12
Be xmen Jesús uxeꞌe bid ten trig wizh neꞌe bexa
(Mr. 2:23-28; Lc. 6:1-5)
1 Leꞌa ngol dub wizh neꞌe be men, leꞌa Jesús nchaꞌtid sa nax dub bleꞌa yo ncho trig. Leꞌa be xmen Jesús ndannabe, ta weꞌe cha uxeꞌe bexa pla be bid ten trig, cha udaw bexa‑yá.
2 Leꞌa ncho bexa fariseo uniꞌí ta wa, cha ndab bexa ndoꞌ Jesús:
—Bwiꞌi go ná xtaꞌan ndun be xmen go, ta lá nsabndoꞌ gun bexa wizh neꞌe beuna.
3 Ná leꞌa Jesús cha ukaꞌab ndab:
—¿Ni lá ndoꞌol bega sa ndab diꞌizh ten Dios ta mbin David dub biaj zha na uzhebpa ndanna xa no bexa ndeseano xa zha?
4 Leꞌa David uyoꞌo len niꞌilad ten Dios, cha udaw xa be pan leꞌay, ta lá nsabndoꞌ gaw xa no bexa ndeno xa, nab be uleꞌay ndaw‑a.
5 ¿No ni lá ndoꞌol bega ndoꞌ ley ten Dios leꞌa be uleꞌay wa ndun tiꞌin len niꞌi ten Dios wizh neꞌe be men, ná leꞌa ta wa naꞌanpa dub ke?
6 Leꞌa naꞌ gáp ndoꞌ bega leꞌa sa ndee nat nchola dub xa mas nsak ndoꞌ niꞌi ten Dios wa.
7 Leꞌa diꞌizh ten Dios nkeaniꞌi ndab Dios: “Leꞌa naꞌ mas nlad ikweaꞌ ladna bega men, ndoꞌ lak nlad naꞌ usaꞌa bega xnab ndoꞌ naꞌ.” Tal leꞌa bega yakbeꞌena ta ndee wa, leꞌa bega lá gab ugap ndun bexa ndee, dub ta naꞌanpa dub ke.
8 Leꞌa naꞌ, Xa Myak Men Ndoꞌ Gizhliyo, noga nibeꞌe wizh neꞌe be men.
Jesús myunyakna dub xabgiꞌi ubidya dub yaꞌa na
(Mr. 3:1-6; Lc. 6:6-11)
9 Cha nchaꞌa Jesús uyoꞌo xa len niꞌi sa nzhealbe bexa judio gezh wa.
10 Leꞌa sa wa nsob dub xabgiꞌi ubidya dub yaꞌa na. Leꞌa bexa fariseo nkwaꞌan ná xteꞌe usake bexa Jesús, cha unabdiꞌizh bexa ndoꞌ Jesús, ndab bexa:
—¿Syoꞌo gan yunyakna men dub xa gizh wizh neꞌe beuna zha?
11 Leꞌa Jesús cha ukaꞌab ndab:
—Tal leꞌa dub bega ndap dub borreg, cha ulaꞌyoꞌo ma len dub geꞌed wat wizh neꞌe beuna, ¿lid yaꞌloꞌo bega ma leꞌaka wizh wa zha?
12 ¿Lá iniꞌí bega zha leꞌa dub men uzhebpa mas nsak ndoꞌ dub borreg? Ta weꞌe leꞌa beuna syoꞌoka gan gakno stub xa be wizh neꞌe beuna.
13 Cha ndab Jesús ndoꞌ xa gizh dub yaꞌa na wa:
—Bkea yaꞌa lu.
Leꞌa xa wa cha mkea yaꞌa na, cha uxax myakna‑yá lak nak stub‑a.
14 Cha nseaꞌbe bexa fariseo, mzhealbe bexa mbidiꞌizh bexa xteꞌe gun bexa gan gat Jesús.
Jesús nak xa mti Dios gun tiꞌin ten Dios
15 Leꞌa Jesús mgenna ta li nlad bexa gun bexa wa, ta weꞌe cha mkaꞌan xa sa wa. No kwaꞌad be men usankea tsoꞌo xa, cha myunyakna xa itea bexa gizh wa.
16 No uzhebpa ndab Jesús ndoꞌ bexa lá gudiꞌizh bexa ton myunyakna bexa.
17 Leꞌa ta wa ngok lak ndab profet Isaías polta, ndab Dios:
18 Bwiꞌi bego leꞌa xa ndee xa ndun tiꞌin ndoꞌ naꞌ,
leꞌa naꞌ mti xa no nkweaꞌ lad naꞌ xa
no ntenno lad naꞌ xa.
Usa naꞌ Espíritu ten naꞌ yoo len ladoꞌo xa,
leꞌa xa gudiꞌizh ndoꞌ be men,
gab xa xteꞌe wen yaꞌan bexa ndoꞌ naꞌ.
19 Leꞌa xa ni lá kuyotoꞌo, no ni lá kwezhat xa;
No ni naꞌanpa igen ti xa be nes.
