5
Tib guits ne nzhidoo gadz lë cint
1 Zeeṉe bui naa stib, goṉpaa naa meṉ ne zob lo xcan ro co, nose tib guits nroob nia derech me. Gropse nëz guits co quia, ndibëdsew, nzhidoogaw gadz lë cint.
2 Ni goṉ naa tib anjl, tib meṉ macis rlu me, nguiedz zëëb tsi me, bnabdiidz me rëb me:
―¿Cho rieguiaḻ cchug cint ne nzhidoo guits qui, cxal zho low?
3 Ni tib choot pxald lo guits co, niicle gbaaw niicle lo guidzliuw, niicle zhan guidzliugaaw, brieequiad tib zha ne nchug cint co, nwi zho lo guits co.
4 Mban goc naa, psilo naa nguiedz roon naa, goṉ naa sca brieequiad tib zha ne rieguiaḻ nxal lo guits co, nlab zho low.
5 Dzigo bnee tib meṉgol ne zo gax lo xcan co, në me lo naa:
―Goond luu. Lëz gaṉle, meṉ ne brieequia lo xtii Judá, lo xtii rey David, me cchug gza gadz cint ne nzhidoo guits qui, me cxal low. Ible me rieguiaḻa, sac goṉ psiaablo me grëse zha ne rlëë lo me; rrieequia nac me zig tib meedz.
6 Horco bui naa zaatne nac lo xcan ro co, goṉ naa glowtaa lo gza bult mban co ni lo gza meṉgol co, ga zo tib Carner yeeṉ. Rlupaa zha psacsi zho ma, zeeṉe beet zho ma. Zob gadz zhoz ma, ni zob gadz bziaalo ma, rrieequia gza gadz bziaalo ma ga, miṉ co nac gadz guieḻbiini ne rdeed zhiEspíritu Dios.
7 Dzigo wbig meṉ ne nac Carner yeeṉ co, bnaaz me guits ne no nia derech meṉ ne zob lo xcan ro co.
8 Zigne bnaaz me guits co, laa gza bult mban co, ni gza gaḻptap meṉgol co pquiitsgzhib lo me. Tib tib meṉgol co nzheṉse me tib arp ni tib ptsigui or, rso tib gox ndzon leṉ ptsigui co (rrieequia gox co nac grë diidz ndzon ne rnee grë zha ne no xnëz Dios zeeṉe rzodiidznie zho me).
9 Dzigo psilo gza meṉgol co biiḻ me tib cant cub. Znu rnee lo cant co:
¡Ible luu rieguiaḻ ycaania guits qui, luu rieguiaḻ cchug gza cint ne nzhidoow i!
Sac luu bded grëtaa guieḻnë co psacsi zho luu, haxta bzhiee xchen luu;
sca psilaa luu grëlose dii miech,
teḻ pa guiedztaa nac zho, teḻ pa diidztaa rnee zho, teḻ pa naciontaa ngab zho.
10 Laa luu bzhii no grë no gac no tib guiedz cub,
guiedz ne gnabey Dios;
no gac pxoz ne guṉ dziin lo me,
masaque tipse gban no zeeṉe gnabey me lo guidzliu.
11 Zeeṉe bui naa, goṉ naa anjl guizhiu ne ndxie zaatne zo xcan ro co, led zha ne grieelod glab new.
12 Nguiedz zëëb tsi zho grë zho gza bult mban co, ni grë meṉgol co, rnee zho:
¡Meṉ non nac meṉ ne nac Carner yeeṉ ne squi rlu beet zho!
Me rieguiaḻ gnabey, meṉ ro nac me, choot grieelod csiaablo me.
Ladznia me no grëse guieḻnzaac, me rap grëtaa guieḻrieṉ,
Meṉ ndzon nac me, me none dziuuṉnon ne, me none dziooḻnie ne.
13 Horco grëse miech, grëse ma, grëse ncuaaṉe bzaa Dios, zigtaa gbaaw, zigtagaa lo guidzliuw; zigtaa zhan guidzliuw, zigtagaa lo nisdoow; nguiedz zëëb tsi zho, rnee zho:
¡Nliw, meṉ ne zob lo xcan ro qui, ni meṉ ne nac Carner yeeṉ qui,
ible rieguiaḻ dziuuṉnon ne grop me!
¡Me rnabey, lo me none gnee ne grëtaa diidz ndzon;
nadzew, gzhew, ni grëragaa izdoo ne ziaadraaw!
14 Pquiab gza tap bult co, rëb zho:
―¡Scaw, sca no gaca!
Dzigo gzase meṉgol co, laa zho pquiitsgzhib lo meṉ ne zob lo xcan ro co; psilo zho rnee zho grë diidz ndzon lo me.