23
Mbiꞌi bexa Jesús ndoꞌ Pilat
(Mt. 27:1-2,11-14; Mr. 15:1-5; Jn. 18:28-38)
1 Leꞌa itea bexa wa cha mbiꞌi Jesús ndoꞌ Pilat.
2 Cha usaxan nsake bexa Jesús, ndab bexa:
—Leꞌa xa ndee nkiꞌil be ltsaꞌa besa bexa judio, ndab xa leꞌa besa lá nsabndoꞌ kix med ndoꞌ César xa nibeꞌe Roma. No ndab xa leꞌa xa nak Cristo, dub xa nibeꞌe.
3 Leꞌa Pilat cha unabdiꞌizh ndab ndoꞌ Jesús:
—¿Lu nak xa nibeꞌe ten bexa judio zha?
Leꞌa Jesús cha ukaꞌab ndab:
—Goka ndab‑a.
4 Leꞌa Pilat cha ndab ndoꞌ be uleꞌay nibeꞌe no ndoꞌ be men kwaꞌad wa:
—Leꞌa naꞌ ni dub ke ten xa ndee lá ngaizheal naꞌ.
5 Ná leꞌa bexa wa ndi mas ugeꞌ ndabbe:
—Leꞌa ta nluu xa baꞌ nchealuyo itea be men, ta usaxan nluu xa Galilea nsea gast Judea ndee.
Pilat mtuꞌub Jesús ndoꞌ Herodes
6 Leꞌa gor na mbiꞌín Pilat ta wa, leꞌa xa cha unabdiꞌizh naga xa Galilea Jesús.
7 Leꞌa gor na mbiꞌín Pilat leꞌa Jesús xa Galilea sa nibeꞌe Herodes, cha mtuꞌub Pilat Jesús ndoꞌ Herodes. Leꞌa Herodes leꞌagala be wizh wa ncho Jerusalén.
8 Leꞌa gor na uniꞌí Herodes Jesús, leꞌa Herodes uzhebpa mten ladna, geal leꞌa xa polta nlad iniꞌí Jesús. Leꞌa xa ndoꞌón ndadiꞌizh be men cuent ten Jesús, no nlad xa iniꞌí xa dub uyon ndun Jesús.
9 Cha uzhebpa sian taꞌa unabdiꞌizh Herodes ndoꞌ Jesús, ná leꞌa Jesús ni lá ikaꞌab.
10 Leꞌa be uleꞌay nibeꞌe nsea be mech ten ley uzhebpa msake Jesús ndoꞌ Herodes.
11 Leꞌa Herodes no be soldad ten na cha kweaꞌ uníꞌi ndoꞌ Jesús, cha usalad mbinno bexa Jesús, mgak bexa xa dub lad uyappa, ta ndak sbeꞌen bexa nibeꞌetsa. Cha leꞌaka ndoꞌ Pilat mtuꞌub Herodes Jesús.
12 Leꞌa wizh wa mzhealdiꞌizh Pilat no Herodes, leꞌa mas polta leꞌa bexa nyobe.
Pilat myun cuent Jesús gat Jesús
(Mt. 27:15-26; Mr. 15:6-15; Jn. 18:38—19:16)
13 Leꞌa Pilat cha mchealte be uleꞌay nibeꞌe, no bexa nsak, no kwaꞌadta be men gezh wa.
14 Cha ndab Pilat ndoꞌ bexa:
—Leꞌa bego myun cuent mgiꞌi ndee ndoꞌ naꞌ, ndab bega leꞌa xa nchealuyo be men. Parea leꞌa bega ndewiꞌi leꞌa naꞌ unabdiꞌizh ndoꞌ xa, ná leꞌa xa lá ngun ni dub ta na lbaꞌa nsake bega xa.
15 No ni Herodes lá ngaizheal ke ten xa, ta weꞌe mtuꞌub Herodes xa leꞌaka sa ndee. Leꞌa bega uniꞌí leꞌa xa ndee ni dub ke gat xa lá ndap xa.
16 Nat leꞌa naꞌ utsaksitsa xa, weꞌeta ula naꞌ xa.
17 Li ndab Pilat geal leꞌa itea liꞌin zha ndal ujest wa, leꞌa Pilat ngoꞌo dub men nkea litgiꞌib.
18 Ná leꞌa be men ndi iteanak ugeꞌ ndabbe:
—¡Gat Jesús! ¡Blaꞌa ga Barrabás!
