9
Jesús myunyakna dub xa lá yoo gan isea
(Mr. 2:1-12; Lc. 5:17-26)
1 Leꞌa Jesús cha ukeagal ndoꞌ barco wa, cha utakea xa stub toꞌo lagun, nseaꞌ xa gezh Capernaum sa ncho xa.
2 Leꞌa sa wa cha ulenno pla be men dub xabgiꞌi gizh lá yoo gan isea, nax ndoꞌ dub yaloꞌon. Leꞌa Jesús cha mnaꞌla leꞌa bexa ngeꞌ ladna leꞌa Jesús sun gan yunyakna xa gizh wa, cha ndab Jesús ndoꞌ xa gizh wa:
—Amig, bten ladna lu, leꞌa ke ten lu myuꞌula.
3 Weꞌe leꞌa pla be mech ten ley nde sa wa cha mbinbeꞌebe: “Leꞌa ta ndab xa baꞌ uzheꞌeb dub taꞌa lá nsak ladna Dios.”
4 Ná leꞌa Jesús mgenna xteꞌe ndanbeꞌe bexa wa, cha ndab Jesús:
—¿Xtaꞌan lbaꞌa ugap ndanbeꞌe bega len ladoꞌo bega zha?
5 ¿Xtaꞌan mas lid bid gáp naꞌ leꞌa ke ten xa ndee myuꞌula, nati gáp naꞌ gaste xa, cha isea xa?
6 Leꞌa nat iniꞌí bego leꞌa naꞌ, Xa Myak Men Ndoꞌ Gizhliyo, no syoꞌo gan utsuꞌu ke ten be men.
Cha ndab Jesús ndoꞌ xa gizh wa:
—Goste, cha udob yaloꞌon ten lu baꞌ, cha byaꞌ ta lid lu.
7 Leꞌa xa cha ngwaste, cha nseaꞌ xa ta lid xa.
8 Leꞌa gor uniꞌí be men ta wa, cha uzhebpa ngwanseana bexa, no ndab bexa leꞌa Dios uzheꞌeb dub Dios siꞌil ta na li msaꞌa xa juers ndoꞌ men.
Jesús mti Mateo
(Mr. 2:13-17; Lc. 5:27-32)
9 Leꞌa gor nchaꞌa Jesús cha uniꞌí xa dub xa nsaleaꞌ Mateo nsobyun tiꞌin nsen xa med nkix be men ndoꞌ gobier Roma. Cha ndab Jesús ndoꞌ xa:
—¡Utsea! ¡Usankea tsoꞌo naꞌ!
Leꞌa Mateo cha ngwasoꞌ, cha usankea xa tsoꞌo Jesús.
10 Ngol tsoꞌo wa leꞌa Jesús nsea be xmen xa ngwaꞌdaw ta lid Mateo. Leꞌa sa wa no kwaꞌad bexa ndun ltsaꞌa tiꞌin ndun Mateo wa ngwaꞌbe, no kwaꞌadta bexa na ndab be men ugap nak bexa.
11 Leꞌa gor uniꞌí bexa fariseo ta wa, cha ndab bexa ndoꞌ be xmen Jesús:
—¿Xtaꞌan lbaꞌa ndawno mech ten bega bexa nsen med no bexa ugap baꞌ zha?
12 Ná leꞌa Jesús mbiꞌín ta ndab bexa wa, cha ndab Jesús:
—Leꞌa bexa naꞌanpa gizh lá nkiꞌin doctor, ndi leꞌa bexa gizh nkiꞌinka xa wa.
13 Waꞌutsid bega ná xteꞌe gab diꞌizh ten Dios, sa ndab Dios: “Leꞌa naꞌ mas nlad ikweaꞌ ladna bega men, ndoꞌ lak nlad naꞌ usaꞌa bega man xnab ndoꞌ naꞌ.” Leꞌa naꞌ naꞌanpa ndaltezh bexa ndanbeꞌe leꞌa lá ndap ke. Leꞌa naꞌ ndi ndaltezh bexa ngondoꞌ leꞌa ndapka ke, ndontsa yach bexa wats Dios.
Jesús mbidiꞌizh xteꞌe lá gaw be men dub tiemp
(Mr. 2:18-22; Lc. 5:33-39)
14 Weꞌe leꞌa pla be xmen Juan xa ulaleaꞌ be men wa cha ulen ndabbe ndoꞌ Jesús:
—Leꞌa besa ndee no bexa fariseo ncho sian be wizh lá ndaw besa. Ná leꞌa be xmen ga zha, ¿xtaꞌan lid no bexa li ndun ta wa?
15 Leꞌa Jesús cha ukaꞌab ndab:
—¿Nsak bega zha leꞌa dub sa nchilyaꞌa men leꞌa bexa nde sa wa nsabndoꞌ uban yoo ladna, zha bi ncho xabgiꞌi nchilyaꞌa wa? Parea gal dub wizh leꞌa be men goꞌo xabgiꞌi mchilyaꞌa wa. Leꞌa zha weꞌe leꞌa be men nde sa wa lá gaw dub tiemp.
16 ’Naꞌan ton ngo ramient dub lad gox nsea dub bleꞌa lad kub, leꞌa lad kub wa syaꞌad, cha ndi mas stsaw‑a lad gox wa.
17 No naꞌan ton ngo vin kub len dub bols gid gox, leꞌa bich ten vin kub wa stsaw bols gid gox wa. Leꞌa vin wa cha ibid stsiꞌi no sazhaꞌa bols gox wa. Leꞌa vin kub wa nsabndoꞌ yoꞌo len bols gid kubga, ndontsa ni dub‑a lá gazhaꞌa.
