17
Jesús mtixndoꞌ
(Mr. 9:2-13; Lc. 9:28-36)
1 Ngol sxoꞌop wizh leꞌa Jesús mbiꞌi Pedr no Jacob no Juan wit Jacob, ukea bexa dub bet gaꞌap sa naꞌan men.
2 Leꞌa sa wa leꞌa Jesús mtixndoꞌ ndoꞌ gaꞌal bexa wa, leꞌa ndoꞌ Jesús myak cuent xeꞌa wizh no xab xa ndon mbe mnaꞌ cuent xeꞌa.
3 Zha leꞌa sa wa mlundoꞌ Moisés no Elí ndeyadiꞌizhno Jesús.
4 Weꞌe leꞌa Pedr cha ndab ndoꞌ Jesús:
—Señor, uzhebpa wen nde beuna sa ndee. Tal go nlad gundeꞌe besa chon ramad: dub‑a ná ten go, leꞌa stub‑a ná ten Moisés, nsea stub‑a ná ten Elí.
5 Ndalen li nsoꞌyadiꞌizh Pedr, cha ulen dub xkaw msu xeꞌa idub sa ndebe bexa. Leꞌa lat xkaw wa mgen ti Dios ndab:
—Leꞌa ta ndee Xiꞌín naꞌ. Leꞌa naꞌ nkweaꞌ ladna xa no ntenno lad naꞌ xa. Bsakyoꞌón bega ta ndab xa.
6 Leꞌa gor na mbiꞌín be xmen Jesús ta wa, cha msaxib bexa gast ndoꞌ yo ngol xtuzh bexa, no uzhebpa mzheb bexa.
7 Leꞌa Jesús cha ubii gax wats bexa, cha mgal Jesús gek bexa, cha ndab xa:
—Gosoꞌ bega, lá izhebta bega.
8 Leꞌa gor na mwiꞌi bexa yá naꞌanla ton ndebe sa wa. Leꞌa Jesús nabla nsoꞌ.
9 Leꞌa gor na nchaꞌlayoꞌo bexa bet wa, leꞌa Jesús ndab ndoꞌ bexa:
—Naꞌan ton ndoꞌ ná gudiꞌizh bega ta li uniꞌí bega wa, gast gor ibangal naꞌ, Xa Myak Men Ndoꞌ Gizhliyo.
10 Leꞌa bexa wa cha unabdiꞌizh ndoꞌ Jesús ndab:
—¿Xtaꞌan ndab be mech ten ley leꞌa Elí ned ilen, weꞌeta ilen Cristo xa utuꞌub Dios zha?
11 Leꞌa Jesús cha ukaꞌab ndab:
—Ta ugeaka leꞌa Elí nedka ilen ndontsa list kwe be men.
12 Leꞌa naꞌ gáp ndoꞌ bego, leꞌa Elí wa mbiꞌidla. Ná leꞌa be men lá igondoꞌ xa, ndi ugap mbinno bexa xa lakta nlad bexa. No liga gunno bexa naꞌ, Xa Myak Men Ndoꞌ Gizhliyo.
13 Weꞌe leꞌa be xmen Jesús myakbeꞌena leꞌa Jesús mbidiꞌizh cuent ten Juan xa ulaleaꞌ be men.
Jesús myunyakna dub meꞌed bgiꞌi nsak gizhkaw
(Mr. 9:14-29; Lc. 9:37-43)
14 Leꞌa gor na mlaꞌnchaꞌ bexa sa nde be men kwaꞌad, leꞌa dub xabgiꞌi cha ulen wats Jesús, cha msaxib xa ndoꞌ Jesús ndab xa:
15 —Señor, blats ladna go xiꞌín naꞌ, leꞌa meꞌed uzhebpa kweaꞌ nsak gizhkaw. Sian biaj nlayat meꞌed ndoꞌ giꞌ no ndoꞌ nits.