19 Leꞌa Barrabás wa nkea litgiꞌib ke na uteyono xa bexa nibeꞌe Jerusalén wa, no mbit xa dub men.
20 Leꞌa Pilat nlad ulaꞌa Jesús, cha ndabgal xa ta wa ndoꞌ be men.
21 Ná leꞌa be men wa ugeꞌgal ndab:
—¡Ikea xa ndoꞌ cruz! ¡Ikea xa ndoꞌ cruz!
22 Leꞌa Pilat cha ndabgal biaj yon:
—Leꞌa xa ndee naꞌan xtaꞌan dub ta ugap ngun. Ni dub ke gat xa lá ndap xa. Leꞌa naꞌ utsaksitsa xa, weꞌeta ula naꞌ xa.
23 Ná leꞌa be men wa no be uleꞌay nibeꞌe ndi mas ugeꞌ ndabbe ikea Jesús ndoꞌ cruz. Kwenpa li ndab bexa gast plo mbinka bexa gan.
24 Weꞌe leꞌa Pilat ndab sunka ta ndab be men wa.
25 Cha mgoꞌo xa dub xa na li ndab be men itoꞌo wa, xa na li nkea litgiꞌib ke na mbit xa dub men, no uteyono xa bexa nibeꞌe wa. Cha myun Pilat cuent Jesús ndoꞌ bexa ukeꞌa bexa xa ndoꞌ cruz, lak nlad be men wa.
Mkeꞌa bexa Jesús ndoꞌ cruz
(Mt. 27:32-44; Mr. 15:21-32; Jn. 19:17-27)
26 Leꞌa nes nchaꞌano be soldad Jesús, mzheꞌal bexa dub xabgiꞌi ngwaꞌ geꞌe, xa nsaleaꞌ Simón xa gezh Cirene. Cha mbin bexa juers goꞌo Simón cruz ten Jesús, cha mxoꞌob bexa‑yá tsoꞌo xa, nchaꞌnkea xa tsoꞌo Jesús.
27 No kwaꞌad be men usankea tsoꞌo Jesús, nsea lat bexa wa nchaꞌa kwaꞌad be xagots ugeꞌ ndoꞌonno Jesús.
28 Leꞌa Jesús cha mgeaksoꞌ mwiꞌi ndoꞌ be xagots wa, cha ndab xa:
—Bego xagots Jerusalén, lá goꞌonno bega naꞌ, ndi biꞌinno bega leꞌaka leꞌa bega no be xin bega.
29 Leꞌa gal be wizh leꞌa be men gab: “Uzhebpa wen yoo be xagots lá yoꞌo gan gap meꞌed, no bexa lá yoxinna, no bexa lá ngungaꞌal meꞌed.”
30 Leꞌa be wizh weꞌe gab be men ndoꞌ be geꞌe ubiꞌi baꞌ: “Ulayat bega tsoꞌo besa”, no gab bexa ndoꞌ be bet: “Ulate bega tsoꞌo besa.”
31 Leꞌa bexa lndeꞌe ndanno naꞌ, ná naꞌ ni dub ke lá ndap, mata bexa ndap ke wa mas gealkweaꞌ iniꞌí.
32 Leꞌa be soldad wa mbiꞌi no stop bexa ugap ikea ndoꞌ cruz wats Jesús.
33 Leꞌa gor na ulayaꞌ bexa sa nsaleaꞌ tit gek men, cha mkeꞌa bexa Jesús ndoꞌ cruz. Cha mkeꞌa bexa dub xa ugap wa ndoꞌ cruz wats Jesús lad gaꞌal, leꞌa stub xa wa wats lad raves.
34 Leꞌa Jesús cha ndab:
—Dios Xus naꞌ, bingeꞌ ladna go ndoꞌ be men ndee, leꞌa bexa ka lá iniꞌí xtaꞌan ndunbe.
Cha uloꞌo be soldad dub suert ndontsa iniꞌí bexa ná tonpa ikaꞌa be xab Jesús.
35 Leꞌa kwaꞌad be men ndewiꞌi sa wa. Leꞌa bexa nsak ten bexa judio xela ndeníꞌi ndoꞌ Jesús, ndab bexa ndoꞌ be ltsaꞌa bexa:
—Leꞌa xa baꞌ ngokno be men, nat ulat xa leꞌaka xa ndoꞌ gealgut, tal leꞌa xa ta ugeaka leꞌa nak Cristo xa na mti Dios.
36 Leꞌa be soldad no xela uníꞌibe ndoꞌ Jesús. No msaꞌa bexa vin ulaꞌ goo xa.
37 Ndab bexa ndoꞌ Jesús:
—Tal lu leꞌa nak xa nibeꞌe ten bexa judio, nat blat leꞌaka lu.
