14
Xteꞌe ngut Juan xa ulaleaꞌ be men
(Mr. 6:14-29; Lc. 9:7-9)
1 Leꞌa tiemp weꞌe leꞌa Herodes xa nibeꞌe sa wa mbiꞌín be ta ndun Jesús.
2 Cha ndab Herodes ndoꞌ bexa ndun tiꞌin ndoꞌ xa:
—Leꞌa Jesús wa leꞌa nak Juan xa ulaleaꞌ be men wa mbangal ndoꞌ gealgut. Ta weꞌe ndap xa juers ndun xa be uyon wa.
3 Leꞌa mas polta leꞌa Herodes unibeꞌe ndoꞌ be xmen na isen bexa Juan, cha uxi bexa Juan caden, no ukeꞌa bexa Juan litgiꞌib. Li mbin xa ke ten Herodías xagots ten Julip wit Herodes,
4 geal leꞌa Juan ndabla ndoꞌ Herodes:
—Naꞌanpa utsin nak‑a ukaꞌa lu Herodías.
5 Ta weꞌe leꞌa Herodes nlad gut Juan, parea leꞌa xa nzheb ndoꞌ be men leꞌa bexa itea ndab leꞌa Juan dub xa ndadiꞌizh sakndoꞌ Dios.
6 Leꞌa ngol dub wizh ngol leaꞌ Herodes, leꞌa xa ulo dub gast. Leꞌa sa wa utoꞌo xingots Herodías mbilndats xa ndoꞌ gaꞌal bexa nde ndoꞌ gast wa. Leꞌa Herodes cha uzhebpa ngol ladna xteꞌe mbilndats nagots wa,
7 cha ndab Herodes ndoꞌ xa:
—Nsobwiꞌi Dios usa naꞌ guniꞌi xtaꞌan inab lu.
8 Leꞌa nagots wa cha ndab ndoꞌ Herodes lak ndabla xnaꞌa na wa:
—Nat bsaꞌa ga gek Juan xa ulaleaꞌ be men, ixoꞌob‑a ndoꞌ dub plat.
9 Weꞌe leꞌa Herodes cha uban myoꞌo ladna. Parea ke na ndab xa leꞌa Dios nsobwiꞌi no ke na mbiꞌín be men nde ndoꞌ mes ta ndab xa wa, ta weꞌe unibeꞌe xa ndoꞌ be xmen xa usaꞌa bexa gek Juan,
10 ndab xa yaꞌlabtoꞌog bexa gen Juan len litgiꞌib.
11 Cha myoꞌo bexa gek Juan uxoꞌob‑a ndoꞌ dub plat, cha msaꞌa xa‑yá ndoꞌ nagots wa. Leꞌa xa wa cha ngwaꞌusaꞌa‑yá ndoꞌ xnaꞌa na.
12 Leꞌa be xmen Juan cha ulen, cha mbiꞌi bexa Juan mkaꞌach bexa xa. Cha ngwaꞌyab bexa‑yá ndoꞌ Jesús.
Jesús mgaw dub gaꞌay mil xabgiꞌi
(Mr. 6:30-44; Lc. 9:10-17; Jn. 6:1-14)
13 Leꞌa gor na mbiꞌín Jesús ta wa, cha ukea xa ndoꞌ dub barco nchaꞌa xa dub sa naꞌan men. Ná leꞌa gor na mbiꞌín be men pa nchaꞌa Jesús, cha utoꞌo bexa be gezh nchaꞌa ndats bexa sa nchaꞌa Jesús.
14 Leꞌa sa wa leꞌa gor ulaꞌ Jesús ndoꞌ barco wa cha uniꞌí xa kwaꞌad be men wa, cha mlats ladna xa bexa. Cha myunyakna xa be men gizh nde lat bexa wa.
15 Leꞌa ngol gor uzhelapa leꞌa be xmen Jesús cha ubii wats Jesús, cha ndab bexa:
—Leꞌa sa ndee dub sa naꞌanpa ncho men, no nat yá uzhela. Gud go ndoꞌ bexa kwaꞌad baꞌ yaꞌisiꞌi bexa ta gaw bexa be gezh baꞌ.
16 Leꞌa Jesús cha ndab:
—Naꞌanpa juerska yaꞌbe bexa. Ndi bsaꞌa bego ta gaw bexa.
17 Leꞌa be xmen Jesús cha ndab:
—Leꞌa besa ndap sgaꞌaytsa pan no stoptsa mbeal.
18 Leꞌa Jesús cha ndab:
—Utseano bega‑yá sa ndee.
