Ri carta xutzꞌibꞌaj ri Pablo che ri Tito
1
Ri Pablo kuya pan rutzil uwach ri Tito
1 Riꞌin in Pablo, in aj chak re ri Dios yey in taqoꞌn re ri Qanimajawal Jesucristo. Ri chak uyaꞌom chwe e kebꞌenutoꞌ ri ebꞌuchaꞌom Rire chaꞌ kakubꞌiꞌ kikꞌuꞌx rukꞌ, kaketaꞌmaj chi utz ri Qꞌijsaq y kebꞌin jusukꞌ chwach
2 chaꞌ jelaꞌ kakikubꞌaꞌ kikꞌuꞌx che ukꞌulik ri kikꞌaslemal na jinta utaqexik. Ma ri Dios xubꞌiꞌtisij lo wa kꞌaslemal echiriꞌ kꞌamajaꞌ kajeqer lo ruwachulew, y Rire na kuꞌan ta raqꞌubꞌal.
3 Yey echiriꞌ xopon ruqꞌijol re kaqꞌalajisax ri Utzilaj Tzij, ri Dios Qakolobꞌenel xuya panuqꞌabꞌ kantzijoj waꞌ chikiwach ri tikawex.
4 Kantzꞌibꞌaj kꞌu pan waꞌ wa carta chawe riꞌat Tito, ri paqatzij wi at pachaꞌ nukꞌajol chupa rubꞌiꞌ ri Cristo, ma junam ri kubꞌulibꞌal qakꞌuꞌx rukꞌ Rire. Chakꞌulu kꞌu ri unimal rutzil kꞌuꞌxaj, ri kꞌaxnaꞌbꞌal kꞌuꞌxaj y ri utzil chomal re ri Qaqaw Dios y re ri Qanimajawal Jesucristo Qakolobꞌenel.
Ruchak ri Tito chupa ri isla Creta
5 Riꞌin xatinya kan chilaꞌ chupa ri isla Creta chaꞌ kayijbꞌaꞌ taq ri chaqal kan uꞌanik y kebꞌakoj kꞌu e aj wach pa riglesia chujujunal tinamit, jelaꞌ pachaꞌ ri ximbꞌiꞌij kan chawe.
Ri bꞌinik silabꞌik taqal chike ri e aj wach y ri e aj kꞌamal kiwach rutinamit ri Dios
6 E juna aj wach re riglesia lik chirajawaxik jusukꞌ rubꞌinik usilabꞌik chaꞌ na jinta kachꞌaꞌtibꞌen re. Kꞌola jusukꞌ rukꞌ ri rixoqil yey ri ralkꞌoꞌal chirajawaxik kikojom rubꞌiꞌ ri Cristo, e kojol tzij y na katataj ta kꞌu chike e aj mak o e titzꞌitaq.
7 Ekꞌu riꞌ ri yaꞌtal che kuꞌana aj kꞌamal kiwach rutinamit ri Dios, lik chirajawaxik e jusukꞌ rubꞌinik usilabꞌik chaꞌ na jinta kachꞌaꞌtibꞌen re, muꞌan nim chiribꞌil ribꞌ, na chꞌiꞌchꞌoj ta ukꞌuꞌx, na qꞌabꞌaꞌrel taj, na aj chꞌaꞌoj taj, na rayinel taj re puaq kachꞌak rukꞌ sokosoꞌnik.
8 Yey chebꞌukꞌulu chi utz taq ri kebꞌopon chirocho, chuyaꞌa ukꞌuꞌx che uꞌanik ri utz, lik chuchꞌobꞌo chi utz ri kuꞌano, chuꞌana ri lik jusukꞌ, lik chuyaꞌa ribꞌ puqꞌabꞌ ri Dios y lik churiqa uchajixik ribꞌ chwach ronoje ri na utz taj.
9 E chutaqej ri saqil Utzilaj Tzij re ri Dios kꞌutum chwach chaꞌ jelaꞌ kuriq kapixabꞌan rukꞌ chomilaj kꞌutunik y kukoj waꞌ pa kijolom ri tikawex, ri kakibꞌiꞌij na qatzij ta wa kꞌutunik.
Taq ri kakiꞌan kꞌutunik na saqil taj
10 Ma lik e kꞌi ri e titzꞌitaq, kakikꞌut ri na jinta uchak y e sokosoꞌnel. Y chike taq waꞌ e kꞌo ri lik kebꞌok il che ri retalil re circuncisión.
11 Maya kꞌu luwar chike waꞌ wa winaq kekꞌutunik, ma kakisachisaj kinaꞌoj ukꞌiyal familias rukꞌ ri kikꞌutunik. Rike xew kakaj kebꞌeyomar rukꞌ ri kꞌutunik kakiꞌano yey waꞌ lik kꞌixbꞌal uwach.
12 Ojertan kꞌo jun qꞌalajisanel aj Creta, jewaꞌ xubꞌiꞌij chwi rutinamit rire: “Ri e aj Creta lik xex wi e aj raqꞌul, pachaꞌ e itzel chikop, lik e japjatel y lik e xepuꞌabꞌ” xchaꞌ.
13 Yey ri xubꞌiꞌij waꞌ waꞌchi lik qatzij; e uwariꞌche chirajawaxik lik chachꞌaꞌbꞌej kipa chaꞌ ketikiꞌ chupa ri saqil kꞌutunik,
14 y jekꞌulaꞌ na kebꞌok ta il che taq ri tzijonik xa kimololem raj judiꞌabꞌ y na kebꞌok tane il che ri taqanik ke ri winaq kiyaꞌom kan ri Qꞌijsaq.
15 E junoq saqil runaꞌoj, ronoje ri chom chwach ri Dios, riꞌ e lik chom chwach rire. Noꞌj ri sachinaq runaꞌoj, ri na kukoj ta ri Qꞌijsaq, riꞌ ronoje lik chꞌul chwach ma chꞌul runaꞌoj y ri ranimaꞌ; y jekꞌulaꞌ na kunaꞌbꞌej taj saꞌ ri chom y saꞌ ri na chom taj.
16 Tobꞌ kubꞌiꞌij retaꞌam uwach ri Dios; pero rukꞌ ri kuꞌano, kaqꞌalajinik na retaꞌam ta uwach. Ma xaqi itzel ukꞌuꞌx, aj palajiy tzij y na jinta kꞌana utz kuꞌan chwach ri Dios.