4
Rziꞌ bëꞌ Jesús Satanás tuꞌ xöhuiꞌ
1 Buzë́ꞌë Jesús raꞌ yegu Jordán, gdu zóalenëꞌ Lëꞌ Dios Böꞌ Laꞌy, atiꞌ Dios Böꞌ Laꞌy naꞌ bchëꞌë Jesús lu latj caꞌz.
2 Gzoëꞌ niꞌ Jesús gdu ca choaꞌ dza, atiꞌ gzxiꞌ bëꞌ Lëꞌ tuꞌ xöhuiꞌ quië gun ga gchíxinëꞌ Jesús. Cutu bi gdahuëꞌ Jesús yuguꞌ dza naꞌ, atiꞌ gdödr niꞌ rdunëꞌ.
3 Niꞌr gudx Jesús tuꞌ xöhuiꞌ naꞌ, rna:
―Chquiꞌ nacczuꞌ Liꞌ Zxiꞌnëꞌ Dios, gnatscaꞌ luhuöác yöt xtil guiöj ni.
4 Bubiꞌë didzaꞌ Jesús, rëꞌ lei:
―Nayúj lu guich, rna: “Clëgz yöt xtil nabánigac bunách, san nabánigac caꞌ yúguꞌtë xtidzëꞌë Dios.”
5 Niꞌr bchëꞌ Jesús tuꞌ xöhuiꞌ naꞌ ga nac tu lu guiꞌa sib atiꞌ tu chiꞌidauꞌz buluíꞌi Lëꞌ yúguꞌtë xlatjgac nup taꞌná bëꞌ yödzlyú.
6 Rë Jesús tuꞌ xöhuiꞌ naꞌ, rna:
―Gunnaꞌ quiuꞌ yúguꞌtë xlatjgac nup taꞌná bëꞌ ni len yöl‑laꞌ tsahuiꞌ quegac, le nadö́d lu naꞌa yúguꞌtë lë ni, atiꞌ nu rëꞌnzdaꞌ ruꞌa qui.
7 Chquiꞌ Liꞌ uzechu zxibuꞌ lahuaꞌ gunuꞌ nedaꞌ zxön, yúguꞌtë lë ni gaqui quiuꞌ.
8 Bubiꞌë didzaꞌ Jesús, rëꞌ lei:
―Bcuit ga zoaꞌ, Satanás, le nayúj lu guich laꞌy le rë netuꞌ, rna: “Xanuꞌ Dios tsej ladxuꞌu‑nëꞌ, len tuzëꞌ Lëꞌ gunuꞌ xchinëꞌ.”
9 Niꞌr bchëꞌ Jesús Jerusalén tuꞌ xöhuiꞌ naꞌ, atiꞌ budxía Lëꞌ cjuꞌu gdauꞌ, len rë Lëꞌ:
―Chquiꞌ nacuꞌ Zxiꞌnëꞌ Dios, busládzuꞌtscaꞌ cuinuꞌ ni
10 le nayúj lu guich laꞌy, rna:
Dios gsölëꞌë gbaz laꞌy queëꞌ, láclenëꞌ Liꞌ.
11 Lu naꞌquëꞌ luchisëꞌ Liꞌ
Cui tsajcheguꞌu guiöj, cugunuꞌ ziꞌ niꞌu.
12 Bubiꞌë didzaꞌ Jesús, rëꞌ lei:
―Nayúj lu guich laꞌy, rë netuꞌ: “Cutu siꞌ bëꞌu Xanuꞌ Dios.”
13 Catiꞌ cutu budzöli yetú le siꞌ bëꞌ Jesús tuꞌ xöhuiꞌ naꞌ, buzáꞌ ga zoëꞌ tu chiꞌidauꞌ.
Rzu lahuëꞌ Jesús runëꞌ xchinëꞌ luyú Galilea
14 Böjëꞌ Jesús luyú Galilea, dë lu nëꞌë yöl‑laꞌ huac queëꞌ Dios Böꞌ Laꞌy. Gzë didzaꞌ ca nac queëꞌ, atiꞌ gulayöni bunách nacuáꞌ yúguꞌtë yödz gdu zbiꞌil.
15 Busëdnëꞌ bunách Jesús gap nac lu yuꞌu ga tuꞌdubëꞌ tuꞌsëdëꞌ queëꞌ Dios bönniꞌ judío, atiꞌ glun Lëꞌ zxön yúguꞌtë bunách niꞌ.
Le benëꞌ Jesús yödz Nazaret, ga nac ladzëꞌ
16 Niꞌr budxinëꞌ Jesús yödz Nazaret ga niꞌ gzxönëꞌ. Catiꞌ bdxin dza laꞌy quequëꞌ bönniꞌ judío, ca runczëꞌ Jesús, gyaziëꞌ lu yuꞌu ga tuꞌdubëꞌ tuꞌsëdëꞌ queëꞌ Dios bönniꞌ judío, atiꞌ gzuinëꞌ quië ulabëꞌ tu le nayúj lu guich laꞌy.
