ne rket de maa lo fkuuk.” Belne ndee de kwento, nkagyiidet de mén ne bet xdoldet.
8 Gugaknan ne Men ne wdxiid wak Mén rak ke rnebééy men dxe ne rne be.
Wneseyaken Jesus te mén ne miitx nya
(Mr. 3:1-6; Lc. 6:6-11)
9 Zhich guin wruu Jesus nga, wdee Ne lenydoo.
10 Lenydoo guin zu te mgyeey ne miitx te nya. Kom rye men ne nak farisew gan pezee ykagyii men Jesus, lex wnabdiiz men lo Ne, re men:
―¿Pe zak yneseyaken me te mengyiz dxe ne rne me?
11 Wke Jesus, re Ne:
―Belne nuu de te de rap te mëkzhiil, lex gyab ma te leen pos dxe ne rne be, ¿pe tsaloodetgue de maa?
12 Si nondee te mén ke lo te mëkzhiil. Por neguin zak ylaa me ne wen dxe ne rne me.
13 Lex re Ne lo mgyeey guin ne miitx nya:
―Guzegaa nya de.
Zegne wzegaa meno, wakwengoo, wyan ko zegnako stebo.
14 Lex wruu yra men ne nak farisew nga, wzelo men wye men gan pezee yket men Jesus.
Logne re profet-Isaías
15 Chene waknan Jesus logne rlebleedx yra mén guin, wruu Ne nga. Ndalyaa mén wanal Ne, no wneseyaken Ne yra mén ne rzhuun,
16 no re Ne lo men ne rut lo gudet men diiz gan txu nak Ne.
17 Wak neree chen gak kumplir ne re profet-Isaías chene re men:
18 Laa ménree nak ne wye noo ne ylaa xdxiin noo, ryaan noo men.
Laa men nak ne rzak lextoo noo.
Lo men yseleedx noo XEspíritu noo,
chen yzëët men lo yrandxee mén ne slaa noo gyelextis.
19 Tildet men mén, ni terëzdet men mén,
no rut gondet xrëz men ne le men kaderëz mén runëz.
20 No bet ylaadet men mén ne nak zegnak gobkyii ne che wrëz,
ni bet ylaadet men mén ne nak zegnak gyeer ne che nonchee guux rlen lo,
axtegue ne gun men gan gak gyelextis zegne ryal gako.
21 Lo men ykalo yrandxee mén.
Re mén laa Beelzebu rdee poder lo Jesus
(Mr. 3:19-30; Lc. 11:14-23; 12:10)
22 Zhich guin wdxinno mén te mgyeey ne nuu menzab lextoo lo Jesus; ngup men no ngwlëë men. Lex wneseyaken Ne men ne le men wak wii no ne le men wak wnii.
23 Wzee wzak yrandxee mén, wzelo men re men:
―¿Peguin laa XPee David nee?
24 Ne won men ne nak farisew zenga, re men:
―Beelzebu ne rnebééy lo menzab rdee poder lo ménree ne rboo men menzab lextoo mén.
25 Per kom nan Jesus gan pe rlebleedx men, lex re Ne lo men:
―Yrandxee gobyeren ne rdil laake xpén, rdiidet gobyeren guin; no yrandxee gyëz o familye ne rdilelsaa, laake rdiidet men.
26 Zenga ke, belne laake Bzelo rboo sebzelo Bzelo lextoo mén, laake Bzelo rdil Bzelo. ¿Pezee ydii ne rkyeen Bzelo?
27 Belne Beelzebu rniiz poder lo noo ne rboo noo menzab lextoo mén, ¿txu rdee poder lo xpén de ne rboo men menzab lextoo mén? Por neguin laake men rbonyoo ne nlidet rnii de.
28 Per belne por XEspíritu Dëdyuzh rboo noo menzab lextoo mén, neguin rna ne le ne rkyeen Dëdyuzh che kayak lad de yra de.
29 ’Porke ¿pezee gun mén gan tee men lenxyuu te mgyeey ne ndíp por ne gweey men yra ne rap mgyeey guin, belne yliibdet men mgyeey guin primer? Per belne yliib men men, zenga si zun men gan gweey men yra ne rap mgyeey guin.
30 ’Men ne nuudet xfabor noo, rwinyaan men noo; men ne ryedet gan pezee ydaalre xpén noo, rnexoon men xpén noo.
31 ’Por neguin yna noo lo de yra de ne zak perdon yrandxee xdol mén no yrandxee diznyaan ne rnii men, per le men ne rnii diznyaan por Espíritu Sant, nunk gakdet xdol men perdon.