20 Leꞌa xa wa bchaꞌan gak ndoꞌ bexa kweaꞌ ncho ladna,
bexa nak cuent dub xos ya yamer gach,
no cuent nak dub bealꞌ ndidotsa nsayolꞌ.
Li utsin gak xa ndoꞌ bexa wa gast gal wizh gun xa gan
leꞌa be men wa wen yaꞌan ndoꞌ Dios.
21 No idub ndoꞌ gizhliyo igeꞌ ladna be men xa.
Ndab be men leꞌa Jesús ndap juers ten maxuꞌu
(Mr. 3:19-30; Lc. 11:14-23; 12:10)
22 Weꞌe leꞌa be men cha ulenno dub xabgiꞌi gizh wats Jesús. Leꞌa mbi bxin ncho len ladoꞌo xa wa mbin mud xa no lá naꞌ xa. Leꞌa Jesús cha myunyakna xa ndontsa naꞌ xa no níꞌi xa.
23 Leꞌa be men wa ngwatenaꞌbe, ndab bexa ndoꞌ be ltsaꞌa xa:
—¿Syoꞌo gan gak xa ndee xin David xa ndiꞌizh utuꞌubka Dios zha?
24 Ná leꞌa gor na mbiꞌín bexa fariseo ta wa, cha ndab bexa ndoꞌ be ltsaꞌa xa:
—Leꞌa Jesús ngontuꞌub be mbi bxin len ladoꞌo be men juers ten Beelzebú, maxuꞌu nibeꞌe be mbi bxin.
25 Leꞌa Jesús cha mgenna xteꞌe ndanbeꞌe bexa, cha ndab Jesús:
—Tal leꞌa be xmen dub xa nibeꞌe iteltsaꞌabe, cha bi leꞌakaga bexa kuyo, weꞌe leꞌa bexa wa yá naꞌantapa gak juertbe. No tal leꞌa be men ncho dub gezh natal dubtsa niꞌi bi leꞌaka kuyobe, leꞌa juers ten bexa idub.
26 No liga tal leꞌa maxuꞌu kuyono leꞌaka be mbi bxin ten na, weꞌe leꞌa maxuꞌu wa no be mbi bxin wa iteltsaꞌabe, cha idub juers ten maxuꞌu.
27 Ndab bega leꞌa naꞌ ngontuꞌub be mbi bxin juers ten Beelzebú. ¿Ná ton nsaꞌa juers ngontuꞌub be xmen bega be mbi bxin wa zha? Ta weꞌe leꞌa ta na ndun be xmen bega wa leꞌa nluu leꞌa bega naꞌanpa utsin ndanbeꞌe.
28 Ná leꞌa naꞌ ngontuꞌub be mbi bxin juers ten Espíritu ten Dios, ta na nluu leꞌa Dios yá ngol tiemp inibeꞌe len ladoꞌo be men.
29 ’¿No xteꞌema yoo gan yate dub men len lid dub xabgiꞌi juert, kowaꞌan xa be ta ncho sa wa, tal men wa lid ned uxi xa juert wa zha? Lima syoꞌo gan kowaꞌan xa be taꞌa len lid xa juert wa.
30 ’Leꞌa tal ton lá nsak ladna be ta ndun naꞌ, leꞌa xa wa ndakloo ndoꞌ naꞌ. No liga leꞌa tal ton naꞌanpa ndakno naꞌ nyakjunt be men ndoꞌ Dios, leꞌa xa wa ndi ndun nsasit be men wats Dios.
31 ’Leꞌa naꞌ gáp ndoꞌ bego leꞌa itea be ta ugap ndun be men no itea be ta kweaꞌ níꞌi bexa, leꞌa ta wa dub ke syoꞌoka gan gungeꞌ ladna Dios. Ná leꞌa tal ton inisi Espíritu ten Dios, weꞌe leꞌa Dios lá gungeꞌ ladna ke wa.
32 Leꞌa tal ton inisi naꞌ ndee, Xa Myak Men Ndoꞌ Gizhliyo, leꞌa ke weꞌe syoꞌoka gan yuꞌu. Ná leꞌa tal ton inisi Espíritu ten Dios, leꞌa ke weꞌe yá lá yuꞌuta, ni tiemp ndee no ni tiemp ilen wa.
Be ngus ten dub ya nluu xá ya na‑yá
(Lc. 6:43-45)
33 ’Leꞌa dub ya wen nsaꞌa sbeꞌen ngus wen. No dub ya naꞌanpa wen nsaꞌa sbeꞌen ngus lá yoo gan gaw men. Leꞌa be ngus ten dub ya nluu xá ya na‑yá.
34 ¡Leꞌa bego xa ugap cuent be uzhib! ¿Xteꞌema yoo gan gudiꞌizh bega be ta wen zha, ná bega bexa ugap? Leꞌa ta na ncho ladoꞌo dub men, ta weꞌetsa ndadiꞌizh xa.
35 Leꞌa be men wen wa ndadiꞌizh ta wen, lak ta wen ncho ladoꞌo xa. No liga leꞌa bexa ugap ndadiꞌizh be ta ugap, lak ta ugap ncho ladoꞌo xa.
