19
Bexa nten ladna ncho gibeꞌa
1 Tsoꞌo wa mbín naꞌ ti kwaꞌad be men gibeꞌa, ugeꞌ ndab bexa:
¡Iteanak beuna yankea Dios!
Leꞌa Dios ten beuna leꞌa uloꞌo beuna ndoꞌ be ke ten beuna,
no ndankea beuna xa leꞌa xa uzheꞌeb dub xa wen nak,
no uzhebpa juert nak xa.
2 Leꞌa iteanak be ta ndun xa wa gealngea nak no utsin nak‑a,
lak mtsaksi xa ngots ndun juis mgiꞌi wa,
xa mtsabgix be men ndoꞌ gizhliyo nsea be ta ugap mbin xa.
Ke weꞌe leꞌa Dios mkixke ta mbit xa wa be men,
bexa ndun tiꞌin ndoꞌ Dios.
3 Cha stub biaj ugeꞌ ndab bexa wa:
¡Iteanak beuna yankea Dios!
Leꞌa zhen sa nsayolꞌ xagots wa nunk lá kweaskea idub tiemp.
4 Leꞌa isagaꞌal bdap bexa gox xa nsak no idap be ta nban wa cha usaxib gast ndoꞌ yo ngol xtuzh bexa. Cha ngwankea bexa Dios sa nsob xa ndoꞌ yaxil, ndab bexa:
—¡Lika nak‑a! ¡Iteanak beuna ndankea Dios!
5 Leꞌa gast ndoꞌ sa nsob Dios wa ulen dub diꞌizh ndab:
Wankea bego Dios ten beuna,
itea bego na ndun tiꞌin ndoꞌ xa,
bego na nzheb ndoꞌ xa,
lak bego xa nsak no bega xa naꞌanpa nsak.
6 No mbín naꞌ ti kwaꞌadpa men, cuent nsid dub sa nsalaꞌ kwaꞌal nits, no cuent sa uzheꞌeb uníꞌi usiꞌi, ndab bexa:
¡Iteanak beuna yankea Dios,
leꞌa xa wa leꞌa nak xa nibeꞌe, xa ndon leꞌa juert nak!
7 ¡Iten ladna beuna no usaꞌa beuna xno ndoꞌ Dios!
Leꞌa nat ngol zha na uchilyaꞌa xa na nak Borreg Ben,
leꞌa xagots ikaꞌa xa wa listla nsoꞌ.
8 Leꞌa xagots wa gak dub lad lino chul,
lad umbiꞌi ndon nlaꞌbealꞌ.
Leꞌa lad lino chul wa, leꞌa ta wa nluu be ta utsin mbin be men umbiꞌi nak ladoꞌo na ndoꞌ Dios.
Bexa gaw xcheꞌe sa nchilyaꞌa Borreg
9 Leꞌa angel wa cha ndab ndoꞌ naꞌ:
—Bkeꞌa ta ndee: “Uzhebpa wen yoo ladna bexa na utezh Dios, gaw xcheꞌe bexa sa uchilyaꞌa xa nak Borreg wa.”
No ndab xa:
—Leꞌa ta ndee be diꞌizh gealngea ten Dios.
10 Cha usaxib naꞌ xan ndats angel wa gast ndoꞌ yo ngol xtuzh naꞌ ndontsa gankeꞌa naꞌ xa. Zha leꞌa angel wa cha ndab ndoꞌ naꞌ:
—¡Naꞌanpa lbaꞌa gun lu, ndi wankea Dios! Leꞌa naꞌ ndee no ndun tiꞌin laktsa ndun lu tiꞌin ndoꞌ Dios nsea bexa ltsaꞌa lu, bexa nxobgek ndoꞌ diꞌizh ten Jesús. Leꞌa ta ndadiꞌizh bexa sakndoꞌ Dios, leꞌa ta wa nsaꞌa juers ndoꞌ be diꞌizh ten Jesús.
Xa na nsob tsoꞌo way nagud
11 Weꞌe cha uní naꞌ leꞌa gibeꞌa myaꞌal, cha mlundoꞌ dub way nagud. Leꞌa xa nsob tsoꞌo ma wa dub xa sunka lak ndab xa, no gealngea nak xa. Leꞌa xa wa utsin nibeꞌe, no utsin ndun xa uyo lak nsabndoꞌ‑yá.
12 Leꞌa ngusndoꞌ xa cuent naꞌ bealꞌ giꞌ. Nsea gek xa ndiꞌib sian be coron. Leꞌa stub leaꞌ xa nkea xtuzh xa, dub taꞌa ni dub men lá iniꞌí, nabtsa xa uniꞌí‑yá.
13 Nsea nak xa dub lad koꞌol idub nsoꞌ ten. Leꞌa xa wa nsaleaꞌ Diꞌizh Ten Dios.
14 Leꞌa kwaꞌad be soldad gibeꞌa nchankea tsoꞌo xa wa, ndiꞌib bexa tsoꞌo way nagud, no nak bexa lad lino ta uzheꞌeb chul, ta nagud no umbiꞌi.
15 Leꞌa toꞌo xa wa ntoꞌo dub spad wach, ndontsa utsawiꞌi xa itea be nacion. Leꞌa xa wa juert inibeꞌe ndoꞌ bexa wa, no utsaksi xa be men lakta zha ngichkeꞌe bexa uv itoꞌo nits ten‑a. Leꞌa ta wa ta uzheꞌeb ndakloo Dios xa ndon leꞌa juert nak.
16 Leꞌa las xab xa no xtaꞌa xoꞌo xa nkeaniꞌi stub leaꞌ xa ndab: “Xa Nibeꞌe ndoꞌ iteanak bexa nibeꞌe no Xa nak Xwan iteanak be taꞌa.”
17 Cha uní naꞌ stub angel nsoꞌ ndoꞌ wizh, cha ugeꞌ utezh xa iteanak be man nsaꞌab gaꞌap, ndab xa:
—Utseabe bego, byakjunt bega sa yoo xcheꞌe siꞌil ten Dios,
18 ndontsa gaw bega beꞌal ten bexa unibeꞌe ndoꞌ be nacion, nsea bexa unibeꞌe be soldad, nsea be soldad. No gaw bega beꞌal ten be way, no bexa utiꞌib tsoꞌo ma, no beꞌal ten bexa nchaꞌndoꞌo ndoꞌ stubga men nsea bexa naꞌanpa li nak, no bexa nsak nsea bexa naꞌanpa nsak.
19 Cha weꞌe uní naꞌ leꞌa man uzheꞌeb wa, no bexa nibeꞌe ndoꞌ gizhliyo, nsea be soldad ten bexa wa myakjunt ndontsa kuyono bexa xa nsob tsoꞌo way nagud no be soldad ten xa.
20 Cha ngwaꞌigaꞌa man uzheꞌeb wa no profet ukwiꞌin wa. Leꞌa xa wa xa mbin sian be taꞌa ngwanseana be men ndoꞌ gaꞌal man uzheꞌeb wa, ta mkedino xa be men nkea se ten man wa, bexa ngwankea ta cuent nak man wa. Leꞌa xa nsob tsoꞌo way nagud wa usen man uzheꞌeb wa nsea profet ukwiꞌin wa, cha litsa nban bena wa mtsaꞌab xa len lagun giꞌ sa nsayolꞌ azufre.
21 Weꞌe leꞌa xa nsob tsoꞌo way cha mbit iteanak be soldad ten man uzheꞌeb wa nsea spad ntoꞌo toꞌo xa. Cha weꞌe leꞌa iteanak be man duꞌub udaw be beꞌal ten bexa ngut wa gast plo mzhea bema.