20
Jesús lá ngab ton mtuꞌub Jesús
(Mt. 21:23-27; Mr. 11:27-33)
1 Ngol stub wizh leꞌa Jesús nluugal be men tale ten niꞌi ten Dios, ndadiꞌizh xa diꞌizh wen ten Dios. Weꞌe leꞌa be mech ten ley, no be uleꞌay nibeꞌe, no bexa gox nsak ulen wats Jesús.
2 Cha ndab bexa ndoꞌ Jesús:
—¿Ton ulaxoꞌob lu gun lu ta wa zha? ¿Nati ton mtuꞌub lu gun lu ta ndee?
3 Leꞌa Jesús cha ukaꞌab ndab:
—Leꞌa naꞌ no inabdiꞌizh dub taꞌa ndoꞌ bego, ikaꞌab bega‑yá:
4 ¿Ton mtuꞌub Juan ulaleaꞌ Juan be men zha? ¿Dios nate dub men?
5 Leꞌa bexa cha ndabbe ndoꞌ ltsaꞌa na:
—Tal leꞌa beuna gab leꞌa Dios leꞌaka mtuꞌub Juan, leꞌa Jesús inabdiꞌizh ná xtaꞌan lá ngungea ladna beuna xa.
6 Ná tal gab beuna leꞌa Juan dub men mtuꞌub, leꞌa be men ndee ulaꞌgeꞌ beuna gast gat beuna, leꞌa bexa itea mbingea ladna leꞌa Juan dub xa mbidiꞌizh sakndoꞌ Dios.
7 Ta weꞌe cha ukaꞌab bexa ndab bexa ndoꞌ Jesús:
—Leꞌa besa lá iniꞌí ton mtuꞌub Juan.
8 Leꞌa Jesús cha noga ndab:
—Naꞌ noga lá gáp ton ulaxoꞌob naꞌ gun naꞌ be ta ndee.
Dub cuent ten bexa mlaꞌach ya uv
(Mt. 21:33-46; Mr. 12:1-12)
9 Cha mbidiꞌizh Jesús dub taꞌa msaktabeꞌe xa, ndab xa ndoꞌ be men:
—Uyoꞌo dub xabgiꞌi ngos sian ya uv ndoꞌ dub bleꞌa yo siꞌil. Cha mkwaꞌan xa pla be men ulaꞌach sa wa, cha gal zha ite bexa uv usaꞌa ya wa. Leꞌa xa ten yo wa cha ukaꞌan kwenpa.
10 Leꞌa zha na yá ngol tiemp ten uv, cha mtuꞌub xa dub xmos xa yaꞌ ndoꞌ be men nlaꞌach sa wa, yaꞌyoꞌo xa be ta na ndal xwan yo wa. Ná leꞌa be men wa ndi udin mos wa. Cha naꞌan xtaꞌan usaꞌa men wa yoꞌo xa.
11 Leꞌa xwan yo wa cha mtuꞌubgal stub mos. Ná leꞌa bexa ndi uzheꞌeb udingal xa wa, cha naꞌan xtaꞌan usaꞌagal bexa yoꞌo xa.
12 Leꞌa xwan yo wa mtuꞌubgal stub mos. Leꞌa be men wa cha ndi mtsawiꞌi xa, no ulantuꞌub bexa xa.
13 ’Weꞌe leꞌa xwan yo wa cha mbinbeꞌe ndab xa: “¿Xteꞌe gun naꞌ nat? Leꞌa naꞌ utuꞌub xiꞌín naꞌ, xa na nkweaꞌ lad naꞌ. Leꞌa be men wa sapka mod ndoꞌ xa wa.”
14 Ná leꞌa gor na uniꞌí bexa xa, cha ndi ndab bexa ndoꞌ be ltsaꞌa xa: “Leꞌa xa baꞌ leꞌa yaꞌanno yo ndee. Nchaꞌyut beuna xa, cha yaꞌanno beuna‑yá.”
15 Cha uloꞌo bexa xa dub lad toꞌo yo wa, cha mbit bexa xa.
Cha unabdiꞌizh Jesús ndab xa:
—¿Xteꞌe nsak bega zha? ¿Xteꞌe gunno xwan yo wa bexa?