38 Leꞌa gek cruz ten Jesús mkeꞌa bexa dub letr ndab‑a: “TA NDEE XA NIBEꞌE TEN BEXA JUDIO.” Leꞌa ta wa nkea diꞌizh griego, no diꞌizh latín, no diꞌizh hebreo.
39 Leꞌa dub xa ugap no nkea ndoꞌ cruz no xela uníꞌi ndoꞌ Jesús, ndab xa:
—Tal lu nak Cristo, ulaꞌ ndoꞌ cruz baꞌ, cha uxeꞌe besa ndoꞌ be cruz ndee.
40 Ná leꞌa stub xa ugap wa cha uteyo xa na li ndab wa, ndab xa:
—Lbaꞌa ntsaksi bexa lu, ¿ná lá nzheb lu ndoꞌ Dios zha?
41 Leꞌa wa nsabndoꞌka ndeniꞌí gealkweaꞌ ndee, leꞌa wa ndekix ta ugap mbin wa. Parea leꞌa xa ndee ni dub ta ugap lá ngun.
42 Cha no ndab xa ndoꞌ Jesús:
—Jesús, utseꞌa ladna go naꞌ gor na isaxan inibeꞌe ga.
43 Leꞌa Jesús cha ukaꞌab ndab:
—Leꞌa naꞌ gáp leꞌa wizh nat leꞌa lu no yoꞌono naꞌ gibeꞌa.
Jesús ngut ndoꞌ cruz
(Mt. 27:45-56; Mr. 15:33-41; Jn. 19:28-30)
44 Leꞌa ngol gor gawizh cha mkaw idub ndoꞌ gizhliyo, gast gor nkea uyon uzhe.
45 Leꞌa be gor wa leꞌa wizh yá lá nluꞌuta. Cha usaw lad utaꞌa ncho bseꞌa len niꞌi ten Dios, ngok top bleꞌa‑yá.
46 Weꞌe leꞌa Jesús ugeꞌ ndab:
—Dios Xus naꞌ, ndoꞌ yaꞌa ga uchan naꞌ gealnaban ten naꞌ.
Cha ngut xa.
47 Leꞌa gor uniꞌí xa nibeꞌe ten be soldad ta uyoꞌo wa, cha ndab xa:
—Leꞌa Dios uzhebpa dub Dios siꞌil. Ta ugeaka leꞌa xabgiꞌi ndee dub xa wenka.
48 Leꞌa itea be men nde sa wa, bexa na li uniꞌí be ta uyoꞌo wa, cha nseaꞌbe bexa uzheꞌeb kweaꞌ ncho ladna bexa.
49 Naꞌ leꞌa bexa na nchandoꞌ Jesús sittsa ndewiꞌibe, no liga be xagots na li usankea tsoꞌo Jesús zha utoꞌo bexa Galilea.
Jesús mgaꞌach
(Mt. 27:57-61; Mr. 15:42-47; Jn. 19:38-42)
50 Uyoꞌo dub xabgiꞌi nsaleaꞌ Kosé xa gezh Arimatea ten distrit Judea. Leꞌa xa wa dub xa nsak ten bexa judio, dub xa wen nak ndoꞌ be men no ndoꞌ Dios.
51 No nkenkeaꞌ xa zha inibeꞌe Dios ndoꞌ gizhliyo. No naꞌanpa isak ladna xa ta mbinno be ltsaꞌa xa Jesús, bexa nsak ten bexa judio.
52 Weꞌe cha ngwaꞌ xa ndoꞌ Pilat unab xa Jesús.
53 Cha uxeꞌe xa Jesús ndoꞌ cruz, cha mtixko xa xa ngut wa dub bleꞌa lad nagud. Cha ulo xa xa wa len dub baꞌa cuent nak geꞌloꞌo len dub geꞌdaꞌa, dub sa ni dub men gol gaꞌach.
54 Leꞌa ta wa wizh nsaxkwaꞌa bexa judio ta guntiꞌin bexa wizh neꞌe bexa. Leꞌa gor mgaꞌach Jesús dub gor uzhe yamer yatsoꞌ wizh wa.
55 Leꞌa be xagots na ukeseano Jesús zha na utoꞌo bexa Galilea usankea tsoꞌo Kosé, cha uniꞌí bexa pa nde baꞌa sa mgaꞌach Jesús.
56 Cha nseaꞌ bexa leꞌaka gezh Jerusalén, cha msaxkwaꞌa bexa be ta uxeꞌe yaꞌlo bexa las Jesús. Cha mneꞌe bexa dub wizh lak nibeꞌe ley ten bexa.