32 Men ne rnii diznyaan por Men ne wdxiid wak Mén, zak men perdon; per le men ne rnii diznyaan por Espíritu Sant, nunk gakdet men perdon ni naaree ni chene ylaa Dëdyuzh gyelextis.
Ryakbeey yag por nex ne rkaa lo we
(Lc. 6:43-45)
33 ’Yagwen, wen nex ne rkaa lo we, per le yag ne ngyidet, ngyidet ke nex ne rkaa lo we. Porke yag ryakbeeyo por nex ne rkaa lo we.
34 ¡Xerras mëël! ¿Pezee ynii de dizwen si menmal nak de yra de? Porke yra diiz ne rzaa lextoo me, laa we rlen ruu me.
35 Menwen, dizwen rnii men porke ne wen nuu lextoo men; le menmal, dizmal rnii men porke ne mal nuu lextoo men.
36 Yna noo lo de yra de ne chene ydxiin dxe ne ylaa Dëdyuzh gyelextis, yrandxee mén ydee kwent lo Ne por yra diiz ne bat rkyiindet ne wnii men.
37 Porke por xdiiz ke de nak ne gyakbeey gan pe nuu xdol de o yëtet xdol de chene ylaa Dëdyuzh gyelextis.
Rnab menmal lo Jesus ne ylaa Ne te gyelmilaguer
(Mr. 8:12; Lc. 11:29-32)
38 Lex re tebëd men ne nak farisew lo Jesus no le tebëd maxter ley:
―Maxter, rlaan noo kwii noo ne ylaa de te gyelmilaguer.
39 Wke Jesus, re Ne lo men:
―Menmal ne zadet xnëz Dëdyuzh rnab lo noo ne ylaa noo te gyelmilaguer, per betre gyelmilaguer kwiidet men, nonchee zegne wzak profet-Jonás kwii men.
40 Porke zegne wuu Jonás tson gbiz tson gyëël leen te mëlnzhoo, zenga ke tsuu Men ne wdxiid wak Mén tson gbiz tson gyëël lenlyu.
41 Chene ylaa Dëdyuzh gyelextis, yban yra men-Nínive, gue men ne rzëël sakzi yra men ne nuu naaree; porke wsaan men-Nínive xgyelmal men chene wzëët Jonás xdiiz Dëdyuzh lo men; nee zu te men ne mazre nondee ke lo Jonás.
42 No chene ylaa Dëdyuzh gyelextis, yban wnaa ne wak rrey nes Sur, gue men ne rzëël sakzi yra men ne nuu naaree. Porke kesentyent nat wruu wnaa guin wdxiid men won men logne re rrey-Salomón porke kesentyent nan rrey-Salomón; nee zu te men ne mazre nondee ke lo rrey-Salomón.
Menzab ne rberee rdee lextoo mén
(Lc. 11:24-26)
43 ’Chene rruu menzab lextoo mén, zad tsu menzab ledne noze mbidx rkaye menzab ledne yne menzab, per rzëldeto.
44 Lex nuu lextoo menzab: “Mazdee yberee ke noo ledne wruu noo.” Chene rberee menzab, nak mén guin zegnak te yuu ne nlat ne noze nexnloob no ne noze xnëz xnëzske nak.
45 Lex ra menzab raxii menzab sguedx menzab ne mazre ntozdee nak ke lo menzab guin; yra menzab zenga ra rdee lextoo mén guin; mazre ntozdee rak men ke ne nak men chekwlo. Zenga ke sak yra menmalree ne nuu naaree.
Wdxiin xnaa Jesus yra men bech Ne
(Mr. 3:31-35; Lc. 8:19-21)
46 Benak kanii Jesus lo mén, chene wdxiin xnaa Ne yra men bech Ne, rlaan men ynii men lo Ne. Kom fwer zu men,
47 lex waluu te mén diiz lo Ne, re men:
―Le xnaa de no le yra bech de zu fwer, rlaan men guno men de diiz.
48 Per wke Ne re Ne lo men ne waluu diiz lo Ne:
―¿Txu nak xnaa noo? ¿Txu nak bech noo?
49 Lex wluu Ne yra xpén Ne, re Ne:
―Ménree nak xnaa noo no nak bech noo.
50 Porke yrandxee mén ne rlaa ne rlaan Xuz noo ne zob gyeybaa, mén guin nak bech noo no nak bzaan noo no nak xnaa noo.