19 Cha ndab xa ndoꞌ be men kwaꞌad wa kwe bexa ndoꞌ gixgi. Cha usen xa isagaꞌay pan wa no itop mbeal wa, cha mwiꞌi xa gibeꞌa msaꞌa xa xno ndoꞌ Dios. Cha uleꞌa xa be pan sian bleꞌa, cha msaꞌa xa‑yá ndoꞌ be xmen xa. Leꞌa bexa cha mtseꞌa‑yá ndoꞌ be men.
20 Leꞌa itea bexa wa udaw gast plo mzhea bexa. Leꞌa be xmen Jesús cha mteleꞌe stibtop zhum byux be ta myaꞌan sobr wa.
21 Leꞌa lat bexa li udaw wa pa dub gaꞌay mil xabgiꞌi, parea naꞌanpa igaꞌab be xagots no be meꞌed.
Jesús usea ndoꞌ nits
(Mr. 6:45-52; Jn. 6:15-21)
22 Cha ndab Jesús ndoꞌ be xmen na:
—Bkea bega leꞌaka ndoꞌ barco baꞌ, cha waꞌned bega ndoꞌ naꞌ stub toꞌo nits baꞌ.
Ndalen wa leꞌa Jesús ndab ndoꞌ be men kwaꞌad wa yaꞌbe bexa.
23 Leꞌa gor na yá nseaꞌbe be men wa, leꞌa Jesús nab ukea dub bet ngwaꞌyadiꞌizhno Dios. Leꞌa gor na nseala teꞌal leꞌa Jesús nab nsoꞌ sa wa.
24 Leꞌa gor weꞌe leꞌa barco sitla nchaꞌa tol‑la ndoꞌ nits. Leꞌa be golp ten nits uzhebpa nkeꞌa las barco, no leꞌa mbi uzhebpa nlen ndoꞌ nits lad ndoꞌ barco.
25 Ngol gor yamer gat xeꞌa, leꞌa Jesús nchasea ndats ndoꞌ nits, nchaꞌbii xa sa nchaꞌbe bexa wa.
26 Leꞌa be xmen Jesús cha uniꞌí xa nsea xa ndoꞌ nits, cha mzheb bexa no ugeꞌ ndab bexa:
—¡Leꞌa ta baꞌ dub ta uxin!
27 Ná leꞌa Jesús cha ndab ndoꞌ bexa:
—¡Gop bega valor! ¡No lá izheb bega! Leꞌa ta ndee naꞌka.
28 Leꞌa Pedr cha ukaꞌab ndab:
—Señor, tal leꞌa go Jesús, unibeꞌe ga gal naꞌ wats ga ndoꞌ nits baꞌ.
29 Leꞌa Jesús cha ndab ndoꞌ xa:
—¡Utsea!
Leꞌa Pedr cha ulaꞌ ndoꞌ barco nchasea ndats ndoꞌ nits, nchaꞌa xa wats Jesús.
30 Parea ngol gor uniꞌí Pedr lita nsoꞌ mbi siꞌil wa, cha mzheb xa. Cha usaxan nchaꞌlayoꞌo xa len nits. Cha utezhat xa ndab xa ndoꞌ Jesús:
—¡Señor, utsealoꞌo ga naꞌ!
31 Cha bi leꞌa gor wa leꞌa Jesús cha mkea yaꞌa na, cha usen xa yaꞌa Pedr. Cha ndab Jesús ndoꞌ xa:
—¡Ndidotsa ngeꞌ ladna lu naꞌ! ¿Xtaꞌan lá ndangea ladna lu naꞌ zha?
32 Leꞌa gor na ukea Jesús no Pedr ndoꞌ barco wa, leꞌa mbi wa cha uleas.
33 Weꞌe leꞌa bexa nde ndoꞌ barco cha ngwankea Jesús, ndab bexa:
—Ta ugeaka leꞌa go nak Xin Dios.
Jesús myunyakna bexa gizh sa nsaleaꞌ Genesaret
(Mr. 6:53-56)
34 Leꞌa bexa cha utakea ndoꞌ nits wa, ulayaꞌ bexa sa nsaleaꞌ Genesaret.
35 Leꞌa gor uniꞌí be men leꞌa Jesús nkesea sa wa, cha mtuꞌub bexa men ngwaꞌyab‑a ndoꞌ bexa ncho idub gangeak sa wa. Weꞌe cha ulenno be men itea bexa gizh wats Jesús.
36 Cha unab bexa ulaꞌa xa masa ndats xab xa ugal bexa gizh wa. Leꞌa itea bexa na li ngal xab Jesús wa cha myaknabe.