16 Leꞌa naꞌ ngwaꞌnola meꞌed ndoꞌ be xmen ga, ná leꞌa bexa lá ngun gan yakna meꞌed.
17 Leꞌa Jesús cha ndab ndoꞌ be men:
—Uzheꞌeb ngud nak bega no ndidotsa ngeꞌ ladna bega Dios. ¿Ploxá tiemp yoꞌo naꞌ lat bega zhaga? ¿Sta ploxá tiemp uxik naꞌ ndoꞌ bega zhaga? Utseano bega meꞌed baꞌ sa ndee.
18 Leꞌa Jesús cha uteyo mbi bxin ncho ladoꞌo meꞌed bgiꞌi wa. Leꞌa mbi bxin wa cha utoꞌo, cha bi leꞌa gor wa myakna meꞌed wa.
19 Tsoꞌo wa leꞌa be xmen Jesús ulen wats Jesús, unabdiꞌizh bexa ndoꞌ Jesús, ndab bexa:
—¿Xtaꞌan lá ngun besa gan igontuꞌub besa mbi bxin wa zha?
20 Leꞌa Jesús cha ndab:
—Leꞌa bega ndidotsa ngeꞌ ladna Dios. Leꞌa naꞌ gáp ndoꞌ bega tal leꞌa bega ngeꞌ ladna Dios lak tuzh dub bid ten ya mostas, leꞌa bega sunka gan gab ndoꞌ bet ndee: “Bxoꞌon sa ndee, waꞌ sa baꞌ”; leꞌa bet cha uxoꞌon. Tal leꞌa bega li igeꞌ ladna Dios, leꞌa bega itea taꞌa sunka gan.
21 Parea leꞌa be ltsaꞌa mbi bxin ndee lá yoo gan itoꞌo xagaꞌ. Nkiꞌin lá gaw bega dub tiemp no mas gudiꞌizhno bega Dios ndontsa slaꞌa be mbi bxin wa be men.
Jesús mbidiꞌizhgal leꞌa gat
(Mr. 9:30-32; Lc. 9:43-45)
22 Leꞌa dub wizh zha ndencho bexa wa Galilea, leꞌa Jesús ndabgal ndoꞌ be xmen na:
—Leꞌa naꞌ, Xa Myak Men Ndoꞌ Gizhliyo, yak cuent ndoꞌ yaꞌa be men.
23 Leꞌa bexa wa cha gut naꞌ, parea leꞌa wizh yon leꞌa naꞌ ibangal.
Leꞌa bexa wa cha uzhebpa uban myoꞌo ladna.
Jesús utix med ten niꞌi ten Dios
24 Leꞌa bexa wa cha nchaꞌagal gezh Capernaum. Weꞌe leꞌa bexa na nkaꞌa med ten niꞌi ten Dios ulen ndoꞌ Pedr, ndab bexa:
—¿Nkix mech ten bega med ndantiꞌin bexa niꞌi ten Dios zha?
25 Leꞌa Pedr cha ukaꞌab ndab:
—Leꞌa xa nkixka‑yá.
Ngol gor uyoꞌo Pedr len niꞌi, leꞌa Jesús ned uníꞌi ndoꞌ Pedr, ndab xa:
—¿Xteꞌe nsak lu, Simón? Leꞌa bexa ndon leꞌa nibeꞌe ndoꞌ gizhliyo, ¿ton ndoꞌ ná ndun bexa cobr be med zha? ¿Ndoꞌ bexa lazh xa nate ndoꞌ bexa ntoꞌo sit?
26 Leꞌa Pedr cha ukaꞌab ndab:
—Ndoꞌ bexa ntoꞌo sit ndun bexa cobr.
Leꞌa Jesús cha ndab:
—Ta ugeaka leꞌa bexa lazh xa nibeꞌe wa naꞌanpa juerska kix ta wa.
27 Parea ndontsa lá gakloo bexa, waꞌ toꞌo lagun, cha btsaꞌab gibganch ndoꞌ nits wa. Leꞌa mbeal ned isen‑a, leꞌa toꞌo ma wa izheal lu dub med. Cha biꞌi‑yá waꞌtix ta ten itop beuna.