5
To yiche, na' Bennen' nake' Ẕíla'do'
1 Naž bḻe'ela' to yiche ḻo na' ḻi ža che Bennen' ži'e latje blon'. Yichen' naken to yiche ndoben, na' zej žian diža' žope ḻa'alen. Nyejwn yichen' ḻen gaže da' zej nak bian'.
2 Bḻe'ela' to wbás blo che ya'abá, na' wnníe' zižje, na' wnné': “¿Noẕ benne' nake' zi choge' da' ka' zej nak bian' da' zej nox̱en yichen', na' saljwen'?”
3 Bi gok nitó benne' saljwe' yichen', na' bi gok no benne' wien', nitó benne' zoe' ya'abá che Dios, na' nitó benne' zoe' yežlyó, na' nitó benne' zoe' ẕanle yežlyó.
4 Naž wžeža' neda' dan' bi bžeḻ-le no benne' nake' zi saljwe' yichen', na' nitó benne' nake' zi goḻen', na' nitóe' nake' zi wien'.
5 Naž to benne' golen' gože' neda', na' wnné': “Bi kwežo'. Bennen' nake' ka to beže yix̱e', Bennen' nbábḻene' ẕa'só Judá, na' nake' ẕa'só Dabí. Ḻe' ba bzoele' yógo'te da' gókgaken chie'. Ḻekze' nake' zi choge' da' ka' zej nox̱en yichen', na' wsaljwen'.”
6 Naž bḻe'ela' Bennen' nake' Ẕíla'do' che Dios, na' zie' ḻaw Benne' ži'e latje blon', da' zoan gachje ḻáwe'le gan zej nnita' benne' ban ka', na' benne' gole ka'. Žíagak Ẕíla'don' we' kan žíagak to ẕila', bian' bétgake'-ba' ḻaw Dios, na' žíagak gaže lozba', na' gaže yej ḻawba', da' ka' ẕḻoé'egeklen kan zej nak gaže be' ka' žónḻengaken Dios tẕen, be' ka' žseḻe'e dot yežlyó.
7 Wdé Bennen' nake' Ẕíla'do', na' bex̱we' yichen' da' žian ḻo na' ḻi ža che Bennen' ži'e latje blon'.
8 Kate' bex̱we' yichen', na' tape benne' ban ka' ḻen tape žoa benne' gole ka' bzoa ẕíbgake' ḻaw Bennen' nake' Ẕíla'do'. To to benne' gole ka' zej noe'e to da' ẕgóḻgake', da' ka' zej nzin' arpa, na' ḻezka' zej noe'e béga'do' ka' da' zej naken oro, na' yóžgaken yale, dan' ẕḻoe'elen yeḻa' ẕchaḻjḻen Dios chegak benne' chie' ka'.
9 Žóḻgake' to da' kobe da' ẕka'n ẕenen Ẕíla'don', dan' ẕnnan ki:
Nako' Le' zi gox̱o' yichen',
na' chogo' da' ka' zej nox̱en',
dan' bi'o latje benne' ka' bétgake' Le',
na' ḻen x̱cheno' beya'o benách ka' nich gákgake' che Dios,
zej nake' benách ka' nníta'gake' dot yežlyó,
benách ka' ẕcháḻjgake' yógo'te diža' yoble ka',
na' zej nbabe' yógo'te yež ka' zej nnitan' dot yežlyó.
10 Beno' ga zej nake' benne' wnná bia' ka',
na' ga zej nake' bx̱oz ka' che Dios chežo.
Beno' ga ẕnna biá'gake' yežlyó.
11 Naž bwia', na' benla' chi'igak wbás zan che ya'abá. Wbás zan gole kwis nníta'gake'. Zégake' kwit latje blon' tẕen ḻen benne' ban ka', na' ḻezka' ḻen benne' gole ka'.
12 Wnnégake' zižje yógo'tegake', na' wnnágake':
¡Bennen' nake' Ẕíla'do', bian' bétgake'-ba',
nake' zi si' ḻo ne'e yeḻa' wnná bia',
na' yeḻa' wnni'a, na' yeḻa' žejní'il, na' yeḻa' wak!
¡Nake' zi gapžo-ne' ba la'ne, na' chejḻe'žo chie', na' wká'n ẕenžo-ne'!
13 Naž benla' žoḻgak yógo'te da' ben Dios, da' ka' zej nnitan' ya'abá chie', na' ḻo yežlyó, na' ẕanle yežlyó, na' ḻo nisdo'. Žoḻgak yógo'te da' zej nnitan' latje ka', na' wnnágaken:
¡Ga'n ẕen Bennen' ži'e latje blon',
na' ḻezka' Bennen' nake' Ẕíla'do'!
¡Gápetezžo-ne' ba la'ne, na' wká'n ẕenžo-ne'!
¡Nna biá'teze' Ḻe'!
14 Tape benne' ban ka' wnnágake': “¡Ka'kze gaken!”
Naž tap žoa benne' gole ka' bzechw ḻáwgake' ḻo yote, na' bka'n ẕéngake' Bennen' zóateze'.