18
Dub cuent ten dub juez no dub xagots ngut xabgiꞌi ten na
1 No msaktabeꞌe Jesús dub ta mluu xa ndoꞌ be xmen xa, ndontsa mas uxik bexa gudiꞌizhno bexa Dios.
2 Ndab xa:
—Leꞌa dub gezh uyoꞌo dub juez ni lá ndap mod ndoꞌ Dios no ni ndoꞌ be men.
3 Leꞌa gezh wa nchoga dub xagots ngut xabgiꞌi ten na. Leꞌa xagots wa cha ngwaꞌusake dub xa nyono xa ndoꞌ juez wa, gun juez regl ta wa.
4 Leꞌa kwenla leꞌa juez lá kaꞌab gun ta nlad xagots wa, parea ngol gor mbinbeꞌe juez, ndab xa: “Naꞌ ni ndoꞌ Dioska lá ndap mod no ni ndoꞌ be men,
5 parea leꞌa naꞌ neꞌe ladna tant ndiꞌid xagots ndee ndoꞌ naꞌ. Nat gun naꞌ ta nlad xa, ndontsa yá lá giꞌidta xa, leꞌa naꞌ ngi saklola ndoꞌ xa.”
6 Leꞌa Jesús cha ndab:
—Blaꞌach bego xteꞌe ndab juez wa, ná xa dub xa ugap nak.
7 ¿Nsak bega zha leꞌa Dios lá gakno bexa mti Dios, bexa na teꞌal tezhea nab ndoꞌ Dios gakno Dios xa? ¿Nsak bega zha kwenpa ti ikaꞌab Dios ndoꞌ bexa wa?
8 Leꞌa naꞌ gáp ndoꞌ bega leꞌa Dios uxax sakno bega. Ná leꞌa gor na ilengal naꞌ, Xa Myak Men Ndoꞌ Gizhliyo, ¿bi szheal naꞌ men ngeꞌ ladna Dios ndoꞌ gizhliyo zha wa zha?
Dub cuent ten dub xa fariseo no dub xa nsen med
9 Leꞌa wats Jesús nde pla bexa ndanbeꞌe leꞌa mas ndun be ta wen ndoꞌ lak ndun be ltsaꞌa bexa. Leꞌa Jesús cha mbidiꞌizh ndoꞌ bexa wa, msaktabeꞌe xa dub taꞌa, ndab xa:
10 —Leꞌa top xabgiꞌi utoꞌo nchaꞌyadiꞌizhno Dios tale ten niꞌi ten Dios. Leꞌa dub xa wa xa fariseo, leꞌa stub xa wa xa nsen med nkix be men ndoꞌ gobier.
11 Leꞌa xa fariseo wa cha usoꞌ ndab ndoꞌ Dios: “Dios, leꞌa naꞌ nsa xno ndoꞌ go, geal leꞌa naꞌ lá ndun lak ndun be men xaꞌaga, bexa na ndun gealwaꞌan no bexa ugap ndanno be men no bexa na ngal stub xa naꞌanpa xagots ten xa. No ni lá nak naꞌ lak nak xa nsen med baꞌ.
12 Leꞌa naꞌ lá ndaw top wizh kad dub len sman, no nsa naꞌ diezmo ten itea be tiꞌin ndun naꞌ.”
13 ’Ná leꞌa xa nsen med wa sittsa nsoꞌ. Ni lá nwiꞌi xa gaꞌap, ndi msagolp xa ladoꞌo xa tant kweaꞌ ncho ladna xa, cha ndab xa: “Dios, blats ladna go naꞌ, leꞌa naꞌ sian ta ugap ndun.”
