21
Jesús uyote Jerusalén
(Mr. 11:1-11; Lc. 19:28-40; Jn. 12:12-19)
1 Leꞌa ngol gor na yá nchaꞌlayaꞌ gax Jesús no be xmen xa Jerusalén, ulayaꞌ bexa gezh Betfagé sa nsob Bet Olivo. Leꞌa Jesús cha mtuꞌub top xmen na,
2 ndab xa:
—Waꞌ bega len gezh nde mas ndoꞌ ndee, cha izheal bega dub burr gots nsoꞌ nchii, no dub xin ma. Cha uxaꞌak bega bema, goꞌo bega ma sa ndee.
3 No tal ton uka ma ndoꞌ bega, gud bega leꞌa mech guntiꞌin ma. Cha ulaꞌa xa goꞌo bega ma.
4 Li ndab Jesús ndontsa gak‑a lak ndab dub profet sakndoꞌ Dios, ndab xa:
5 Gud bego ndoꞌ bexa gezh Sion:
“Bwiꞌi bega, leꞌa xa nibeꞌe ten bega nsea sa ndee.
Bchaꞌan nak xa nsob xa tsoꞌo dub burr,
tsoꞌo dub burr tuzh, xin dub man yoꞌo.”
6 Leꞌa be xmen Jesús wa cha nchaꞌbe, cha mbin bexa lakka unibeꞌe Jesús ndoꞌ bexa.
7 Cha mbiꞌi bexa burr wa nsea burr tuzh wa, cha mtiꞌib bexa dubga xab bexa tsoꞌo ma. Cha usob Jesús tsoꞌo ma.
8 Leꞌa kwaꞌad be men cha mte be lad nbix bexa ndoꞌ nes sa itid Jesús, no ncho bexa ulobtoꞌog be xos ya gin, cha mte bexa‑yá nes wa.
9 Leꞌa be men nchaꞌbe ned ndoꞌ Jesús no be men nseabenkea tsoꞌo Jesús ugeꞌ ndab:
—¡Siꞌil nak xin David! ¡Dios uzhebpa nlaꞌach xa baꞌ, xa na mtuꞌub Dios Xa Nibeꞌe! ¡Siꞌil nak Dios nsob gaꞌap!
10 Leꞌa gor na uyote Jesús len gezh Jerusalén, leꞌa iteanak be men usaxan ndeseyoch, unabdiꞌizh bexa ndab bexa:
—¿Ton xa baꞌ zha?
11 Leꞌa be men ndeseano Jesús wa cha ndab:
—Leꞌa xa ndee Jesús, xa ndadiꞌizh sakndoꞌ Dios, xa gezh Nazaret ten Galilea.
Jesús ulantuꞌub bexa nadoꞌotiꞌix taꞌa
(Mr. 11:15-19; Lc. 19:45-48; Jn. 2:13-22)
12 Leꞌa Jesús cha nchaꞌa len niꞌi ten Dios, cha ulantuꞌub xa bexa nadoꞌotiꞌix taꞌa sa wa. No mtixte xa be mes ten bexa ntil be med, no be yaxil ten bexa ndiꞌibudoꞌo be palom.
13 Cha ndab xa ndoꞌ bexa wa:
—Leꞌa diꞌizh ten Dios nkeaniꞌi ndab Dios: “Leꞌa lid naꞌ isaleaꞌ dub sa ndadiꞌizhno be men naꞌ.” Ná leꞌa bego ndi ndanno‑yá cuent dub geꞌloꞌo ten be waꞌan.
14 Weꞌe leꞌa pla bexa lá naꞌ no bexa coj cha ulen wats Jesús tale ten niꞌi ten Dios wa, cha myunyakna Jesús bexa.
15 Parea leꞌa be uleꞌay nibeꞌe no be mech ten ley uzheꞌeb ngokloo gor uniꞌí bexa be uyon ndun Jesús wa, no mbiꞌín bexa ta ugeꞌ ndab be meꞌed tale ten niꞌi ten Dios, ndab meꞌed: “¡Siꞌil nak xin David!”
16 Cha ndab bexa ndoꞌ Jesús:
—¿Lid ndoꞌón lu xtaꞌan ndab be meꞌed baꞌ zha?
Leꞌa Jesús cha ukaꞌab ndab:
—Naꞌ ndónka‑yá. ¿Parea lá ndoꞌol bega zha sa nkeaniꞌi diꞌizh ten Dios cuent ten ta ndee? Ndab‑a:
Leꞌa go Dios gun leꞌa be meꞌed nsea be medoꞌo gab xteꞌe siꞌil nak go.
