20
Igut i Yisu Nampanggan
(Matiu 21:23-27; Markus 11:27-33)
1 Gubuꞌ mangan Yisu rungꞌ utusa i nan da garam da fisa i sisingꞌ bini mingꞌa Ungar Mararam igi, da garam pumuꞌa Anutu gudzun rusan, da garam gudzupuꞌ i nan faidagin, da garam gudzun mingꞌa wasaꞌ i ampan iba da Arangan.
2 Da ribarangan ini da Yisu ibiani, “Wani da agai i u nang nam ani i manga nampanggan, da manga rim nan igi da agu?”
3 Da Yisu ini nan mungaꞌ, “Dzi binigi bungꞌ agut i agam mungꞌ i nan mangan. Wani da dzi,
4 manga rim nampang i Yowanis ruruba garam in igi, Anutu ma garam gar?”
5 Da ribarangan ini nan da ruan ibiani, “Bida agi nida bida ani, ‘Iba imingꞌ Anutu gin,’ da arangan bungꞌ ani, ‘Da agam mada muaruts arangan?’
6 Ma bida agi nida, ‘Iba imingꞌ garam gar in,’ da garam santan bungꞌ atapu agi funub i tauf, i ribarangan imuaruts i Yowanis igi profet mangan.”
7 Ibinigi da ribarangan ini, “Aga anungꞌ isruꞌgin i arangan nampanggan iba imingꞌ anungꞌ.”
8 Da Yisu ini ibiani, “Ibinigi da dzi wasangꞌ i nidan da agam i manga rim nampang da dzi i nanga nam ani.”
Nan Raman i Garam Mpada Tayangꞌ Gum Wain
(Matiu 21:33-46; Markus 12:1-12)
9 Yisu ini nan raman ani da ampan, “Garam mangan intang guman wain mangan. Da irim ifa rib faingꞌ banginggan i nanga gum yaba gin. Da itip nan i ribarangan uda nam igi nidzunggan marafaingꞌ da rima faingꞌ da arangan. Ida arangan ifa gamp bingibing mangan isangꞌ gubuꞌ guntiꞌ bingan.
10 Da waꞌa gubuꞌ wain nidzun dzuban da itangin mamaꞌ guman mangan ifan da garam mpada tayangꞌ gin igi i uda nam nidzun igi arangan gan faingꞌ. Da bitsintaꞌ garam mpada tayangꞌ gum igi yis mamaꞌ gum igi da iwat rai ifa bangi sasaꞌ.
11 Da arangan itip itangin mamaꞌ gum bits ifan. Da bitsintaꞌ ribarangan irim ub in da yis arangan ibinigi da iwat rai ifa bangi sasaꞌ.
12 Da itip itangin mamaꞌ gum isu iruꞌ da bits da ribarangan yis da irim biꞌ rutin da itapu iwaꞌ manaꞌ.
13 Ida gum wain rinunggan ini, ‘Dzi nabu nang nabianungꞌ? Dzi bungꞌ atangin narunggangꞌ marangꞌ aridagin rururungan; dzi marangꞌ ifur ibi ribarangan bungꞌ atangꞌ warangꞌ gin.’
14 “Da bitsintaꞌ gubuꞌ garam mpada gum wain igi tsanganda garam igi narunggan badan da ini da ruan, ‘Garam igi bungꞌ asu wain i ramanggan nanggan santan; agi nais arangan funub da gum wain ani bungꞌ asu agi gangꞌ.’
15 Ibinigi da ribarangan itapu arangan iwaꞌ sinungꞌ gum wain igi da yis funub.
“Da gum wain rinunggan bungꞌ anang nabianungꞌ i ribarangan?
16 Arangan bungꞌ aba da nais rib mpada tayangꞌ gum wain igi funub da narim nafa da rib fain.”
Gubuꞌ ribarangan ringanta i nan igi da ini, “Nam igi anungꞌ waꞌan u!”
17 Yisu irarab ribarangan da igutin, “Bida maꞌan da nan akaran ani wainggan ibianungꞌ?
‘Tauf aru garam tipa ungar tapuda rai ugu
isu tauf bini iyus tauf santan i antungꞌa ungar yaba gin.’
