22
Tun xtídzaꞌquëꞌ ludöddëꞌ Jesús
1 Catiꞌ chzoa gdxin lni catiꞌ tahuëꞌ yöt xtil cunazíꞌ xnëꞌi, nazíꞌ lei Pascua lni naꞌ,
2 guludubëꞌ yuguꞌ bxuz uná bëꞌ len bönniꞌ gdauꞌ tuꞌsëdi. Taꞌzú taꞌböꞌë ludöddëꞌ Jesús, san cutu gulazáquiꞌnëꞌ le tádxinëꞌ bunách.
3 Niꞌr yajtság Judas Satanás tuꞌ xöhuiꞌ. Judas lëꞌ caꞌ Iscariote, len nababëꞌ idxínnutëꞌ gbaz nasölëꞌë Cristo.
4 Gyijëꞌ Judas naꞌ, yjë́ꞌlenëꞌ didzaꞌ yuguꞌ bxuz uná bëꞌ len bönniꞌ dë lu naꞌquëꞌ qui gdauꞌ, nacx gunëꞌ quië udödëꞌ Jesús lu naꞌquëꞌ.
5 Guludzijnëꞌ bönniꞌ gdauꞌ naꞌ, len gulazíꞌ lu naꞌquëꞌ lunödzjëꞌ queëꞌ dumí.
6 Rdzag ladxëꞌë Judas, atiꞌ rzu rböꞌë udödëꞌ Jesús lu naꞌquëꞌ bagachiꞌz.
Le ráguruꞌ rusáꞌ ládxiꞌruꞌ ca gutiëꞌ Xanruꞌ
7 Bdxin dza naꞌ tahuëꞌ yöt xtil cunazíꞌ xnëꞌi, catiꞌ ral‑laꞌ ludöddëꞌ‑baꞌ böꞌcuꞌ zxilaꞌ tahuëꞌ xtsöꞌ Lni Pascua.
8 Bsölëꞌë Pedro len Juan, Jesús, rnëꞌ:
―Gul‑tséaj, gul‑tsajpáꞌ queëruꞌ le gáguruꞌ dzöꞌ Lni Pascua.
9 Tëꞌ Lëꞌ:
―¿Gazx rëꞌnnuꞌ tsajpaꞌtuꞌ queëruꞌ?
10 Rëꞌ lequëꞌ Jesús, rnëꞌ:
―Gul‑yutscaꞌ, catiꞌ tsazliꞌ lu yödz ni, niꞌ grujëꞌ bönniꞌ dutsaguëꞌ lbiꞌiliꞌ, zunuꞌë röꞌö nis. Gul‑tséajlenëꞌ ga gdxíntëliꞌ yuꞌu ga tsaziëꞌ.
11 Gul‑guië́ꞌ xan yuꞌu naꞌ: “Bönniꞌ Usëdi rëꞌ liꞌ: ¿Gazx zoa yuꞌu lni ga gágulenaꞌ yuguꞌ bönniꞌ usë́d quiaꞌ xtsöꞌ Lni Pascua?”
12 Niꞌr uluiꞌinëꞌ lbiꞌiliꞌ tu yuꞌu zxön xtsaꞌ ga niꞌ chnabáꞌa. Gul‑páꞌ niꞌ le gáguruꞌ.
13 Niꞌr yjaquëꞌ len yajxácaꞌquëꞌ ca naꞌ chgudxëꞌ lequëꞌ Jesús, atiꞌ gulupë́ꞌë niꞌ le lahuëꞌ xtsöꞌ Lni Pascua.
14 Catiꞌ bdxin dzöꞌ naꞌ, gröꞌë Jesús ga lahuëꞌ, atiꞌ gulabö́ꞌlenëꞌ Lëꞌ tsazxö́n gbaz queëꞌ naꞌ.
15 Niꞌr Jesús rëꞌ lequëꞌ:
―Guctsca ladxaꞌa gágulenaꞌ lbiꞌiliꞌ tsazxö́n xtsöꞌ ni zíꞌatël catiꞌ ziꞌa sacaꞌ quiꞌa len gatiaꞌ.