17 Guludödëꞌ lu nëꞌë Jesús guich ga naꞌ nayúj didzaꞌ bëꞌë Isaías, bönniꞌ bëꞌë didzaꞌ uláz queëꞌ Dios. Catiꞌ bsaljëꞌ guich naꞌ, bdzölnëꞌ ga nayúj lu guich le rna:
18 Zóalenëꞌ nedaꞌ Böꞌ Laꞌy queëꞌ Xanruꞌ
Le nubijëꞌ nedaꞌ quizi queëꞌ
Quië quíxjöiꞌdaꞌ bunách yechiꞌ didzaꞌ dxiꞌa.
Bsölëꞌë nedaꞌ unaꞌ nup rac ziꞌ ládxiꞌdauꞌgac,
Len usyöndaꞌ nup nadzungac, ca gac lulá,
Len unaꞌ bunách nachúl laugac,
Len usláꞌ bunách zoa nu runi leygac ziꞌ,
19 Len gunaꞌ lban qui dza ruzáꞌ ladxëꞌë quegac bunách Xanruꞌ Dios.
20 Niꞌr butubëꞌ guich naꞌ Jesús len buguꞌë lei lu nëꞌë bönniꞌ run chiꞌë yuguꞌ guich laꞌy, atiꞌ gröꞌë. Niꞌr gulanáꞌ Jesús yúguꞌtë nup nudubgac lu yuꞌu naꞌ.
21 Gzu lahuëꞌ Jesús rëꞌ lequëꞌ:
―Naꞌa dza ni zoaliꞌ lbiꞌiliꞌ, rudxíncz le nayúj lu guich ni.
22 Gulanë́ꞌ dxiꞌa queëꞌ yúguꞌtëꞌ, len gulubannëꞌ ca nac didzaꞌ dxiꞌa ruꞌë, atiꞌ taꞌnë́ꞌ:
―¿Naruꞌ clëg bönniꞌ ni zxiꞌnëꞌ José?
23 Rëꞌ lequëꞌ Jesús, rnëꞌ:
―Nazx huëliꞌ nedaꞌ lë ni taꞌná bunách, le rna: “Liꞌ, bönniꞌ ruún bunách, bun cuinuꞌ.” Lëzcaꞌ cni huëliꞌ nedaꞌ: “Yuguꞌ le byö́nituꞌ benuꞌ Capernaum, ben caꞌ ga ni nac ladzuꞌ.”
24 Gnëꞌ caꞌ Jesús:
―Le nactë rëpaꞌ lbiꞌiliꞌ, chquiꞌ zoëꞌ bönniꞌ ruꞌë didzaꞌ uláz queëꞌ Dios, cutu tun lëꞌ ba laꞌn bunách uládz queëꞌ.
25 Le nactë rëpaꞌ lbiꞌiliꞌ, gulacuaꞌnu zian ngul uzë́b luyú Israel yuguꞌ dza niꞌ zoëꞌ Elías, bönniꞌ bëꞌë didzaꞌ uláz queëꞌ Dios, catiꞌ niꞌ cutu gul guiöj gdu ca tsonn iz yu xop beoꞌ atiꞌ guc gbin luyú naꞌ,
26 san Dios cutu bsölëꞌë Elías naꞌ ga nacuaꞌnu ngul uzë́b nacuaꞌnu luyú Israel, san bsölëꞌë lëꞌ ga naꞌ zoanu ngul uzë́b lu yödz Sarepta, le nabáb yödz Sidón.
27 Lëzcaꞌ cni, gulacuáꞌ luyú Israel zian nup teꞌi huëꞌ nudzuꞌ ruzö́d dza niꞌ zoëꞌ Eliseo, bönniꞌ bëꞌë didzaꞌ uláz queëꞌ Dios, san cutu böaquëꞌ nitúëꞌ bönniꞌ nutsëꞌë ladj bunách Israel naꞌ, san böaquëꞌ tuzëꞌ Naamán, bönniꞌ nababëꞌ luyú Siria.
28 Catiꞌ gulayönnëꞌ didzaꞌ ni, gulaleynëꞌ yúguꞌtë bönniꞌ nacuꞌë lu yuꞌu ga naꞌ tuꞌdubëꞌ tuꞌsëdëꞌ queëꞌ Dios.
29 Niꞌr gulayasëꞌ len gulubijëꞌ Jesús niꞌl raꞌ yödz. Gulachë́ꞌë Lëꞌ ga nac lëꞌi guiꞌa guiöj ga naꞌ dë ladzquëꞌ quië lusládzuꞌë Lëꞌ ga nac lëꞌi guiꞌa guiöj naꞌ.