17 Leꞌa Jesús cha mlaꞌa bexa mkaꞌan xa gezh Jerusalén. Cha nchaꞌa xa gezh Betania, sa uyoꞌo xa teꞌal wa.
Jesús uteyo dub ya higo
(Mr. 11:12-14,20-26)
18 Leꞌa stub wizh gor tempran myach xa nchaꞌa xa Jerusalén. Leꞌa nes wa leꞌa Jesús ndanna.
19 Weꞌe uniꞌí xa dub ya higo gax toꞌo nes wa, cha nchaꞌkwaꞌan xa ngus gaw xa ndoꞌ ya wa. Parea naꞌanpa izheal xa ngus ndoꞌ‑yá, ndi latsa nsoꞌ ndoꞌ‑yá. Cha ndab Jesús ndoꞌ ya wa:
—Idub isob lu naꞌantapa isoꞌ ngus ndoꞌ lu.
Leꞌa ya higo wa cha ubid.
20 Leꞌa gor uniꞌí be xmen Jesús ta wa cha ngwanseana bexa, unabdiꞌizh bexa ndoꞌ Jesús, ndab bexa:
—¿Xteꞌe uxax ubid ya higo baꞌ?
21 Leꞌa Jesús cha ukaꞌab ndab:
—Leꞌa naꞌ gáp ndoꞌ bego leꞌa tal bega idub ncho ladna ngeꞌ ladna Dios, leꞌa bega sun gan gun lak mbinno naꞌ ya higo ndee, no sun bega gan gab bega ndoꞌ bet ndee: “Utatsob, waꞌ len nitsdoꞌo”, leꞌa‑yá cha lika gak.
22 Leꞌa itea be ta inab bega ndoꞌ Dios tal ngeꞌka ladna bega xa, leꞌa Dios saꞌaka‑yá.
Jesús lá ngab ton mtuꞌub Jesús
(Mr. 11:27-33; Lc. 20:1-8)
23 Leꞌa gor na mlanseagal Jesús wats niꞌi ten Dios, cha usaxan xa nluu xa be men. Weꞌe leꞌa be uleꞌay nibeꞌe no bexa gox nsak ten bexa judio ulen wats Jesús, ndab bexa:
—¿Ton ulaxoꞌob lu gun lu be ta wa zha? ¿Nati ton mtuꞌub lu gun lu ta wa?
24 Leꞌa Jesús cha ukaꞌab ndab:
—Leꞌa naꞌ no inabdiꞌizh dub taꞌa ndoꞌ bego. Tal leꞌa bega ikaꞌab, weꞌe no naꞌ gáp ná ton ulaxoꞌob naꞌ li gun naꞌ ta wa.
25 ¿Ton mtuꞌub Juan ulaleaꞌ Juan be men zha? ¿Dios nati dub men?
Leꞌa bexa wa cha ndabbe ndoꞌ ltsaꞌa na:
—Tal leꞌa beuna gab leꞌa Dios leꞌaka mtuꞌub Juan, leꞌa Jesús inabdiꞌizh ná xtaꞌan lá ngungea ladna beuna xa.
26 Ná tal leꞌa beuna gab leꞌa Juan dub men mtuꞌub, leꞌa be men ndee sakloo ndoꞌ beuna, leꞌa bexa itea mbingea ladna leꞌa Juan dub xa mbidiꞌizh sakndoꞌ Dios.
27 Cha ndab bexa ndoꞌ Jesús:
—Leꞌa besa lá iniꞌí ton mtuꞌub Juan.
Leꞌa Jesús cha noga ndab:
—Ni naꞌga lá gáp ton ulaxoꞌob naꞌ gun naꞌ be ta ndee.
Dub cuent ten dub xabgiꞌi ndap top xin na
28 Leꞌa Jesús cha unabdiꞌizh ndoꞌ bexa wa ndab xa:
—¿Xteꞌe nyakbeꞌena bega ta gáp naꞌ ndee wa? Uyoꞌo dub xabgiꞌi ndap top xin na. Cha ngwaꞌ xa ndoꞌ xin ned xa, ndab xa: “Xiꞌín naꞌ, waꞌyun tiꞌin ndoꞌ yo ten naꞌ sa ncho ya uv.”
29 Leꞌa xin xa wa cha ukaꞌab ndab: “Naꞌ lá nlad gaa.” Parea tsoꞌo wa leꞌa xa mgondoꞌ leꞌa xa ugap ndab, cha nchaꞌaka xa ndoꞌ tiꞌin wa.
30 Leꞌa xabgiꞌi wa no ngwaꞌ ndoꞌ stubga xin na wa, cha leꞌakagal li ndab xa ndoꞌ xin xa. Leꞌa xin xa wa cha ukaꞌab ndab: “Leꞌa naꞌ saaka, tad.” Ná leꞌa xa ndi ni lá nga.
31 ¿Ton ndoꞌ itop xa wa mbin ta nlad xus na zha?
Leꞌa bexa wa cha ndab:
—Xin ned xa.