16 Rëpaꞌ lbiꞌiliꞌ: Cutur gahuaꞌ lë ni catiꞌ gdxinr dza gac le ruluíꞌz xtsöꞌ ni ga niꞌ rna bëꞌë Dios.
17 Gdel‑lëꞌë zxígaꞌdauꞌ len gudxëꞌ Dios: “Xclenuꞌ.” Niꞌr rëꞌ lequëꞌ:
―Gul‑síꞌ lë ni len gul‑guíꞌaj latiꞌ hueaj,
18 le rëpaꞌ lbiꞌiliꞌ: Cutur guiꞌjaꞌ xisi uva catiꞌ gdxinr le rna bëꞌë Dios.
19 Niꞌr gdel‑lëꞌë yöt xtil len gudxëꞌ Dios: “Xclenuꞌ.” Gdöd niꞌ buzxuzxjëꞌ lei len bëꞌë qui queëquëꞌ, rnëꞌ:
―Lë ni nac gdu ca nayáꞌ nabanaꞌ le rudödaꞌ uláz queëliꞌ. Gul‑gún cni quië usáꞌ ládxiꞌliꞌ nedaꞌ.
20 Catiꞌ budx glahuëꞌ, lëzcaꞌ cni bëꞌë didzaꞌ qui zxígaꞌdauꞌ naꞌ, rnëꞌ:
―Zxígaꞌdauꞌ ni ruluíꞌ ca nac didzaꞌ cub rucáꞌn tsahuiꞌ, atiꞌ run tsutsu lei rön quiaꞌ, rön naꞌ glalj niꞌa queëliꞌ.
21 ’Naꞌa, röꞌë rágulenëꞌ nedaꞌ tsazxö́n bönniꞌ naꞌ udödëꞌ nedaꞌ lu naꞌgac bunách.
22 Le nactë huayijaꞌ ga ludöddëꞌ nedaꞌ, Bönniꞌ Nuhuöaquëꞌ Gdu Bunách, gac quiaꞌ ca naꞌ nayúj lu guich laꞌy ca ral‑laꞌ gac quiaꞌ, san bicaꞌ bayechiꞌ bönniꞌ naꞌ udödëꞌ nedaꞌ.
23 Niꞌr gulazú lauquëꞌ taꞌnabnëꞌ Lëꞌ tu tuëꞌ, taꞌnë́ꞌ:
―¿Núzxaltuꞌ nu gun cni?
Tuiꞌ xtídzaꞌquëꞌ núzxalquëꞌ gaquëꞌ blau
24 Niꞌr gluꞌë didzaꞌ laꞌ légaczëꞌ núzxalquëꞌ gdél‑liꞌnëꞌ latj blau.
25 Jesús gudxëꞌ lequëꞌ:
―Bönniꞌ taꞌná bëꞌë tuꞌgunëꞌ dxin yöl‑laꞌ uná bëꞌ quequëꞌ, taꞌná béꞌinëꞌ bunách, atiꞌ nup niꞌ dë lu naꞌgac yöl‑laꞌ uná bëꞌ, lëquëꞌ bönniꞌ taclen.
26 Lbiꞌiliꞌ cutu ral‑laꞌ gunliꞌ cni, san nu nac blau ladjliꞌ ral‑laꞌ gac ca nu nac cuídiꞌtër, atiꞌ nu rna bëꞌ ral‑laꞌ gac ca nu run dxin qui lzëꞌi.
27 ¿Nuzxal naꞌ nacr blau, nu naꞌ röꞌ ragu, o nu rupáꞌ laꞌ huagu? ¿Naruꞌ clëg nu naꞌ röꞌ ragu nacr blau? Nedaꞌ zóalenaꞌ lbiꞌiliꞌ ca nu rupáꞌ laꞌ huagu.
28 ’Lbiꞌiliꞌ ni gzóalenliꞌ nedaꞌ catiꞌ niꞌ bi guc quiaꞌ, yuguꞌ le gulazíꞌ bëꞌ nedaꞌ.
29 Qui lë ni naꞌ udödaꞌ lu naꞌliꞌ tu ga gna bëꞌliꞌ, ca naꞌ benëꞌ Xuzaꞌ, budödëꞌ lu naꞌa ga gna bëꞌa nedaꞌ.
30 Cni gunaꞌ quië gac cöꞌliꞌ, guiꞌj gágulenliꞌ nedaꞌ ga niꞌ gna bëꞌa, atiꞌ cöꞌliꞌ xlatjczliꞌ ga cuequi xbeyliꞌ idxinnu cöꞌ zxiꞌn xsoëꞌ Israel.