30 Niꞌr gdödëꞌ Jesús gatsj lahuiꞌl ga naꞌ nacuꞌë, zhuöjtëꞌ.
Tu bönniꞌ yuꞌu lëꞌ böꞌ xöhuiꞌ
31 Niꞌr gyijëꞌ Jesús yödz Capernaum luyú Galilea, atiꞌ niꞌ busëdnëꞌ bunách yuguꞌ dza laꞌy quequëꞌ bönniꞌ judío.
32 Gulubannëꞌ ca nac le rusëdnëꞌ lequëꞌ Jesús, le bëꞌë didzaꞌ ca tu bönniꞌ dë lu nëꞌë.
33 Zoatëꞌ caꞌ niꞌ lu yuꞌu ga naꞌ tuꞌdubëꞌ tuꞌsëdëꞌ queëꞌ Dios bönniꞌ yuꞌu lëꞌ böꞌ xöhuiꞌ, atiꞌ bëꞌë zidzj didzaꞌ,
34 rnëꞌ:
―Bsan netuꞌ. ¿Bizxa rál‑laꞌtuꞌ quiuꞌ, Jesús, bönniꞌ Nazaret? ¿Naruꞌ zaꞌu usnitiuꞌ netuꞌ? Núnbëꞌa Liꞌ nu nacuꞌ. Bönniꞌ Laꞌy queëꞌ Dios nacuꞌ.
35 Buzeynëꞌ ba nadx böꞌ xöhuiꞌ naꞌ Jesús, rëꞌ lei:
―Bseyj ruꞌu len burúj lu bönniꞌ ni.
Niꞌr gruꞌn lyu bönniꞌ naꞌ böꞌ xöhuiꞌ naꞌ laugac bunách nacuáꞌ niꞌ len burujtë lu bönniꞌ naꞌ, san cutur bi ben queëꞌ.
36 Gulubannëꞌ yúguꞌtëꞌ len gluꞌë didzaꞌ tuëꞌ len yetúëꞌ, taꞌnë́ꞌ:
―¿Bizxa didzaꞌ ni ruꞌë? Len yöl‑laꞌ uná bëꞌ len yöl‑laꞌ huac zxön rna béꞌinëꞌ yuguꞌ böꞌ xöhuiꞌ, atiꞌ tuꞌrujtë böꞌ xöhuiꞌ naꞌ.
37 Gzë didzaꞌ ca nac queëꞌ Jesús, atiꞌ gulayöni bunách yúguꞌtë yödz gdu zbiꞌil.
Ruúnëꞌ Jesús xnaꞌnu ngul queëꞌ Pedro
38 Niꞌr gyasëꞌ Jesús len burujëꞌ lu yuꞌu ga naꞌ tuꞌdubëꞌ tuꞌsëdëꞌ queëꞌ Dios, atiꞌ gyaziëꞌ lidxëꞌ Simón. Niꞌ zoanu xnaꞌnu ngul queëꞌ Simón naꞌ, yuꞌunu tu xla, atiꞌ glátaꞌyuëꞌ lahuëꞌ Jesús unëꞌ‑nu.
39 Gbiguëꞌë Jesús ga naꞌ dënu, atiꞌ bulidzëꞌ huëꞌ xla naꞌ yuꞌunu. Laꞌ brujtë tu xla naꞌ yuꞌunu, atiꞌ laꞌ gyástënu len bëꞌnu le glahuëꞌ.
Ruúnëꞌ Jesús zian nup teꞌi
40 Catiꞌ chrbia gbidz, guladxín niꞌ yúguꞌtë nup nacuaꞌlen lequëꞌ nup naꞌ teꞌi qui queëgac guidzhuë́ꞌ, atiꞌ yjuaꞌquëꞌ leygac ga naꞌ zoëꞌ Jesús. Lëꞌ bxoa nëꞌë nup naꞌ teꞌi, bunëꞌ leygac.
41 Gulurúj caꞌ zian böꞌ xöhuiꞌ yuꞌugac bunách teꞌi naꞌ. Taꞌbödxyaꞌa böꞌ xöhuiꞌ, taꞌná:
―Liꞌ nacuꞌ zxiꞌnëꞌ Dios.
Niꞌr buzeynëꞌ ba nadx yuguꞌ böꞌ xöhuiꞌ naꞌ Jesús, len cutu bëꞌë latj laꞌná, le nö́zigac naquëꞌ Cristo.
Runëꞌ Jesús lban luyú Galilea
42 Catiꞌ zaꞌ reníꞌ yetú dza, brujëꞌ Jesús Capernaum naꞌ, atiꞌ gyijëꞌ tu latj caꞌz. Niꞌ guluguílj Jesús bunách zian. Catiꞌ guladxinëꞌ ga naꞌ zoëꞌ, glëꞌnnëꞌ lutseynëꞌ Lëꞌ, cui uzë́ꞌë ga naꞌ nacuꞌë.
43 Niꞌr gudxëꞌ lequëꞌ Jesús, rnëꞌ:
―Run bayúdx tsijaꞌ gap nacuáꞌ yezicaꞌ yödz, tsjenaꞌ caꞌ niꞌ lban qui didzaꞌ dxiꞌa ca rna bëꞌë Dios. Qui lë ni naꞌ bsölëꞌë nedaꞌ ni.
44 Cni guc, benëꞌ lban yuguꞌ yödz luyú Galilea len gap nac lu yuꞌu ga tuꞌdubëꞌ tuꞌsëdëꞌ queëꞌ Dios bönniꞌ judío.