Leꞌa Jesús cha ndab ndoꞌ bexa:
—Leꞌa naꞌ gáp ndoꞌ bego leꞌa bexa nsen med nkaꞌa gobier Roma no be xagots ndun juis mgiꞌi nadoꞌo bexa las bexa, leꞌa ncho bexa wa syoteka sa nibeꞌe Dios. Ná leꞌa bego lá yate sa wa.
32 Leꞌa Juan xa ulaleaꞌ men mbidyadiꞌizh xteꞌe nsabndoꞌ wen gun bega, ná leꞌa bega ni lá ngungea ladna xa. Ná leꞌa bexa nsen med wa no be xagots ndun juis mgiꞌi wa mbingea ladna Juan. Leꞌa bego uniꞌí leꞌa bexa wa mbingea ladna Juan, ná leꞌa bega ni lá igondoꞌ ti no bega nsabndoꞌ gungea ladna xa.
Dub cuent ten bexa mlaꞌach ya uv
(Mr. 12:1-12; Lc. 20:9-19)
33 ’Blaꞌach bega stub taꞌa usaktabeꞌe naꞌ: Uyoꞌo dub xabgiꞌi ndap dub bleꞌa siꞌil yo. Cha ngos xa ya uv ndoꞌ‑yá, cha ulo xa lo idub gangeak wats‑a. No mbindeꞌe xa dub sa kichkeꞌe xa uv wa, koꞌo xa nits ten uv. No mbindeꞌe xa dub sa gaꞌap isob xa ulaꞌach sa wa. Cha mkwaꞌan xa pla men gun tiꞌin sa wa. Cha nchaꞌa xa sit.
34 Leꞌa zha na yamer ngol tiemp ten uv wa, cha mtuꞌub xa pla xmos xa yaꞌ ndoꞌ be men wa, yaꞌyoꞌo bexa ta na ndal xwan yo wa.
35 Ná leꞌa be men wa ndi usen be mos wa, udin bexa dub xa, cha mbit bexa stub xa, cha mlaꞌgeꞌ bexa stub xa.
36 Leꞌa xwan yo wa cha mtuꞌubgal mas kwaꞌad mos ndoꞌ zha ned wa. Ná leꞌa be men wa ligal mbinno bexa wa.
37 Tsoꞌo wa leꞌa xwan yo wa mtuꞌub xin na, mbinbeꞌe xa leꞌa be men gap mod ndoꞌ xa.
38 Ná leꞌa gor uniꞌí be men wa xin xwan yo wa, cha ndi ndab bexa ndoꞌ ltsaꞌa na: “Leꞌa xa baꞌ leꞌa yaꞌanno yo ndee. Nchaꞌyut beuna xa, cha yaꞌanno beuna‑yá.”
39 Cha usen bexa xa, cha uloꞌo bexa xa dub lad toꞌo yo wa, cha mbit bexa xa.
40 Cha unabdiꞌizh Jesús ndoꞌ be men nde wats xa ndab xa:
—¿Xteꞌe nsak bega zha? ¿Leꞌa gor giꞌid xwan yo wa xteꞌe gunno xa bexa mlaꞌach yo wa?
41 Leꞌa bexa cha ndab:
—Leꞌa xa utsaksika bexa ugap wa gast gat bexa. Cha usaꞌa xa yo wa ndoꞌ be men xaꞌaga ulaꞌach‑a, bexa na usaꞌa be ta ndal xwan yo wa gal tiemp ten uv wa.
42 Weꞌe leꞌa Jesús cha ndab ndoꞌ bexa:
—¿Ni lá ndoꞌol bega diꞌizh ten Dios zha? Ndab‑a:
Leꞌa geꞌ na mxelad bexa ndandeꞌe niꞌi,
leꞌa ta wa nat nak geꞌ ndon leꞌa nsak nbexan niꞌi.
Leꞌa Dios leꞌa mbin ta ndee,
dub ta ndanseana beuna.
43 Ta weꞌe leꞌa naꞌ gáp leꞌa Dios ulat ta na nak bega xmen xa, cha ndi usaꞌa Dios ta wa ndoꞌ bexa nxobgek ndoꞌ xa.
44 Leꞌa bexa na ilayat tsoꞌo geꞌ wa, leꞌa bexa wa syuꞌbe. Leꞌa bexa ilaꞌ geꞌ wa tsoꞌo na wa, leꞌa bexa wa sachkeꞌe.
45 Leꞌa gor na mbiꞌín be uleꞌay nibeꞌe nsea bexa fariseo wa be ta li msaktabeꞌe Jesús wa, cha myakbeꞌena bexa leꞌa Jesús li ndab cuent ten bexa.
46 Cha nlad bexa isen bexa Jesús, parea leꞌa bexa nzheb ndoꞌ be men kwaꞌad, leꞌa be men ndangea ladna leꞌa Jesús ndadiꞌizh sakndoꞌ Dios.