Rnëꞌ Jesús gnëꞌ Pedro cutu nunbëꞌë Lëꞌ
31 Gnëꞌ caꞌ cni Xanruꞌ:
―Simón, Simón. Byutscaꞌ. Chgnab lbiꞌiliꞌ Satanás tuꞌ xöhuiꞌ, quië uríx udö́d lbiꞌiliꞌ ca nu ruríx rudö́d zxoaꞌ xtil
32 san chbulidzaꞌ‑nëꞌ Dios gnabdaꞌ Lëꞌ gáclenëꞌ liꞌ, cui udx udú yöl‑laꞌ rejlëꞌ quiuꞌ nedaꞌ. Naꞌa, catiꞌ huöacuꞌ quiaꞌ, btip ládxiꞌquëꞌ böchiꞌ lzaꞌu.
33 Pedro rëꞌ Lëꞌ:
―Xan, chzoaꞌ sáꞌlenaꞌ Liꞌ, clëgz tsijaꞌ lidx guia, san lëzcaꞌ gátlenaꞌ Liꞌ.
34 Jesús rëꞌ lëꞌ:
―Pedro, rëpaꞌ liꞌ: Ziꞌal cödxbaꞌ zxiꞌn druz naꞌa, chgdáꞌbaguꞌu tsonn lzu, gnauꞌ cutu núnbëꞌu nedaꞌ.
Le benëꞌ Jesús catiꞌ chzoa ludöddëꞌ Lëꞌ
35 Gnabnëꞌ lequëꞌ Jesús, rnëꞌ:
―Catiꞌ bsölaꞌa lbiꞌiliꞌ cunuaꞌliꞌ yöxj yöt, ni bzud dumí, ni chop cöꞌ löl‑liꞌ, ¿naruꞌ bi byadzj queëliꞌ?
Lequëꞌ taꞌnë́ꞌ:
―Cutu bi.
36 Niꞌr rëꞌ lequëꞌ:
―Naꞌa, nu dë qui yöxj yöt ral‑laꞌ guaꞌ lei, atiꞌ lëzcaꞌ cni ral‑laꞌ gun nu dë qui bzud dumí, atiꞌ nu cudë́ qui guia tuchiꞌ ral‑laꞌ gutiꞌ lariꞌ rxoa yeni len siꞌ tu guia tuchiꞌ.
37 Rëpaꞌ lbiꞌiliꞌ: Run bayúdx gac quiaꞌ lë naꞌ nayúj lu guich laꞌy, rna: “Glunëꞌ queëꞌ ca tunëꞌ quegac nup tuaꞌ döꞌ”, le lutság yúguꞌtë le nayujgac lu guich ca ral‑laꞌ gac quiaꞌ.
38 Niꞌr lequëꞌ taꞌnë́ꞌ:
―Xan, ni dë chop guia tuchiꞌ.
Lëꞌ rëꞌ lequëꞌ:
―Chnac.
Jesús rulidzëꞌ Dios laꞌ yël Getsemaní
39 Niꞌr brujëꞌ Jesús len ca runczëꞌ zijëꞌ lu Guiꞌa Ga Röꞌgac Yag Olivo, atiꞌ zjáclenëꞌ Lëꞌ bönniꞌ usë́d queëꞌ.
40 Catiꞌ guladxinëꞌ niꞌ, rëꞌ lequëꞌ Jesús, rnëꞌ:
―Gul‑lidzëꞌ Dios, gnábiliꞌ‑nëꞌ cui gataꞌ latj siꞌ bëꞌ lbiꞌiliꞌ tuꞌ xöhuiꞌ.
41 Niꞌr gzëꞌë ga naꞌ nacuꞌë Jesús, gdödëꞌ yelatiꞌ tsca ga rdxin guiöj r‑ruꞌnruꞌ, atiꞌ niꞌ buzechu zxibëꞌ rulidzëꞌ Dios.
42 Rnëꞌ:
―Xuz, chquiꞌ rëꞌnnuꞌ, bcuas ga zoaꞌ lë naꞌ ral‑laꞌ sacaꞌ quiꞌa, san clëg ca rëꞌndaꞌ nedaꞌ, san ca rëꞌnnuꞌ Liꞌ gunuꞌ.
