38
Yuda da Tamar Nan Gan
1 Mingꞌa gubuꞌ igi da Yuda itangin rain rusan rai da iruꞌ i ruta garam bits mpada Adulam binganggan Hira.
2 Mpadan nigi da Yuda iwaꞌ da garam Kanan bits, binganggan Sua, narun finam. Arangan iyu da irut impai.
3 Da sagat iwangun da irim arangan narunggan marub mangan da inuꞌ arangan binganggan Er.
4 Impai da sagat igi itip iwangun da irim narun marub mangan da ifaringꞌ i binganggan Onan.
5 Impai da arangan itip iwangun da irim narun marub mangan imingꞌ gamp Kedzib da inuꞌ arangan binganggan Sela.
6 Gubuꞌ Yuda narunggan marub miamun Er suda garam sib, da ramanggan iyu sagat mangan rutin, binganggan Tamar.
7 Da bitsintaꞌ Er iwaꞌ maisan imingꞌ Yawe maranggan da Yawe yis arangan funub.
8 Da Yuda ini da Er rainggan Onan ibiani, “Warut rainggam sagat yarufan wagingꞌ natsungꞌ agi sanabangꞌ, i rima narun rutin i utusa u rainggam yanginggan rungꞌ fadan.”
9 Da bitsintaꞌ Onan isruꞌgin sib ibi mamaꞌ narun igi wasangꞌ i suda arangan gan u, ibinigi da gubuꞌ arangan ruta rainggan sagat yarufan igi gingꞌan da inang da iyats mpui iran gan rai iruꞌ intap i Tamar anungꞌ wangundan da rima narun i utusa rainggan yanginggan u.
10 Yawe itsangan Onan sanaban nangan igi iwaꞌ maisan i maranggan, da yis arangan funub.
11 Yuda irat i narunggan Sela mampan bida rain rusan ugu. Ibinigi da ini da bunggan Tamar ibiani, “Watip wafan da wampa ramanggam gampan nabi sagat yaruf nasangꞌ dzi narunggangꞌ Sela yingꞌa suda garam sib.” Ibinigi da Tamar itip ifa ramanggan gampan i ruta riban mpadan.
12 Yuda impai nigi gubuꞌ guntiꞌ bingan da arangan fininggan, Sua narun finam, imamp. Arangan impai isangꞌ arangan maran dzidziwandan, da arangan irut rinunggan Hira, garam Adulam, ifa Timna i tsanganda garaman trapa arangan dumpa gan rinifufun.
13 Gubuꞌ rib fain nida sisingꞌ da Tamar nida binaꞌ, “U bunggam ini fada Timna i trapa dumpa gan rinifufun,”
14 da Tamar igruꞌ umpuafan rai da ipatiꞌ gudzun da maran sib i bruꞌ paparatan i manga anungꞌ faringꞌa arangan u, da impa gamp Inaim muantsi nifunggan imingꞌ sanab fada gamp Timna. Arangan itsangan ibi Sela isu garam sib da Yuda watsungꞌ nan gan i Sela uda arangan suda i fininggan u.
15 Ibinigi da gubuꞌ Yuda tsanganda arangan da ini sagat sanab angu gin, i arangan ipatiꞌ maran sib.
16 Arangan anungꞌ isruꞌgin ibi arangan bunggan u, da yis sanab udziꞌ ifan da ini, “Amaꞌ. Dzi ni ruta agu gingꞌan.”
Da arangan ini, “Bida u ruta dzi gingꞌan da u burima nam idzuwai da dzi?”
17 Da Yuda ini, “Dzi bungꞌ atangin nuning naru faꞌ bits mingꞌa dzi apu gangꞌ mpada tayangꞌ gin naba da agu.”
Da Tamar itip igutin, “Hai. Da isangꞌ u rima nam mangan mungꞌ da dzi i santingꞌa bida u ni nan nidzun da dzi, nasangꞌ u rima nigi badan?”
18 Da arangan ini, “U maram yari i nam idzuwai arigi i dzi riman da agu?”
Da Tamar ini, “U nanggam sungundan suda u maram nampruꞌ da u itipam yunga gin.” Ibinigi da Yuda irim da arangan da irut igingꞌ da arangan iwangun.
19 Tamar itiri Yuda rai da ifan. Da igruꞌ bruꞌ paparatan buafira maran sib in ugu rai, da itip yatsuf umpuafan.
20 Yuda itangin rinunggan Hira, garam Adulam ugu, i uda nuning naru faꞌ i fada da sagat ruta gingꞌan ugu da tipa uda i gan nanggan riman rutin ugu, da bitsintaꞌ isau arangan wasi.
21 Da igut i garam mpadan nigi ini binaꞌ, “Sagat sanab mpada sanab ringan Inaim ani impa anungꞌ?”
Da rib igi ini binaꞌ, “Sagat sanab mangan wampai ani mangan u.”
22 Ibinigi da arangan itip ifan da ini da Yuda ibiani, “Dzi sau sagat arangan da dzi wawaꞌ rutin u. Garam mpadan naga ini da dzi ibiani, ‘Sagat sanab mangan wampai ani mangan u.’ ”
23 Da Yuda ini, “Arangan runayu nam igi. Dzi bugin agi rusaudan da ampan rubungꞌa ruan i agi. Dzi rim nuning igi ifan da arangan ibi dzi nida rutin ugu. Da bitsintaꞌ u wawaꞌ da arangan u. Da isangꞌ i.”
24 Ukam iruꞌ da bits ifa sib da rib fain ini da Yuda ibiani, “U bunggam Tamar inang runggan ibi sagat sanab. Da aruani da arangan iwangun sib.”
Da Yuda ini, “Wayu arangan waba da wafanga i dzaf nasangꞌ arangan mampan.”
25 Gubuꞌ garam uda arangan waꞌa ba, da arangan irim nam bunggan riman ugu da sisingꞌ ibiani ifan da bunggan, “Garam suda wain i nam bida ani iwaꞌ da dzi, da dzi wangun. Watsangan da wafaringꞌ i manga nam maranggan da itipan yunga gin ani.”
26 Yuda isruꞌgin da ini, “Arangan wanang asub u; dzi su asub. Arangan inang sanab igi i dzi warim arangan da narunggangꞌ Sela ibi dzi nidan.” Da Yuda watip irut igingꞌ u.
27 Tamar gubuꞌ gan nanga i apingꞌan da mamaꞌ marub bampungꞌ imingꞌ arangan wangun wasaꞌ.
28 Gubuꞌ aru arangan apingꞌan igi da mamaꞌ narun mangan yintsi bangin imungꞌ ba. Da sagat rima sib idzur fufuai biꞌ i arangan bangin da ini, “Mamaꞌ narun aruani isu miamun.”
29 Da bitsintaꞌ mamaꞌ narun igi itip intsruk bangin yatangꞌ ifan da gan rainggan isu miamun i waꞌa ba, da sagat rima sib ini, “U brang gudzum i muantsi da u waꞌ ba.” Da ifaringꞌ arangan binganggan Perets (wainggan ibi brangꞌa muantsi i waꞌan).
30 Ida rainggan udzuda fufuai biꞌ i bangin ugu iwaꞌ yatsungꞌ arangan ba. Da ifaringꞌ arangan binganggan Tsera (wainggan ibi dzadzaniangan).