4
Warim Runggam Santan da Anutu
1 Nam idzuwai imingꞌ wasaꞌ i agam da inang agam wangum itsakia da isu ufuai da runggam? Nam santan waꞌan igi iruꞌ i agam wangunggam akatsan ampi bingan da isu ufuai da ruan imingꞌ agam wangunggam ruga rugan.
2 Agam ini uda nam fain da agam wayu u; ibinigi da agam inang i isa garam funub. Agam iyafi um, da bitsintaꞌ anungꞌ iwaꞌ da nidzun u; ibinigi da agam isu ufuai da yis nam sanga sanga angu. Agam anungꞌ iwaꞌ rutin u, i wain ibiani: agam anungꞌ igut i Anutu gin u.
3 Da gubuꞌ agam guta gin da agam anungꞌ iyu u, wain iruꞌ i agam igutin ruta uwayantam maisan. I agam maram ifur runggam angu i rima runggam sib i nam intap ani gan.
4 Agam itangin Anutu rai ibi sagat maramais tanginda gabun rai da araraꞌa yungan. Da agam wasruꞌ gin nabiani, manga maran arida i nam intap ani gan yusan, da ibugin Anutu. Da mangan nida suda rinun i nam intap ani gan, da irim ipiap i Anutu.
5 Maram wafur i nan akaran mungꞌ, “Ganun Anutu tangindan mpada agi wasaꞌ ugu da Arangan maran yari i suda Arangan runtaꞌ gan angu.” Agam itsanga nan akaran igi ibi nan utaꞌ, a?
6 Da bitsintaꞌ Anutu maraampi gan rima agi sib da iyus; ibinigi da nan akaran mungꞌ isantingꞌ wasi ibiani,
“Anutu imunti sib i rib tsarifa runggan
da isu maraampi da rib rasuda runggan.”
7 Nabinigi da agam watangꞌ warangꞌ i Anutu. Wamunti sib i Sadang, da arangan bungꞌ arunt sinungꞌ agam.
8 Wafa uts da Anutu da Arangan bungꞌ aba uts angu da agam. Agam rib uwayant suda iruꞌrun da nanga asub yusan, watangin sanampun maisan rai da watip wangunggam i nam maisan anungꞌ mingꞌa gin u.
9 Nugum wabarabin, warang, da wagampun runggam i nanggam maisan. Agam nanggam rubungꞌan nawaꞌ abi nam rangan da nanggam nugun tsiaꞌan nawaꞌ nasu nugu barabin.
10 Warasu runggam da Nifutsarif da Arangan bungꞌ araꞌ i agam nayab.
Anungꞌ Raruda Rainggam Mangan
11 Raingꞌ ruas, anungꞌ rima ub i rainggam mangan u. Manga bida rima ub ma raruda rainggan mangan, da irim ub da iraru Nan Faidagin impruꞌ. Da bida u raruda Nan Faidagin da u wasu garam atsungꞌa gin u. Imaꞌ! U su garam raruda Nan Faidagin.
12 Nifutsarif runtaꞌ angu isu garam rima Nan Faidagin da raruda garam. Arangan runtaꞌ isangꞌ i rima agi sib da siata agi rai. U nam idzuwai da u ni raruda rainggam mangan?
Matsarif Runggam Maꞌ
13 Waringantin, agam garam nangan da nida bida ani, “Aruani ma tataꞌ mangan naga da aga bungꞌ afa gamp igi ma gamp tsiraꞌ aga, da nampa udzuf manga sib i nigi da nasub nam i waꞌa da moni tsiraꞌ.”
14 Agam anungꞌ isruꞌ i nam idzuwai bungꞌ awaꞌ da agam da tataꞌ mangan naga. Agam nanggam mpada maran taꞌan isangꞌ nam idzuwai? Agam isangꞌ nam marabuari, imingꞌ uts angu da intap ruan.
15 Ibinigi da agam dani dabiani, “Bida Nifutsarif maran furan, da aga bungꞌ ampa marataꞌ da nanang nam bida ani ma bida naga.”
16 Da bitsintaꞌ, agam itsarif runggam iyus angu i nam idzuwai agam bungꞌ anang. Nam tsarifa ruan bida nigi santan, nigi sanab maisan.
17 Ibinigi da garam sruꞌa i uwayant bini i nangan, da mamida i nangan, da arangan inang asub sib.