8
Wneseyaken Jesus te mén ne rzak gyiz ne la lepra
(Mr. 1:40-45; Lc. 5:12-16)
1 Chene wyët Jesus xtoo gyeey guin, ndalyaa mén wanal Ne.
2 Lex wbig te mén ne rzak gyiz ne la lepra, wzuzhib men lo Ne, re men:
―Dechey, belnaal yna de zun de gan yneseyaken de noo.
3 Orguin wzegaa Ne nya Ne wtee No led men, re Ne:
―Sna noo. Gugyaken.
Orgueguin wyaken led mén guin.
4 Lex re Ne lo men:
―Che nan de rut lo guedet do, nonchee lo fxuz gutsa gutsaluu led de no gutsaron xgoon de zegne zëëd lo ley ne wdee Dëdyuzh lo Moises chen gaknan mén ne che wyaken led de.
Wneseyaken Jesus xmos te kapitan
(Lc. 7:1-10)
5 Zegne wdee Jesus lenlgyëz-Capernaum, wbiggue te kapitan-Roma wnab men fabor lo Ne,
6 re men:
―Dechey, le xmos noo nex ruyuu rzhuun men, baanske rlaa men, noze waknet led men.
7 Lex re Ne lo men:
―Noo tsaneseyaken men.
8 Wke kapitan, re kapitan:
―Dechey, rzëëldet noo ne tsa de axtegue ruxyuu noo; nozguestee gukyeen ne gyaken xmos noo, laa ne gyaken men nga.
9 Porke no ke noo rap mén ne rnebééy lo noo, no rap ke noo mén ne rnebééy noo lo. Chene nan noo lo men te men ne tsa men mandad, ra men; chene nan noo lo men ste men ne chiid men lo noo, rdxiid men; chene nan noo lo xmos noo: “Gulaa neree”, rlaa meno.
10 Ne won Jesus ne re kapitan zenga, wzee wzak Ne, lex re Ne lo yra mén ne zanal Ne:
―Nligue yna noo lo de ne ni Israel gardet ytsëlo noo ni te mén ne rlaleedx noo zegne rlaleedx ménree noo.
11 No yna noo lo de yra de ne sdxiin ndalyaa mén ne nuu ydendxee gyëzlyu sob men gu men yra men Abraham, Isaac, no le Jacob ledne rnebééy Dëdyuzh.
12 Per le yra mén ne ryal nyuu ledne rnebééy Dëdyuzh, yxaal Ne men fwer lo nkeb ledne goon men axtegue guleey men.
13 Lex re Jesus lo kapitan:
―Gugya ruxyuu de; gak zegne wlaleedx de.
Orgueguin wyaken xmos kapitan.
Wneseyaken Jesus xnasweguer Bëd
(Mr. 1:29-31; Lc. 4:38-39)
14 Lex wa Jesus ruxyuu Bëd, wii Ne le xnasweguer Bëd nex lo loon rlen men xlaa.
15 Lex wnëëz Ne nya men, wruugue xlaa led men; orgueguin waxee men wdee men ne wu Ne yra Ne xpén Ne.
Wneseyaken Jesus ndal mengyiz
(Mr. 1:32-34; Lc. 4:40-41)
16 Chene wnit lyu, wano mén ndal mén ne nuu menzab lextoo lo Jesus, tendxee diiz wnii Ne wboo Ne menzab lextoo men, no wneseyaken Ne yrandxee mén ne rzhuun,
17 chen gak kumplir diiz ne wzëët profet-Isaías chene re men: “Laa Ne wgyitxee xgyelenyaan be no le xgyelgyiz be.”
Men ne rlaan tsanal Jesus
(Lc. 9:57-62)
18 Ne wii Jesus ne ndalyaa ndalduxtee mén ndxin kbii Ne, re Ne lo xpén Ne: “Yoo tekaa be stebkoo nis.”
19 Lex wbig te maxter ley lo Ne, re men:
―Maxter, sanal noo de ledne tsatee de.
20 Lex re Ne lo men:
―Mëëz rap ma xebluu maa, maa ne rzhobee rap ma xeftxëës maa; per le Men ne wdxiid wak Mén, yëten men ni ledne gyix xtoo men.
21 Zhich guin re te xpén Ne lo Ne:
―Dechey, primer gudee si tsa noo gugyeer noo xuz noo, lex sanal noo de.
22 Wke Ne re Ne lo men:
―Gutanal noo; gudee si gugyeer mengut semengut mengut.
Wnegyakchi Jesus mee no wgutsë Ne nis
(Mr. 4:35-41; Lc. 8:22-25)
23 Lex wdee Jesus lenbark yra Ne xpén Ne.
24 Chene che za bark, tebegue wlen te meroo meduxtee lo nis, axtegue ryoots bark nis; le Jesus nexguees.
25 Lex wa xpén Ne wboo men mkaal lo Ne, re men:
―¡Dechey, guselaa be! ¡Le be zazebgyët!
26 Wke Ne re Ne:
―¿Penak kesentyent rdxe de? ¡Ake mén ne rlaleedxdet Dëdyuzh ydeblextoo!
Wluzhse re Ne zenga, waxee Ne wakndux Ne lo meroo guin no le lo nis; wutsëgoo.
27 Kesentyent wzee wzak yra xpén Ne, rnabdizlsaa men, re men:
―¿Pezee nakleg ménree ne axtegue mee, axtegue nis ron xdiiz men?
Men-Gadara ne nuu menzab lextoo
(Mr. 5:1-20; Lc. 8:26-39)
28 Chene wdxiin Jesus stebkoo nis lo xelyu men-Gadara, lad baa wruu txup mgyeey ne nuu menzab lextoo, za men zatsëlo men Ne. Axtegue ni te mén rakdet tee nes guin, tant ndxeeb rlaa men.
29 Zegne wii men Jesus, wzelo menzab rderëz menzab, re menzab:
―¿Penak rgal de noo, Jesus XPee Dëdyuzh? ¿Pe zëëd de nee ne yzakzi de noo antes ne ydxiin dxe?
30 Nes guin ndxin ndal kuch ka ma gwdu.
31 Lex wnab menzab lo Jesus, re menzab:
―Belne rboo de noo, gudee si tsa noo tee noo lextoo yra kuchro.
32 Wke Ne re Ne:
―¡Gutsa!
Orguin wruu menzab lextoo yrup mgyeey guin, watee menzab lextoo yra kuch guin. Wzelo ma wzhoon maa wxenxtoo maa te ruyúú, wyab ma axtegue lo nis. Nga wobkyiky ma nis, wet maa.
33 Orguin wzhoon yra mén ne rapkwent kuch guin; chene wdxiin men lenlgyëz, wzelo men wuu men diiz yra neguin ne wak no ne wzak mgyeey ne nuu menzab lextoo.
34 Lex wruu yrandxee mén ne nuu gyëz guin za men ledne zu Jesus. Chene wii men Ne, wnab men lo Ne ne yruu Ne xden men.