5
Nan Radzungꞌan Fadan da Garam Nam Bunump
1 Agam rib nam bunump yusan ugu, agam waringantin! Warang da wayaiꞌ wagampun runggam i nam tsakia ampi bingan bungꞌ awaꞌ da agam.
2 Agam nam bunumpam bungꞌ amais da afaif bungꞌ agara agam nanggam atsufan tatar.
3 Agam nam bunumpam silva da gol bungꞌ amais. Gubuꞌ buntun isu uts wa da agam yufum nam bunump ampi bingan da imami faban. Da nam mingꞌan da maisan igi bungꞌ ani agam nanggam maisan wasi namingꞌ Anutu maranggan da bungꞌ arim agam nafa dzaf.
4 Waringantin! Agam anungꞌ irim garam nanga gum safa wit nidzun mingꞌa agam gumam ugu nam ntsuman gan u. Ibinigi da nam ntsuman igi irang inuꞌ Anutu i rima nam mungaꞌ da agam. Da Nifutsarif Anutu, Garam ruta nampang wain, iringant i garam gum nanggan rangan igi sib.
5 Agam impa iyab i nam santan da isirungꞌ runggam i nam bini bini santan. Agam isirungꞌ rini uriatsam da itip iduduba iwaꞌ ngarubini angu nafa nasangꞌ waꞌa i gubuꞌ gan isa agam funub.
6 Agam idzur nan da yis garam rururungan mamida i muntida sib i runggan funub.
Buaringꞌa Barabin da Abada i Ruan
7 Raingꞌ ruas, waaba i ruam da wabuaringꞌ barabin nasangꞌ Nifutsarif Yisu Kristus gubuꞌ gan tipa badan. Wau uwayantin nabiani, garam ntanga nam yamun sib i guman yaba i ruan angu da impa ifangꞌ i gamiꞌ ruꞌa gin da gubuꞌ arida gin, da raiyi da imus uda nidzun.
8 Agam ibinigi, waaba i ruam da wamunti babampaf, i Nifutsarif Yisu Kristus gubuꞌ gan badan iba su uts wa.
9 Raingꞌ ruas, anungꞌ pusupusan da nida nan barungantsang i ruam u, i Anutu runggan bungꞌ araru agam. Watsangan, Garam raruda garam iba munti muantsi nifun sib wa.
10 Raingꞌ ruas, profet ruas nida Nifutsarif nan gan ugu isantingꞌ agi i sanampun abada i ruan da buaringꞌa barabin da nam tsakia. Agi nau uwayant nayabin da natsungꞌ gin nabinigi angu.
11 Agi tsangan sib wa i Nifutsarif ifinti rib muntida babampafan da buaringꞌa barabin. Agam isruꞌ gin sib i Dzob ibuaringꞌ barabin santan waꞌa da arangan ugu, da raiyi da Nifutsarif ifinti arangan i nam ampi bingan. Nifutsarif igi Arangan Garam maran aridan da maran ntuꞌan.
12 Da bitsintaꞌ, raingꞌ ruas, waringantin! Anungꞌ faringꞌa gunungun ma intap ma nam fain i rima agam nan gam nidan sib u. Anungꞌ nida bida ani, “Nan nidzun bingan da wagungꞌ.” Bida agam nida, “Hai,” da nan arangan nigi, ma bida agam nida, “Imaꞌ,” da nan arangan nigi. Agam nida nan da wani nan nidzun angu, i bida maꞌan da Anutu bungꞌ araru agam.
Nan Udagin Nampanggan
13 Bida mangan mingꞌa wasaꞌ i agam da waꞌan da barabin, da naugin. Bida mangan nugun tsiaꞌan da nais mint nugun tsiaꞌan i tsarifa Nifutsarif binganggan.
14 Bida mangan mingꞌa wasaꞌ i agam waꞌan da rinin gingꞌan, da nau garam gudzun rusan mingꞌa wasaꞌ i ampan mararam naba. Da garam gudzun igi naugin da Nifutsarif, da nayats madamin i garam gingꞌa rinin igi rininggan i Nifutsarif binganggan.
15 Da rib igi nan gan udagin fada mpruꞌa da nanggan muarutsan da bungꞌ anang garam rinin gingꞌan igi rinin nadaum, da Nifutsarif bungꞌ araꞌ i arangan. Da bida arangan nanga asub, da Nifutsarif bungꞌ asiat i nanggan maisan rai.
16 Nabinigi da wafis i nanggam maisan wasi da runggam da waugin i runggam i agam waꞌa bini. Garam rururungan nan gan udagin da Nifutsarif da isu nampang da inang nam iwaꞌ isu nidzun.
17 Eliya igi arangan garam gar ibi agi, da arangan yugin da wangunggan santan i gamiꞌ anungꞌ isangꞌ mudan u. Da gamiꞌ anungꞌ iruꞌ isangꞌ udzuf iruꞌ da bits da ifawaꞌ wasaꞌ udzuf manga gan.
18 Raiyi da arangan itip yugin i gamiꞌ ruꞌan da gamiꞌ iruꞌ, da nam santan mingꞌa intap iyab da ikap nidzun.
Warim Garam Nanga Asub Sib
19 Raingꞌ ruas, bida agamam manga runta intiꞌ i nan nidzun, da manga tipa uda waꞌa ba,
20 da maram wafur nan ani, bida mangan uda garam nanga asub sinungꞌ sanab asuban, da bungꞌ arim arangan ganunggan sib i nam mampan. Da Nifutsarif bungꞌ asiat i nanggan maisan santan rai.