Jesús myunyakna dub xagots nsea mxiste xa xingots Jairo
(Mr. 5:21-43; Lc. 8:40-56)
18 Ndalen li nsoꞌyadiꞌizh Jesús, leꞌa dub xabgiꞌi nsak ten bexa judio ulen, cha usaxib xa ndoꞌ Jesús, ndab xa:
—Leꞌa meꞌed gots ten naꞌ tiꞌi ngutma. Waꞌ una uxoꞌob ga yaꞌa ga tsoꞌo meꞌed, ndontsa iban meꞌed.
19 Weꞌe leꞌa Jesús no be xmen xa cha nchaꞌano xa wa.
20 Leꞌa toꞌo nes wa nsoꞌ dub xagots nsak gealgizh nleꞌa xa ten idub dub tibtopla liꞌin. Leꞌa xa ubii ndi tsoꞌo Jesús, cha mgal xa ndats xab Jesús,
21 leꞌa xa mbinbeꞌe tal leꞌa xa ugal masa xab Jesús, leꞌa xa syakkana.
22 Ná leꞌa Jesús cha mgeaksoꞌ mwiꞌi ndoꞌ xa, cha ndab Jesús:
—Xagots, bten ladna lu, leꞌa ta na mgeꞌ ladna lu naꞌ, ta weꞌe mbin myakna lu.
Cha bi leꞌa gor wa myakna xa.
23 Ngol gor ulayaꞌ Jesús ta lid xabgiꞌi nsak wa, leꞌa Jesús cha uniꞌí bexa ndoꞌol bzhee, no xteꞌeta ugeꞌ ndeyoꞌon be men.
24 Cha ndab Jesús ndoꞌ bexa wa:
—Utate bega, leꞌa meꞌed baꞌ naꞌanpa ngut, leꞌa meꞌed ga naxyats.
Leꞌa be men wa cha ndi mxiꞌidno Jesús.
25 Ná leꞌa gor utatela bexa, cha uyoꞌo Jesús len niꞌi, cha usen xa yaꞌa meꞌed, cha ngwaste meꞌed.
26 Leꞌa ta li mbin Jesús wa mgen itea be gezh nde gax sa wa.
Jesús myunyakna top bexa lá naꞌ
27 Leꞌa gor utoꞌo Jesús sa wa leꞌa top xabgiꞌi lá naꞌ nseabenkea tsoꞌo Jesús, ugeꞌ ndab bexa:
—¡Xin David! ¡Blats ladna go besa!
28 Leꞌa gor uyoꞌo Jesús len niꞌi, cha ulen bexa wa wats Jesús. Leꞌa Jesús cha ndab ndoꞌ bexa:
—¿Ndangea ladna bega leꞌa naꞌ sun gan yakna bega zha?
Leꞌa bexa cha ndab:
—Señor, leꞌa besa ndangeaka ladna‑yá.
29 Leꞌa Jesús cha mgal ngusndoꞌ bexa, ndab Jesús:
—Nat yakna bega lak ndangea ladna bega‑yá.
30 Cha mnaꞌla bexa. Leꞌa Jesús cha uzhebpa ndab lá gudiꞌizh bexa‑yá ndoꞌ ni dub men.
31 Ná leꞌa gor nseaꞌbe bexa, cha mbidiꞌizh bexa ta li mbin Jesús wa ndoꞌ itea be men ncho gax sa wa.
Jesús myunyakna dub xa lá yoo gan iníꞌi
32 Leꞌa gor utoꞌo itop be xabgiꞌi sa wa, weꞌe leꞌa stapla be men ulenno dub xabgiꞌi mud, ncho mbi bxin len ladoꞌo na.
33 Leꞌa Jesús cha ulantuꞌub mbi bxin len ladoꞌo xa wa, cha usaxan ndadiꞌizh xabgiꞌi wa. Leꞌa be men uzhebpa ndanseana, ndab bexa:
—¡Ta ndee dub ta nunk beuna gol niꞌí idub Israel ndee!
34 Ná leꞌa bexa fariseo ndabbe:
—Leꞌa juers ten maxuꞌu na nibeꞌe be mbi bxin ngontuꞌub Jesús be mbi bxin len ladoꞌo be men.
Uzhebpa sian tiꞌin ten Dios ncho
35 Tsoꞌo wa leꞌa Jesús ukesea itea be gezh ubiꞌi no be gezh byux sa wa, mluu xa be men len be niꞌi sa nzhealbe bexa judio be gezh wa. Mbidiꞌizh xa diꞌizh wen ten Dios ná xteꞌe gak bexa dub xa leꞌa Dios nibeꞌe, no myunyakna xa be men nsén isandoꞌ gealgizh no be gealkweaꞌ.
36 Leꞌa gor uniꞌí Jesús be men kwaꞌad, cha mlats ladna Jesús bexa, leꞌa bexa nyuꞌ ladna no ni lá iniꞌí bexa xteꞌe gun bexa, cuent be borreg ni lá ndap ton ulaꞌach ma.
37 Cha ndab Jesús ndoꞌ be xmen na:
—Ncho kwaꞌad be men gol goꞌón diꞌizh wen ten Dios, nak bexa cuent sianpa be taꞌa iganleꞌe, parea leꞌa bexa gun tiꞌin wa platsa.
38 Ta weꞌe unab bega ndoꞌ Dios Xwan tiꞌin utuꞌubta xa bexa gun tiꞌin ndee.