4
1 Timoteo, kanya kan wa pixabꞌanik chawe chwach ri Dios y chwach ri Qanimajawal Jesucristo, ri kakꞌun tanchi wara che ruwachulew re koꞌltaqana pakiwi konoje y re koluꞌqꞌata tzij pakiwi taq ri tikawex, ri e kꞌaslik y ri ekaminaq.
2 Chayaꞌa awibꞌ che utzijoxik Ruchꞌaꞌtem ri Dios. Chatok il che utzijoxik waꞌ chupa ruqꞌijol o tobꞌ ne na chupa ta ruqꞌijol. Chaqꞌalajisaj taq ri na utz taj, chachꞌaꞌbꞌej kipa taq ri kakiꞌan ri na utz taj, chebꞌapixabꞌaj rukꞌ saqil kꞌutunik chaꞌ kakitzelej kitzij. Chaꞌana kꞌu waꞌ rukꞌ unimal akꞌuꞌx.
3 Ma kopon ri qꞌij echiriꞌ taq ri winaq na kakaj taj kakita ri saqil kꞌutunik. Yey ruma taq ri kirayibꞌal kekitzukuj china kekꞌutuw chike saꞌ ri kakaj kakito.
4 Rike na kakaj taj kakita ri Qꞌijsaq y e kakiternabꞌej taq tzijobꞌal xa noꞌjital kuma winaq.
5 Noꞌj riꞌat Timoteo, e lik kꞌola anaꞌoj puwi taq ri kaꞌano. Chakuyu ronoje taq ri kꞌaxkꞌobꞌik kape pawiꞌ. E chayaꞌa awibꞌ che utzijoxik ri Utzilaj Tzij re kolobꞌetajik. Chaꞌana kꞌu chi utz ronoje ri chak yaꞌtal paqꞌabꞌ.
6 Kambꞌiꞌij kꞌu waꞌ chawe ma riꞌin na naj ta chi in kꞌaslik, ri nubꞌenam chilaꞌ chikaj xa naqaj chi kꞌo wi.
7 Xinchꞌij uchuqꞌabꞌ ronoje ri kꞌaxkꞌobꞌik xinikꞌow wi, xinopon kꞌu che ri kꞌisbꞌal re ri nuchak uyaꞌom ri Dios, lik nutzijom chi jusukꞌ ri Utzilaj Tzij re ri Cristo.
8 Ekꞌu woꞌora xew chi woyeꞌem ri corona kayaꞌ chwe ruma ximbꞌin jusukꞌ chwach ri Dios. Y ri kayaꞌw waꞌ chwe e ri Qanimajawal Jesucristo, ri Aj Qꞌatal Tzij lik jusukꞌ. Y waꞌ na xew ta chwe riꞌin kuyaꞌo, ma kuya chike konoje ri koyeꞌem rukꞌunibꞌal rukꞌ ronoje kanimaꞌ.
Ri Pablo karaj karil uwach ri Timoteo
9 Matmayinik, e chatpeta tan che wilik.
10 Ma ri Demas xinroqꞌotaj kanoq ruma lik xeꞌek ukꞌuꞌx chwi taq ruqusil ruwachulew y xeꞌek Tesalónica. Y ri Crescente bꞌenaq Galacia yey ri Tito bꞌenaq Dalmacia.
11 Xew kꞌu ri Lucas inrachbꞌilam wara. Echiriꞌ katpetik, chakꞌama lo ri Marcos awukꞌ ma rire lik toꞌbꞌel we chupa ruchak ri Dios.
12 Ekꞌu ri Tíquico xintaq bꞌi Éfeso.
13 Echiriꞌ katpetik, chakꞌama lo ri pisbꞌal wij nuyaꞌom kan chirocho ri Carpo chupa ri tinamit Troas y chakꞌama taq lo ri jubꞌotaj wuj; yey ri lik kajawax chwe e ri jutaq bꞌotaj tzꞌuꞌum tzꞌibꞌital uwach.
14 Rachi Alejandro ri aj chꞌayal chꞌichꞌ lik uꞌanom taq ri na utz taj chwe. Ekꞌu ri Dios katojow re che saꞌ taq ri uꞌanom.
15 Lik chachajij kꞌu awibꞌ riꞌat chwach rire ma lik uyakom ribꞌ chirij ri Utzilaj Tzij kaqatzijoj.
16 Ri nabꞌe laj echiriꞌ xintoꞌbꞌej wibꞌ pa qꞌatbꞌal tzij, na jinta junoq xtoꞌw we ma konoje xinkoqꞌotaj kanoq; na rukꞌ ta kꞌu riꞌ, riꞌin na kuaj taj e ri Dios kuqꞌat tzij pakiwiꞌ ruma waꞌ.
17 Noꞌj ri Qanimajawal xkꞌojiꞌ wukꞌ, xinutoꞌo y xuya nuchuqꞌabꞌ chaꞌ wuma riꞌin xel utzijoxik ri Utzilaj Tzij y xkita kꞌu waꞌ ri tikawex re ukꞌiyal tinamit. Jekꞌulaꞌ xinkolobꞌex riꞌin chwa ri kamik, e pachaꞌ junoq xesax puchiꞌ juna koj.
18 Yey e ri Qanimajawal kinkolobꞌen chwach taq ri na utz taj y kinuchajij kꞌut chaꞌ kinopon na rukꞌ chilaꞌ chikaj pa kataqan wi. Xew kꞌu che Rire taqal wi lik kayak uqꞌij na jinta utaqexik. Amén.
Kꞌisbꞌal uchꞌaꞌtem ri Pablo che ri Timoteo
19 Chayaꞌa rutzil kiwach ri Priscila y ri Aquila junam kukꞌ konoje ri e kꞌo pa rocho ri Onesíforo.
20 Ri Erasto xkanaj kan pa ri tinamit Corinto y ri Trófimo xinya kan pa ri tinamit Mileto ma lik yewaꞌ.
21 Matmayinik, e chatpeta tan echiriꞌ kꞌamajaꞌ kujeq ruqꞌijol echiriꞌ kꞌax tew y kꞌo jabꞌ. Kakiya pan rutzil awach ri Eubulo, ri Pudente, ri Lino, ri Claudia kukꞌ konoje ri hermanos e kꞌo wara.
22 Kꞌola kꞌu ri Qanimajawal Jesucristo awukꞌ. Ri unimal rutzil ukꞌuꞌx Rire kꞌola piwiꞌ iwonoje riꞌix. Amén.