14 ’Leꞌa naꞌ gáp ndoꞌ bega leꞌa xa nsen med wa wen myaꞌan ndoꞌ Dios gor na mlanseaꞌ xa ta lid xa. Ná leꞌa xa fariseo wa naꞌanpa wen myaꞌan ndoꞌ Dios. Leꞌa tal ton gab leꞌa nsak, leꞌa cuent ten Dios leꞌa xa wa naꞌanpa nsak. Ná leꞌa tal ton yak tuzh, leꞌa cuent ten Dios leꞌa xa wa nsakka.
Jesús nsea be meꞌed
(Mt. 19:13-15; Mr. 10:13-16)
15 No ulenno be men be meꞌed ten na wats Jesús, ndontsa uxoꞌob Jesús yaꞌa na gek be meꞌed, inab xa ulaꞌach Dios be meꞌed wa. Leꞌa gor uniꞌí be xmen Jesús li nseabeno be men meꞌed wa, cha uteyo bexa be men wa.
16 Ná leꞌa Jesús cha utezh be xmen na, cha ndab xa:
—Blaꞌa bego giꞌid be meꞌed baꞌ wats naꞌ. Lá uka bego giꞌid be meꞌed, leꞌa sa nibeꞌe Dios yate bexa yak lak nak be meꞌed ndee.
17 Leꞌa naꞌ gáp ndoꞌ bega, leꞌa tal ton lá ulaꞌa inibeꞌe Dios xa lak dub meꞌed, leꞌa xa wa nunk lá yate sa nibeꞌe Dios.
Dub xabgiꞌi rik mbidiꞌizhno Jesús
(Mt. 19:16-30; Mr. 10:17-31)
18 Weꞌe leꞌa dub xa nibeꞌe ten bexa judio cha unabdiꞌizh ndoꞌ Jesús ndab xa:
—Mech wen, ¿xtaꞌan gun naꞌ ndontsa no naꞌ gap gealnaban ndoꞌ Dios, ta nunk lá idub?
19 Leꞌa Jesús cha ukaꞌab ndab:
—¿Xtaꞌan ngi wen ndab lu ndoꞌ naꞌ zha? Naꞌan ton wen ndoꞌ gizhliyo, ndon nabtsa Dios wen nak.
20 Leꞌa lu yá uniꞌíka ta ndab ley ten Dios: “Lá ugal lu xa ten stubga men. Lá gut lu men. Lá gun lu gealwaꞌan. Lá gun lu gealkwiꞌin. Wankea xus lu nsea xnaꞌa lu.”
21 Leꞌa xabgiꞌi wa cha ukaꞌab ndab:
—Iteanak be ta wa ndunka naꞌ idub zha tuzhta naꞌ.
22 Leꞌa gor na mbiꞌín Jesús ta wa, cha ndab Jesús ndoꞌ xa:
—Stub taꞌa ndun jwalt gun lu: bdoꞌo itea be taꞌa ten lu, cha btseꞌa med wa ndoꞌ bexa uban nak. Weꞌe gap lu sian taꞌa ndoꞌ Dios. Cha utsea cha usankea tsoꞌo naꞌ.
23 Leꞌa gor na mbiꞌín xabgiꞌi wa ta wa, leꞌa xa uzhebpa uban myoꞌo ladna, geal leꞌa xa dub xa rikpa.
24 Leꞌa gor na uniꞌí Jesús leꞌa xa uzhebpa uban myoꞌo ladna, cha ndab Jesús:
—Uzhebpa ugan yate dub xa rik sa nibeꞌe Dios.
25 Ndi mas lid bid itid dub came geꞌed xan dub yagux, ndoꞌ yak dub xa rik xa nibeꞌe Dios.
26 Leꞌa bexa na mbiꞌín ta wa cha unabdiꞌizh bexa ndab bexa ndoꞌ Jesús:
—¿Tonxá sun gan yate sa nibeꞌe Dios zhaga?
27 Leꞌa Jesús cha ndab:
—Leꞌa cuent ten nabtsa be men leꞌa‑yá lá yoo gan. Ná leꞌa cuent ten Dios leꞌa‑yá syoꞌoka gan.
