3
1 Qui lë ni naꞌ, catiꞌ cutur guc guaꞌ glentuꞌ, ben xtídzaꞌtuꞌ ugaꞌntuꞌ choptuꞌ lu yödz Atenas
2 atiꞌ bsö́laꞌtuꞌ‑biꞌ ga zoaliꞌ biꞌi bö́chiꞌruꞌ, Timoteo. Nacbiꞌ biꞌi huen dxin queëꞌ Dios, rúnlenbiꞌ nedaꞌ tsazxö́n lban qui didzaꞌ dxiꞌa queëꞌ Cristo. Bsö́laꞌtuꞌ‑biꞌ ga zoaliꞌ quië cuéquibiꞌ lbiꞌiliꞌ tsutsu, len uchizbiꞌ icj nagliꞌ ca ral‑laꞌ tséjlëꞌliꞌ Cristo,
3 cui soa nu gac chop ladxiꞌ niꞌa qui le tuꞌsacaꞌ ziꞌ netuꞌ bunách ni, le nö́ziczliꞌ zoaruꞌ yödzlyú ni quië guaꞌ glenruꞌ le cni.
4 Lëzcaꞌ catiꞌ niꞌ gzóalentuꞌ lbiꞌiliꞌ, gdíxjöiꞌtuꞌ lbiꞌiliꞌ ca chzoa gac queëruꞌ le lusacaꞌ ziꞌ rëꞌu, gac ca naꞌ chguc queëtuꞌ atiꞌ nö́ziczliꞌ lë ni.
5 Qui lë ni naꞌ, catiꞌ cutur guc guaꞌ glenaꞌ, bsölaꞌa‑biꞌ ga zoaliꞌ biꞌi Timoteo quië dudíxjöiꞌbiꞌ nedaꞌ ca nac queëliꞌ ca réjlëꞌliꞌ Cristo, len chquiꞌ cutu gluꞌu lbiꞌiliꞌ nöz dul‑laꞌ tuꞌ xöhuiꞌ, nu naꞌ rguꞌu bunách nöz dul‑laꞌ, len chquiꞌ cuböác daduz dxin naꞌ bentuꞌ ga zoaliꞌ.
6 Catiꞌ buzaꞌbiꞌ ga zoaliꞌ biꞌi Timoteo, len budxinbiꞌ ga zoatuꞌ, gdíxjöiꞌbiꞌ netuꞌ le nac dxiꞌa, bëꞌbiꞌ didzaꞌ ca naꞌ réjlëꞌliꞌ Cristo, len ca naꞌ nadxíꞌigacliꞌ‑nëꞌ böchiꞌ lzaꞌruꞌ, len ca naꞌ, lu yöl‑laꞌ dxiꞌi ladxiꞌ queëliꞌ rajnéyteczliꞌ netuꞌ, lencaꞌ ca naꞌ rzë ládxiꞌliꞌ uléꞌiliꞌ netuꞌ, ca naꞌ netuꞌ rzë ládxiꞌtuꞌ caꞌ uléꞌituꞌ lbiꞌiliꞌ.
7 Qui lë ni naꞌ, böchiꞌ lzaꞌtuꞌ, catiꞌ niꞌ gzxacaꞌ gdiꞌtuꞌ yúguꞌtë lë ni len zian le guc queëtuꞌ, bdxin queëtuꞌ didzaꞌ buiꞌ zxön netuꞌ catiꞌ byö́nituꞌ ca réjlëꞌliꞌ Cristo.
8 Naꞌa, nuhuöác ládxiꞌtuꞌ le ryö́nituꞌ röꞌliꞌ tsutsu ca réjlëꞌliꞌ Xanruꞌ.
9 ¿Nacxcz gac guiëtuꞌ‑nëꞌ Dios: Xclenuꞌ, ca ral‑laꞌ guntuꞌ niꞌa qui yúguꞌtë le run ga rudziji ládxiꞌtuꞌ lahuëꞌ Dios queëruꞌ niꞌa qui le nacliꞌ lbiꞌiliꞌ?
10 Bayúdx rulidztuꞌ‑nëꞌ Dios, rnabtuꞌ lahuëꞌ rël len të dza quië gac uléꞌituꞌ lbiꞌiliꞌ len usaꞌtuꞌ le ryadzj queëliꞌ ca nac le réjlëꞌliꞌ Cristo.
11 Naꞌa rnabtuꞌ lahuëꞌ Xuzruꞌ Dios lencaꞌ Xanruꞌ Jesucristo, cuꞌë netuꞌ nöz ga gdxintuꞌ ga zoaliꞌ.
12 Lëzcaꞌ rnabtuꞌ lahuëꞌ Xanruꞌ gunëꞌ ga xön len gac gdu ca nadxiꞌiliꞌ lzaꞌliꞌ tuliꞌ yetuliꞌ, len ca nadxiꞌiliꞌ yúguꞌtë bunách, ca naꞌ netuꞌ nadxiꞌituꞌ caꞌ lbiꞌiliꞌ.
13 Rnabtuꞌ caꞌ lahuëꞌ gunëꞌ ga gac tsutsu len gdu dxiꞌa icj ládxiꞌdauꞌliꞌ lahuëꞌ Xuzruꞌ Dios ca rajlö́z le nac laꞌy, gunëꞌ cni ga gdxinr dza huödëꞌ Xanruꞌ Jesucristo, dzaggac Lëꞌ bunách laꞌy queëꞌ.