16 Leꞌa xa wa ilen gut bexa wa, cha usaꞌa xa yo wa ndoꞌ be men xaꞌaga ulaꞌach‑a.
Leꞌa gor na mbiꞌín be men ta wa, cha ndab bexa:
—¡Dios nunk lá ulaꞌa yoo ta wa!
17 Leꞌa Jesús cha mwiꞌi ndoꞌ bexa, cha ndab xa:
—¿Lá iniꞌí bega xteꞌe nkeaniꞌi diꞌizh ten Dios zha? Ndab‑a:
Leꞌa geꞌ na mxelad bexa ndandeꞌe niꞌi,
leꞌa ta wa nat nak geꞌ ndon leꞌa nsak nbexan niꞌi.
18 Leꞌa itea bexa na ilayat tsoꞌo geꞌ wa, leꞌa bexa wa syuꞌbe. Leꞌa bexa ilaꞌ geꞌ wa tsoꞌo na, leꞌa bexa wa sachkeꞌe.
19 Bi leꞌa gor wa leꞌa be uleꞌay nibeꞌe no be mech ten ley nlad isen Jesús, geal leꞌa bexa myakbeꞌena leꞌa Jesús li ndab cuent ten bexa. Ná leꞌa bexa nzhebga ndoꞌ be men.
Be men unabdiꞌizh cuent ten med nkix bexa ndoꞌ gobier Roma
(Mt. 22:15-22; Mr. 12:13-17)
20 Cha mtuꞌub bexa wa pla be men cuentta bexa wen nak yaꞌyun preb Jesús, ndontsa gap bexa dub ta usake bexa Jesús ndoꞌ xa na ndon leꞌa nibeꞌe sa wa.
21 Leꞌa bexa wa cha ndab ndoꞌ Jesús:
—Mech, leꞌa besa uniꞌí leꞌa go ndadiꞌizh gealngea. No ni lá nlaꞌach go ta ndab be men, no ni tal xteꞌe nak be men. Leꞌa go ndi wen nluu lak nlad Dios gak be men.
22 Nat gud go, ¿nsabndoꞌ kix beuna med nab César xa nibeꞌe Roma, nate naꞌanpa kix beuna ta wa?
23 Ná leꞌa Jesús mgenlana ta ugap ndanbeꞌe bexa, cha ndab Jesús:
—¿Xtaꞌan ndun bega preb naꞌ zha?
24 Bsaꞌa bega dub med iwiꞌi naꞌ‑yá. ¿Ton gek ná no leaꞌ ná nkea las med ndee zha?
Leꞌa bexa wa cha ukaꞌab ndab:
—Gek César no leaꞌ César.
25 Cha ndab Jesús:
—Bsaꞌa bego be ta ten César ndoꞌ César. Leꞌa ndoꞌ Dios bsaꞌa bego be ta ten Dios.
26 Leꞌa bexa wa ni lá ngun gan ngab Jesús dub ta lid leꞌa nak ndoꞌ gaꞌal be men wa. Ndi ngwanseana bexa xteꞌe ukaꞌab Jesús, cha yá naꞌanta xteꞌe ngab bexa.
Bexa saduceo unabdiꞌizh ná xteꞌe iban be men ngut
(Mt. 22:23-33; Mr. 12:18-27)
27 Weꞌe leꞌa pla bexa saduceo cha ulen wats Jesús. Leꞌa itea bexa saduceo ndangea ladna leꞌa bexa ngut wa yá lá ibantabe. Cha unabdiꞌizh bexa ndoꞌ Jesús,
28 ndab bexa:
—Mech, leꞌa ley mkeꞌa Moisés ndab leꞌa tal ton dub xabgiꞌi gat, ná lá ngap xa xin xa, leꞌa wit xa wa nsabndoꞌ uchilyaꞌano xagots ten xa ngut wa, ndontsa tal gap bexa dub meꞌed leꞌa meꞌed wa gak cuent xin xa ngut wa.