43 Niꞌr buluíꞌ lahuëꞌ gbaz laꞌy queëꞌ Dios, zëꞌë yehuaꞌ yubá, atiꞌ butipëꞌ ladxëꞌë Jesús.
44 Lu yöl‑laꞌ rsëbi ladxiꞌ queëꞌ, gdu ladxëꞌë bulidzëꞌ Dios Jesús, atiꞌ guc ca rön rabaꞌ luyú nis yös queëꞌ.
45 Catiꞌ budx bulidzëꞌ Dios, gyasëꞌ len böjëꞌ ga naꞌ nacuꞌë bönniꞌ usë́d queëꞌ, atiꞌ duxaquëꞌë lequëꞌ tasiëꞌ niꞌa qui yöl‑laꞌ ruhuiꞌni quequëꞌ.
46 Niꞌr Jesús rëꞌ lequëꞌ:
―¿Rástsaliꞌ? Gul‑tsás, gul‑lidzëꞌ Dios gnábiliꞌ‑nëꞌ cui gataꞌ latj siꞌ bëꞌ lbiꞌiliꞌ tuꞌ xöhuiꞌ.
Taꞌzönëꞌ Jesús
47 Tsal niꞌ ruꞌë didzaꞌ Jesús, laꞌ guladxintëꞌ niꞌ bönniꞌ zian, dzaguëꞌ lequëꞌ Judas, bönniꞌ naꞌ nababëꞌ idxinnuëꞌ bönniꞌ usë́d queëꞌ Jesús, atiꞌ nanörëꞌ lauquëꞌ bönniꞌ zian naꞌ. Gbiguëꞌë ga zoëꞌ Jesús quië utság lahuëꞌ Lëꞌ.
48 Niꞌr Jesús rëꞌ lëꞌ:
―Judas, ¿naruꞌ rudödtsuꞌ cni nedaꞌ, Bönniꞌ Nuhuöaquëꞌ Gdu Bunách, rutság lauꞌ nedaꞌ?
49 Catiꞌ gulaléꞌinëꞌ ca naꞌ rac queëꞌ Jesús bönniꞌ naꞌ nacuáꞌlenëꞌ Lëꞌ, tëꞌ Lëꞌ:
―Xan, ¿naruꞌ güiꞌtuꞌ lequëꞌ guia tuchiꞌ?
50 Tuëꞌ bönniꞌ usë́d queëꞌ Jesús benëꞌ huëꞌ guid naguëꞌ bönniꞌ huen dxin queëꞌ bxuz blau. Burixëꞌ guid naguëꞌ yubél.
51 Jesús rnëꞌ:
―Chnac naꞌa. Tscaꞌ gaz.
Gdanëꞌ Jesús guid naguëꞌ bönniꞌ huen dxin naꞌ len bunëꞌ lei.
52 Niꞌr rëꞌ yuguꞌ bxuz uná bëꞌ len bönniꞌ dë lu naꞌquëꞌ qui gdauꞌ len bönniꞌ gul tuꞌzejniꞌi, bönniꞌ naꞌ cutaꞌléꞌinëꞌ Lëꞌ dxiꞌa, rnëꞌ:
―¿Narújtsaliꞌ nuaꞌliꞌ guia tuchiꞌ len yag quië sönliꞌ nedaꞌ ca runliꞌ rzönliꞌ‑nëꞌ gban?
53 Yuguꞌ dza gzóalenczaꞌ lbiꞌiliꞌ nchil gdauꞌ, atiꞌ cutu bi benliꞌ quiaꞌ, san naꞌa chbdxin dza queëliꞌ, nac dza dë lu nëꞌi nu naꞌ zoa latj chul.
Rnëꞌ Pedro: “Cutu núnbëꞌa‑nëꞌ Jesús”
54 Niꞌr gulazönëꞌ Jesús len gulachë́ꞌë Lëꞌ ga naꞌ tuꞌschinëꞌ Lëꞌ lidxëꞌ bxuz blau. Pedro nahuëꞌ Jesús ziꞌtuꞌ ziꞌtuꞌz.
55 Catiꞌ chgulabequiëꞌ guiꞌ löꞌa lidxëꞌ bxuz blau niꞌa nëꞌë bxuz blau naꞌ, gulaböꞌë gdu zbiꞌil raꞌ guiꞌ naꞌ, atiꞌ Pedro grö́ꞌlenëꞌ lequëꞌ tsazxö́n.
56 Catiꞌ bléꞌibiꞌ‑nëꞌ Pedro tubiꞌ biꞌi ngul huen dxin, niꞌ röꞌzëꞌ raꞌ guiꞌ, buyubiꞌ lëꞌ, rnabiꞌ:
―Bönniꞌ ni dëꞌë caꞌ Jesús.