36 Leꞌa naꞌ gáp leꞌa gal wizh gab Dios ná ton ndap ke, leꞌa itea be men isoꞌ ndoꞌ Dios gab bexa ná xtaꞌan mbidiꞌizh bexa itea be diꞌizh ugap.
37 Tal leꞌa bega ndadiꞌizh ta wen, weꞌe leꞌa Dios gab leꞌa bega naꞌanpa ndap ke. Ná tal leꞌa bega ndadiꞌizh ta ugap, weꞌe leꞌa Dios gab leꞌa bega ndapka ke.
Bexa fariseo unab dub ta uluu ton nak Jesús
(Mr. 8:12; Lc. 11:29-32)
38 Weꞌe ncho bexa fariseo no be mech ten ley ukaꞌab ndab ndoꞌ Jesús:
—Mech, leꞌa besa nlad gun go dub ta uluu leꞌa go Dioska mtuꞌub.
39 Leꞌa Jesús cha ukaꞌab ndab:
—Leꞌa be men ncho nat uzhebpa be men ugap no ndankea bexa be ta naꞌanpa ta ugeapa nak Dios. Unab bega gun naꞌ dub ta uluu na ton nak naꞌ, parea leꞌa naꞌ lá gun ta unab bega wa. Ndi iniꞌítsa bega leꞌa naꞌ itiꞌid ltsaꞌa ta utid Jonás, xa mbidiꞌizh sakndoꞌ Dios tiemp polta.
40 Lak uyoꞌo Jonás len dub mbeal siꞌil chon wizh no chon teꞌal, no liga leꞌa naꞌ, Xa Myak Men Ndoꞌ Gizhliyo, yoo len yo chon wizh no chon teꞌal.
41 ’Leꞌa gal wizh na gab Dios ná ton ndap ke, weꞌe leꞌa bexa uyoꞌo gezh Nínive wa gab leꞌa be men ncho nat ndee ugap nak. Leꞌa bexa Nínive mlaꞌa be ta ugap nak bexa, gor na mbiꞌín bexa diꞌizh ten Dios ta mbidiꞌizh Jonás. Ná leꞌa sa ndee nsoꞌ dub xa mas nsak ndoꞌ Jonás.
42 No gal wizh wa leꞌa xagots unibeꞌe be men lad sur isoꞌ, gab xa leꞌa bega ndee ndapka ke. Leꞌa xa wa uzhebpa sit utoꞌo ndontsa mbidyoꞌón xa ta mbidiꞌizh Salomón, be ta uzheꞌeb ngók xa. Leꞌa sa ndee nsoꞌ dub xa mas nsak ndoꞌ Salomón wa, ná leꞌa bega lá nsakyoꞌón ta ndab xa.
Be mbi bxin nyach leꞌaka ladoꞌo dub men
(Lc. 11:24-26)
43 ’Leꞌa gor na ntoꞌo dub mbi bxin len ladoꞌo dub men, leꞌa ta wa cha nchaꞌa sa naꞌan men, nchaꞌkwaꞌan ná pa yoo na. Ná leꞌa gor na lá izheal pa yoo mbi bxin wa,
44 cha ndab mbi bxin wa: “Nsea naꞌ leꞌaka ta lid naꞌ sa utoꞌo naꞌ.” Leꞌa gor mtanseaꞌ mbi bxin wa, leꞌa ladoꞌo men wa cuent dub niꞌi tach, ndon umbiꞌi nak‑a no chul nsaxkwaꞌa‑yá.
45 Weꞌe leꞌa mbi bxin wa cha nchaꞌgiꞌi stub sgaꞌad be mbi bxin mas ugap nak, cha yoo be mbi bxin wa ladoꞌo men wa. Cha mas kweaꞌ yoo xa ndoꞌ lak zha ned wa. No liga yasea be men ugap ncho tiemp nat.
Xnaꞌa Jesús no be wit xa nlad iniꞌí xa
(Mr. 3:31-35; Lc. 8:19-21)
46 Bi li nsoꞌyadiꞌizh Jesús ndoꞌ be men, leꞌa xnaꞌa Jesús no be wit xa ulayaꞌ sa wa. Ndebe bexa tsoꞌo juer, nlad bexa gudiꞌizhno bexa Jesús.
47 Leꞌa dub men cha ndab ndoꞌ Jesús:
—Unaꞌ go leꞌa xnaꞌa go no be wit ga ndebe tsoꞌo juer ndee nlad gudiꞌizhno ga.
48 Leꞌa Jesús cha ukaꞌab ndab ndoꞌ xa wa:
—Leꞌa naꞌ gáp ndoꞌ go ná ton xa na ta ugeaka nak xnaꞌa naꞌ nsea be wit naꞌ.
49 Cha mluyaꞌa Jesús be xmen xa ndab xa:
—Leꞌa bexa nde ndee nak xnaꞌa naꞌ no be wit naꞌ.
50 Leꞌa itea bexa ndun lak nlad Xus naꞌ xa nsob gibeꞌa, bexa weꞌe nak wit naꞌ no bsan naꞌ no xnaꞌa naꞌ.