28 Weꞌe leꞌa Pedr cha ndab ndoꞌ Jesús:
—Unaꞌ go, leꞌa besa mlaꞌa itea be taꞌa ndap besa, cha ndi usankea besa tsoꞌo ga.
29 Leꞌa Jesús cha ukaꞌab ndab:
—Leꞌa naꞌ gáp ndoꞌ bega, leꞌa tal ton ulaꞌa inibeꞌe Dios xa, ta weꞌe nlaꞌa xa lid xa no xus xa no wit xa no xagots ten xa no xmeꞌed xa,
30 leꞌa xa wa mas sian be taꞌa ikaꞌa tiemp nat. No leꞌa tiemp tiꞌi ilen leꞌa xa wa gap gealnaban nunk lá idub.
Jesús mbidiꞌizhgal stub biaj leꞌa gat
(Mt. 20:17-19; Mr. 10:32-34)
31 Cha utezh Jesús isatibtop be xmen na, ndab xa:
—Blaꞌach bego, leꞌa beuna nchaꞌbe Jerusalén, sa yoo itea be ta mkeꞌa bexa polta sakndoꞌ Dios cuent ten naꞌ ndee, Xa Myak Men Ndoꞌ Gizhliyo.
32 Leꞌa naꞌ yak cuent ndoꞌ yaꞌa bexa naꞌanpa xa judio. Leꞌa bexa wa usalad gunno naꞌ, no xela iníꞌi bexa ndoꞌ naꞌ, no uchukko bexa ndoꞌ naꞌ.
33 No uzhebpa kin bexa naꞌ, weꞌe gut bexa naꞌ. Parea gal wizh yon leꞌa naꞌ ibangal ndoꞌ gealgut.
34 Ná leꞌa be xmen Jesús ni lá iniꞌí bexa xtaꞌan mbidiꞌizh Jesús, geal leꞌa ta wa dub ta lá yoo gan yakbeꞌena bexa.
Jesús myunyakna dub xa lá naꞌ gezh Jericó
(Mt. 20:29-34; Mr. 10:46-52)
35 Leꞌa gor na yá nchaꞌlayaꞌ gax Jesús gezh Jericó, leꞌa toꞌo nes wa nsob dub xabgiꞌi lá naꞌ, nab xa med ndoꞌ be men.
36 Leꞌa gor na mbiꞌín xa nchaꞌtid be men, cha unabdiꞌizh xa ndoꞌ bexa wa ná xtaꞌan ta wa.
37 Leꞌa bexa wa cha ndab:
—Leꞌa sa ndee nseatid Jesús xa Nazaret.
38 Weꞌe cha ugeꞌ ndab xa:
—¡Jesús, xin David! ¡Blats ladna go naꞌ!
39 Leꞌa bexa na nseabe ned wa cha uteyo xa wa ndab bexa:
—Lá kwezhta lu xa baꞌ.
Parea leꞌa xa ndi mas ugeꞌ ndab:
—¡Xin David! ¡Blats ladna go naꞌ!
40 Weꞌe leꞌa Jesús cha ngwaꞌisoꞌ, cha unibeꞌe xa yaꞌyoꞌo bexa xa lá naꞌ wa. Leꞌa gor na ulansea xa, cha unabdiꞌizh Jesús ndoꞌ xa ndab xa:
41 —¿Xtaꞌan nlad lu gunno naꞌ lu?
Leꞌa xa cha ndab:
—Señor, leꞌa naꞌ nlad inaꞌ.
42 Leꞌa Jesús cha ndab:
—Nat myakna lu lak mgeꞌ ladna lu naꞌ.
43 Bi leꞌa gor wa leꞌa xa cha mnaꞌla, cha no xa usankea tsoꞌo Jesús, ndab xa leꞌa Dios uzheꞌeb dub Dios juert. No itea be men na uniꞌí ta wa noga li ndab.