17
Ubiꞌyahua liꞌihua para nú la zanaꞌhua lu dula
(Mt. 18:6-7, 21-22; Mr. 9:42)
1 Uni Jesuse lubee beneꞌnu:
―Siempre nuꞌ beenú rriꞌi nú rriꞌi bee bene dula, pero ¡cueꞌ bene enu riꞌi nú riꞌi stucu bene dula!
2 Máse neca nzeꞌca para bene zeꞌe nú llicaꞌcuu bene quie molino añilla nu tsiꞌqui beei liꞌilla lu inzatuꞌ, luhuare nú riꞌilla nú sanaꞌ bene lu dula enu apenatsia uyalí arquiꞌ liꞌá.
3 ¡Ubiꞌyahua liꞌihua!
’Tunu nuꞌ ta tucu enu rriꞌi dula, uriꞌihua nú quiꞌyalla, nu tunu cheꞌe arquiꞌlla lu dula nú uriꞌilla, uriꞌihua perdona liꞌilla.
4 Mase achi bese tucu bichia riꞌilla urre nilla bee nú necha neca lulu, nu tunu achi bese leꞌca entalla nu nilla lulu uriꞌi perdona liꞌá: “La riꞌá scua stucu bese.” Rquiꞌña nú riꞌilu perdona liꞌilla.
Uriꞌi elietsa luru para nú tsu tenelilá arquiꞌru lu Diose
5 Chequie uni bee beneꞌ Jesuse lunu:
―Uriꞌi elietsa luru para nú tsu tenelílá arquiꞌru lu Diose.
6 Nu ucuaqui Jesuse lubeella:
―Tunu nzu tenelí arquiꞌhua masia lleꞌna xi neca ebichiꞌ mestaza, nuꞌ modo nihua lu aca llene sicómoro quieꞌ: “Axi liꞌilu caꞌa nu uzucu lu inzatuꞌ”, che zucuꞌ aca cuaꞌ nú rnihua.
Lunú riala riꞌi tucu esclavo
7 ’Tucu ejemplu necane, tunu tucuhua rluꞌcu tucu bene enu neca esclavo luhua, nu riña nzeꞌe nú uya unguꞌna nzeꞌe uꞌnaꞌ urre uya nzeꞌe ucu nañi, ¿xieꞌ nihua lu nzeꞌe: “Uyuꞌu nu uzucu para nú acuxelu”?
8 Pero aꞌla nihua lu bene zeꞌe: “Ucheꞌe xuculu nu urecheꞌe nú acuxea nu yeꞌta yulue lua, diqui nú racua nu ruaꞌa hasta nú laꞌxua nú acua. Che nuꞌ modo nú aculu nu hueꞌlu.”
9 Pero la deteꞌhua masia cheꞌtsa lu bene zeꞌe, xne rriꞌitsiai lunú unibiyaꞌhua lui nú riꞌi.
10 Leꞌca esquie liꞌihua, chenu laꞌxuhua nú riꞌihua ye nú unibiyaꞌ Diose nú riꞌihua, chequie nihua: “Necaru mosoꞌ enu la zibiꞌ, xne uriꞌitsiaru lunú neca cuendaꞌru nú riꞌiru.”
Uriꞌiyeca Jesuse chiꞌi bene enu seca elichia nú lee lepra
11 Chenu nza Jesuse eyeche Jerusalén, udetenu lu iliu Samaria cuna lu iliu Galilea.
12 Nu chenu nze chuꞌunu tucu eyeche llaꞌna, uyachaꞌcalu chiꞌi bee niyu enu seca elichia nú lee lepra liꞌinu, pero istu ucuaꞌaxe beei lunu,
13 nu urixialibeei nú unibeei lunu:
―¡Maestro, Jesuse, uhuaꞌa arquiꞌ liꞌiru!
14 Chenu ulañiꞌ Jesuse liꞌibeei, uninu lubeei:
―Uquiahua ne lañiꞌ bee uleꞌya liꞌihua.
Pero diquila nú nzuebeei uyecaꞌ beei elichia nú seca beei.
15 Chequie tucu beei, chenu uriꞌi nzeꞌe beyaꞌ nú uyecaꞌlaꞌ nzeꞌe, ubenchilaꞌ nzeꞌe nu ubixialii nú uni bedichiaꞌ nzeꞌca lu Diose.