29 Uyoꞌo dub gaꞌad wit xa. Leꞌa xa ned wa mchilyaꞌano dub xagots, cha tsoꞌo wa ngut xa, ni lá ngap xagots wa xin xa.
30 Weꞌe cha mchilyaꞌano wit itop xa wa xagots wa. Leꞌa xabgiꞌi wa cha nogal ngut ni lá ngapgal bexa xin xa.
31 Leꞌa wit yon bexa wa litsagal ngwasea. Li ngwasea isagaꞌad wit bexa wa, ná ni dub xa lá ngap xin na.
32 Tsoꞌo wa leꞌa xagots wa cha noga ngut.
33 Leꞌa zha na iban bexa ngut wa, leꞌa lat bexa wa ¿ton gak xabgiꞌi ten xagots wa zha, xa na li mchilyaꞌano isagaꞌad xabgiꞌi wa?
34 Leꞌa Jesús cha ukaꞌab ndab:
—Leꞌa be men nde ndoꞌ gizhliyo ndee nchilyaꞌano ltsaꞌa na.
35 Parea gal zha na gab Dios ná ton iban ndoꞌ gealgut, leꞌa bexa wa naꞌantapa uchilyaꞌano be ltsaꞌa na zha wa.
36 No ni lá gatta bexa, leꞌa bexa ndi gak cuent be angel ten Dios. No gak bexa xin Dios ta na ubangal bexa.
37 Parea leꞌa cuent ten ta na iban bexa ngut wa, leꞌa Moisés leꞌa mluu leꞌa bexa ngut wa ibankabe, zha na mkeꞌa xa leꞌa dub yagich nsayolꞌ. Leꞌa sa wa ndab‑a leꞌa Dios nak Dios ndankea Abraham, no Isaac, no Jacob.
38 Leꞌa Dios naꞌanpa Dios ten bexa ngut, leꞌa xa ndi Dios ten bexa nban. Ta weꞌe uniꞌí beuna leꞌa bexa wa nbanka. Leꞌa cuent ten Dios leꞌa itea bexa ngutla bi nbankabe.
39 Leꞌa ncho be mech ten ley cha ndab ndoꞌ Jesús:
—Mech, leꞌaka nak ta ndab go.
40 Weꞌe leꞌa be men wa ni lá ngunta rages inabdiꞌizh bexa ndoꞌ Jesús.
¿Xteꞌe ndab David ná ton nak Cristo wa?
(Mt. 22:41-46; Mr. 12:35-37)
41 Weꞌe cha ndab Jesús ndoꞌ bexa wa:
—¿Xtaꞌan ndab be men leꞌa zha ilen Cristo leꞌa xa wa nak xin David?
42 Ná leꞌa David wa leꞌaka mkeꞌa libr ten Salmos, ndab‑a:
Leꞌa Dios Xa Nibeꞌe ndab ndoꞌ Xa Nibeꞌe naꞌ:
“Usob wats naꞌ lad gaꞌal ndee,
43 gast gal gor ute naꞌ bexa ndaklono lu xan ndats lu.”
44 Leꞌa David ndab leꞌa Cristo nak Xa Nibeꞌe ten xa. ¿Ná xteꞌe yoo gan gak Cristo wa xin David zha?
Jesús ndab leꞌa be mech ten ley lid leꞌa ndun
(Mt. 23:1-36; Mr. 12:38-40; Lc. 11:37-54)
45 Leꞌa gor na ndeulaꞌach itea be men wa, leꞌa Jesús cha ndab ndoꞌ be xmen na:
46 —Blaꞌach bego lá gak bega lak nak be mech ten ley, leꞌa bexa ndal ladna ndesea nak lad koꞌol. No nlad bexa utsin inidiꞌizh be men ndoꞌ bexa be ndoꞌ xgeꞌe. No nti bexa be sa mas nsak isob bexa len be niꞌi sa nzhealbe beuna xa judio. No liga ndun bexa sa ndaꞌdaw bexa sa nyoꞌo dub gast.
47 Nsea nlat bexa itea ta ndap be xagots ngut xabgiꞌi ten na. No kwenpa ndadiꞌizhno bexa Dios ndontsa gab men leꞌa xa ndankeaka Dios. Leꞌa naꞌ gáp leꞌa bexa li ndun wa mas uzheꞌeb gealkweaꞌ iniꞌí.