15
Logne rlaa ne rye mén dol
(Mr. 7:1-23)
1 Lex wbig tebëd men ne nak farisew lo Jesus no le tebëd maxter ley ne wruu Jerusalén, wnabdiiz men lo Ne, re men:
2 ―¿Penak rlaadet xpén de zegnak xkoxtumber xpenkwlal be ne raa nya men antes ne gu men, le xpén de raadet nya?
3 Wke Jesus, re Ne:
―Laa de naa, ¿penak rlaadet de ne rkyeen Dëdyuzh, sinke lel xkoxtumber de zanal de?
4 Porke re Dëdyuzh: “Gugaknzebnëz lo xuz de, gugaknzebnëz lo xnaa de”, “Mén ne rninyaan lo xuz o men ne rninyaan lo xnaa, rzëël guet men.”
5 Per le laa de yra de re de ne zak gue mén lo xuz men o lo xnaa men: “Gundet noo gan gun noo xyudar de porke yrandxee ne nniiz noo lo de le we che wguu noo goon por Dëdyuzh”;
6 re de ne kwaskyertee men ne gue zenga, rapdetre men degne gun men xyudar xuz men o xyudar xnaa men. Ne rlaa de zenga, tebkoolel rsan de ne rkyeen Dëdyuzh por ne zanal de xkoxtumber de.
7 Gugannaa laa de wen. Nli ke ne re profet-Isaías por laa de yra de chene re men:
8 Yra ménree noze xdiiz men za ne rzaknon men noo,
per rlaadet meno ydeblextoo men.
9 Bat rkyiindet yra ne rlaa men chene rzaknon men noo,
porke yra ne rneluu men, noze mén rkyeeno.
10 Lex wbëz Jesus yra menroo menduxtee guin, re Ne lo men:
―Gugon neree ne yzëët noo lo de no gudee kwento:
11 Let ne rudet mén rlaa ne rak men mendol, sinke dizmal ne rruu ruu men rlaa ne rak men mendol.
12 Lex wbig yra xpén Jesus lo Ne, re men:
―¿Pe wyenen de ne wlayaa yra men ne nak farisew ne won men negwa ne re de?
13 Wke Ne re Ne:
―Yrandxee gyizh ne let Xuzdet noo ne zob gyeybaa wlabni, slaazo axtegue ydeblu we.
14 Zeka men; nak men zegnak menngwlëë ne rgoob nya sengwlëë; no belne rgoob ngwlëë nya sengwlëë ngwlëë, skantaa men yrup men ledne nugyët.
15 Lex re Bëd lo Jesus:
―Guzëët gan pe rna diiz gwa ne re de.
16 Orguin re Ne:
―¿Pe ni laa de yra de gardet ydeedet kwento?
17 ¿Pe rdeedet de kwent ne yrandxee ne ru mén, txu men rya we, zhich guin rruu ko?
18 Per le diiz ne rlen ruu mén, lextoo men rruu we; laa we rlaa ne rak men mendol.
19 Porke lextoo mén nuu yra ne mal ne rlebleedx men, zegnak ne rket men semén men, zegnak ne rkano men mén ne nakdet lzaa men, zegnak ne rkanogue men xkompanyer men chene gardet ytsëlnya men, zegnak ne rbaan men, zegnak ne rkagyii men semén men, no le zegnak ne rninyaan men lo semén men.
20 Yra neree rlaa ne rak mén mendol; per le ne raadet nya mén antes ne gu men, let neguindet rlaa ne rak mén mendol.
Wneseyaken Jesus xsaap te wnaa
(Mr. 7:24-30)
21 Wruu Jesus nga, za Ne nes Tiro no le nes Sidón.
22 Lex wbig te wna-Canaán ne nuu nes guin rkarëz men Jesus, re men:
―¡Dechey, XPee David, gules lextoo de noo! Porke kesentyent rzakzi menzab xsaap noo.
23 Per wkedet Jesus. Lex wbig xpén Ne wnab men lo Ne, re men:
―Gugue lo wnaa gwa gya men, porke ndxiin rkarëz men zëdnal men be.
24 Lex wke Ne re Ne:
―Nonchee por men-Israel ne nak zegnak mëkzhiil ne che wyab wxaal Dëdyuzh noo.
25 Per wbig wnaa guin wzuzhib men lo Ne, re men:
―¡Dechey, gugun xyudar noo!
26 Wke Ne re Ne:
―Ngyidet ne ygyitxee mén ne ru zhiin men chen ynii meno lo mëëk.
27 Lex re wnaa guin lo Ne:
―Nli we Dechey; per axtegue mëëk ru ne byu ne ratxee zhiin xmezh xpexwaan maa.
28 Lex wke Ne re Ne lo men:
―¡Wnaae, kesentyent rlaleedx de noo! Gak zegne rlaan de.
Orgueguin wyaken xsaap wnaa guin.
Wneseyaken Jesus ndal mengyiz
29 Wruu Jesus nga, wdxiin Ne runis-Galilea. Lex wyeep Ne te xtoo gyeey wzob Ne.
30 Nga wdxiin ndalyaa ndalduxtee mén lo Ne, wdxinno men mennguzh, menngwlëë, menngup, men ne ngyidet nya, no ndalre men ne rzak ste klas gyiz; wdxig men men lo Ne, lex wneseyaken Ne yrandxee men.
31 Kesentyent wzee wzak yra mén ne wii men ne le menngup che rnii, le men ne ngyidet nya che wakwen nya, le mennguzh che rzawen, le menngwlëë che rwii. Lex wzelo men wzaknon men XDëdyuzh men-Israel.
Wdee Jesus ne wu tapmil mén
(Mr. 8:1-10)
32 Lex wbëz Jesus yra xpén Ne, re Ne lo men:
―Rles lextoo noo yra ménree, porke che wzaa tson gbiz ndxin men lo noo no neeydet men ne gu men. Rlaandet noo yxaal noo men gya men ruxyuu men sin ne gudet men, porke tegue yra men fwers nëz.
33 Lex re yra xpén Ne:
―Per ¿pazh tsaxii be ne gu lal nee mén zegnakpee lugarree ne ni te mén nuudeto?
34 Orguin wnabdiiz Jesus lo men, re Ne:
―¿Blazh gyëtxtil neey de wa?
Wke men re men:
―Guedxo no le tebëd mëlwin.
35 Orguin wkyeen Jesus wzob yra mén guin lyu.
36 Lex wgoob Ne yra guedx gyëtxtil no le yra mël, wdee Ne dexkyizhtee lo Dëdyuzh. Wluzh nga wla Ne yra gyëtxtil guin, wdee No lo yra xpén Ne, lex laa men wgyiizo lo yra mén guin.
37 Wu men yrandxee men axtegue ne wyezaa men, no chene wluzh nga, wsezaa men guedx tsegwed yra ne bla ne wrukaa.
38 Yra men ne wu, tapmil nak nonchee mgyeey, ngabdet no wnaa ni minwin.
39 Wluzhse, wguli Ne yra men guin nëz, lex wdee Ne lenbark za Ne lo lyu ne la Magdala.