16 Nu utsulliquii lu Jesuse hasta nú udiꞌ tequiei lu yuu para nú udeteꞌi cheꞌtsa lunu, nu necai bene Samaria.
17 Che uni Jesuse:
―¿Xieꞌlanú chiꞌi neca bene enu uriyeca la? ¿Ma sequie beei?
18 ¿Xieꞌ bene rene quieꞌtsia ubenchilaꞌ para nú ni bedichiaꞌ nzeꞌca lu Diose la?
19 Che uni Jesuse lui:
―Utsuli, nu uquiaꞌa nee. Uyecaꞌlaꞌlu xne uchili arquiꞌlu liꞌá.
Xariña lunú rnibiyaꞌ Diose
(Mt. 24:23-28, 36-41)
20 Unidichiaꞌ bee fariseo lu Jesuse xunga riña lunú rnibiyaꞌ Diose, nu ucuaquinu lubeella:
―Lunú rnibiyaꞌ Diose la neca nucuaꞌ nú lañiꞌhua chenu riñane.
21 Lecati ni: “Nú caꞌa nzu lunú rnibiyaꞌ Diose”, urre “nguié nzuee”; xne lunú rnibiyaꞌ Diose nzula letahua nee.
22 Nu uninu lubee beneꞌnu:
―Riña bichia nú niarquiꞌhua nú lañiꞌhua liꞌá Bene enu uxeꞌla Diose masia tucu bichia pero la lañiaꞌhua liꞌá.
23 Mase nuꞌ bee bene enu ni luhua: “Caꞌa nzucunu”, urre “nguié nzucunu”, pero la chequiehua beei.
24 Xne tucu nú neca chenu riaꞌla lee nu riuꞌu llieꞌe enzichiuꞌ enzerquie, leꞌca scua aca chenu riña zeca liꞌá Bene enu uxeꞌla Diose.
25 Pero rluti rquiꞌña nú chiquiꞌ nehuana zecaa, nu huachu bee bene enu nucuaꞌa nee liꞌá.
26 Tucu nú unga tiembu nú uhuañi Noé, leꞌca scua aca bichia chenu riña zeca liꞌá Bene enu uxeꞌla Diose.
27 Xne tiembu zeꞌe, udacutsia bee bene nu ungueꞌtsia beei, nu uchia beei nu udeteꞌbeei xinchiuꞌcu beei uchia, hasta nú uriña bichia nú uyuꞌu Noé liñi barco llene nú urecheꞌella, nu uquixie nú ulaca tucu quiu juerte nu unguti ye beei.
28 Leꞌca scua unga chenu uhuañi tucu bene enu lee Lot lu iliulabe: udacutsia bee bene nu ungueꞌtsia beei, cuna nú ruti beei nu si beei, nu rduꞌ beei nii nu rrecheꞌe beei bee niꞌi.
29 Pero chenu uchiuꞌu Lot eyeche Sodoma, uquixie nú ulaca quii enza liñibe cuna azufre, nu unguti ye beei.
30 Leꞌca scua aca chenu riña zeca liꞌá Bene enu uxeꞌla Diose.
31 ’Bichia nú aca bee nucuaꞌ, bee bene enu nchiucuꞌ equie niꞌi la lluꞌchaꞌ chuꞌu beei liñi niꞌi beei para nú naꞌtse beei steneꞌ beei, nu bee bene enu nucuaꞌa dañi la lluꞌchaꞌ benchilaꞌ beei niꞌbeei para nú uyaꞌbeei steneꞌbeei.
32 Ulluꞌcuꞌ arquiꞌhua xa ulleꞌca unaꞌa Lot.
33 Bene enu máse niarquiꞌ nú huañi lu iliulabe quieꞌ riña bichia nú laxu nucuaꞌ, pero bene enu ati equie cuendaꞌ liꞌá luꞌculla eluhuañilílla liñibe.
34 ’Liꞌá nia luhua nú rulaꞌ zeꞌe elu nucuaꞌa chiucu bene lu tucu luna, tuculla uya nu stuculla riaꞌna.
35 Nu elu nucuaꞌa chiucu unaꞌa riu, tuculla uya nu stuculla riaꞌna.
36 Nu elu nucuaꞌa chiucu niyu dañi, tucui uya nu stuculla riaꞌna.
37 Chenu ubeneꞌ bee beneꞌnu nucuaꞌ uni beella lunu:
―¿Cá aca bee nucuaꞌ?
Nu ucuaqui Jesuse lubeella:
―Elu nuxu tucu nañi enu unguti zeꞌe rieteꞌ saꞌ bee ulabichi.