57 Gdáꞌbaguëꞌë Pedro, rnëꞌ:
―Ngul, cutu caꞌ núnbëꞌa‑nëꞌ bönniꞌ naꞌ.
58 Yelatiꞌ gdzey bléꞌinëꞌ Pedro yetúëꞌ bönniꞌ, atiꞌ rnëꞌ:
―Liꞌ daꞌu caꞌ lequëꞌ.
Pedro gnëꞌ:
―Bönniꞌ, clëg nedaꞌ.
59 Yelatiꞌz gdzey, gnëꞌ yetúëꞌ bönniꞌ:
―Le nactë bönniꞌ ni dëꞌë Jesús, le naquëꞌ bönniꞌ Galilea.
60 Niꞌr Pedro gnëꞌ:
―Bönniꞌ, cutu nözdaꞌ bizxa naꞌ ruꞌu didzaꞌ qui.
Tsal niꞌ ruꞌë didzaꞌ ni, laꞌ grö́dxtëbaꞌ zxiꞌn druz.
61 Niꞌr bueycjëꞌ Xanruꞌ ruyúëꞌ Pedro, atiꞌ yajneynëꞌ Pedro xtidzëꞌë Xanruꞌ, ca naꞌ gudxëꞌ lëꞌ: “Ziꞌal cödxbaꞌ zxiꞌn druz naꞌa, liꞌ chgdáꞌbaguꞌu tsonn lzu, gnauꞌ cutu núnbëꞌu nedaꞌ.”
62 Burujëꞌ niꞌl Pedro atiꞌ röncz grödxëꞌ.
Tuꞌtitjëꞌ Jesús
63 Gulutitjëꞌ Jesús bönniꞌ naꞌ zönquëꞌ Lëꞌ, atiꞌ gulaguinëꞌ Lëꞌ.
64 Niꞌr guluseyjëꞌ lahuëꞌ Jesús, atiꞌ gulagapëꞌë lahuëꞌ len gulanabnëꞌ Lëꞌ, taꞌnë́ꞌ:
―Gnë́yaꞌatscaꞌ. ¿Nuzxa naꞌ gdapaꞌ Liꞌ?
65 Zianr caꞌ gulanë́ꞌ queëꞌ le gluꞌë döꞌ queëꞌ.
Rdxinëꞌ Jesús lauquëꞌ bönniꞌ gdauꞌ taꞌbequi xbey
66 Catiꞌ chzaꞌ reníꞌ dza naꞌ, guludubëꞌ bönniꞌ gul tuꞌzéjniꞌnëꞌ bunách judío len yuguꞌ bxuz uná bëꞌ len bönniꞌ gdauꞌ tuꞌsëdi, atiꞌ gulachë́ꞌë Jesús lauquëꞌ bönniꞌ gdauꞌ taꞌbequi xbey, atiꞌ niꞌ gulanabnëꞌ Lëꞌ,
67 taꞌnë́ꞌ:
―Gdixjöiꞌ netuꞌ. ¿Naruꞌ nactsuꞌ Liꞌ Cristo?
Jesús rëꞌ lequëꞌ:
―Chquiꞌ gyëpaꞌ lbiꞌiliꞌ nacaꞌ Cristo, cutu tséjlëꞌliꞌ nedaꞌ,
68 len chquiꞌ unabdaꞌ lbiꞌiliꞌ tu didzaꞌ, cutu ubiꞌiliꞌ didzaꞌ, len cutu usanliꞌ nedaꞌ.
69 Naꞌa su lau, nedaꞌ, Bönniꞌ Nuhuöaquëꞌ Gdu Bunách, cöꞌa cuit lëꞌë yubél Dios, náptërëꞌ yöl‑laꞌ uná bëꞌ.
70 Gulanabnëꞌ Lëꞌ yúguꞌtëꞌ, taꞌnë́ꞌ:
―¿Naruꞌ nactsuꞌ Liꞌ Zxiꞌnëꞌ Dios?
Lëꞌ gudxëꞌ lequëꞌ:
―Le nacz rnaliꞌ.
71 Niꞌr taꞌnë́ꞌ:
―¿Nuzxar naquíniruꞌ nu gun lnaꞌ lau queëꞌ? Laꞌ rëꞌuz chbyö́niruꞌ didzaꞌ ruꞌë.