18 Rib santan ruaꞌa ragun i tauf igi da bungꞌ apuꞌ fafarab. Da tauf igi ruaꞌa ragun i mangan da bungꞌ arurumus ruan.”
19 Da garam gudzupuꞌ i nan faidagin da garam pumuꞌa Anutu gudzun rusan isau sanab i mpunga Arangan sung. I ribarangan isruꞌ i nan raman nidan igi intuang ribarangan. Da bitsintaꞌ ribarangan irat i garam santan igi.
Rima Takis Fada da King Tsiraꞌ Kaisar
(Matiu 22:15-22; Markus 12:13-17)
20 Ibinigi da rungꞌ itsanga Arangan ragun, da itangin garam i arangꞌa gin, inang runggan ibi garam nan nidzun. Tuas arangan maran ifur i mpunga Yisu yaba i nifun nan nidan da rima fada kiap tsiraꞌ i raruda Arangan.
21 Ibinigi da garam arangꞌa gin igut i Arangan, “Kidungwaga tsiraꞌ, aga sruꞌgin u ni nan da u santingꞌ agai i nan rururungan. U watsarif garam mangan da u dzigin nan gin u, da bitsintaꞌ u ni nan nidzun rururungan angu da santan i santingꞌa Anutu sanaban.
22 Garam Yuda nan gan faidagin ini wai, isangꞌ agi rima takis fadan da Kaisar ma imaꞌ?”
23 Arangan itsanga tuas aranga uwayantan iyuꞌa Arangan igi da ini da ribarangan ibiani,
24 “Wasantingꞌ dzi i moni mangan. Manga maraganunggan da binganggan imingꞌ gin?”
25 Da tuas aranga ni ibiani, “Kaisar.”
Da Arangan ini da ribarangan, “Ibinigi da warim Kaisar nanggan nafan da Kaisar da Anutu nanggan nafan da Anutu.”
26 Da ribarangan irunt fafun i nan mungaꞌ Aranga nidan, da impa frap nufan angu. I ribarangan wasangꞌ i iyuꞌa Arangan i nida nan asub mingꞌa ampan tsiraꞌ maran i raruda Arangan gin u.
Nam Uda Ruan da Muntida Marataꞌ
(Matiu 22:23-33; Markus 12:18-27)
27 Utup Sadusi, nida garam mampan mamida tipa muntida marataꞌ ugu, fain iba da Yisu da igutin,
28 “Kidungwaga tsiraꞌ, Moses yakar nan faidagin ani da agi ibiani, bida sagat mangan gabunggan mampan da mamida rima narun, da garam igi rainggan mangan bungꞌ ayu sagat yaruf igi da narim narun i rainggan binganggan.
29 Ibinigi da garam mangan narun rusan marub 7. Miamun iyu sagat da anungꞌ irim narun da imamp.
30-31 Da rain atsungꞌan itip iyu sagat yaruf igi da bitsintaꞌ imamp sinungꞌ sagat da narun imaꞌ. Da rain ruas santan igi yatsungꞌ ruan i sanab bida nigi da imamp sib ruta narun maꞌan.
32 Da sagat imamp bampan sib in.
33 Da gubuꞌ buntun da garam mampan tipa muntida marataꞌ da manga aru nigi bungꞌ asu sagat igi gabunggan? I garam 7 igi iyu arangan.”
34 Da Yisu ini da ribarangan, “Mingꞌa intap ani da garam da sagat iyu ruan.
35 Da bitsintaꞌ waꞌa gubuꞌ aga da rib Anutu tsanganda bini i tipa muntida marataꞌ mingꞌa badzab gampan wasangꞌ uda ruan. Imaꞌ.
36 Da ribarangan anungꞌ isangꞌ tipa mampan, i ribarangan iwaꞌ ibi angira, da isu Anutu narun rusan, i ribarangan imunti marataꞌ imingꞌ badzab gampan.
37 Da Moses isantingꞌ wasi i garam mampan tipa muntida marataꞌ igi imingꞌ nan akaran yaba i dzaf gada gai maragagab, da gubuꞌ faringꞌa Nifutsarif bida ani, ‘Abraham Anutu gan, da Isak Anutu gan, da Yakop Anutu gan.’
38 Da Arangan anungꞌ isu garam mampan Anutu gan. Imaꞌ, isu garam mpada maran taꞌan Anutu gan, i mingꞌa Arangan maranggan da garam santan impa marataꞌ.”
39 Da garam gudzupuꞌ i nan faidagin fain ini Arangan nan gan mungaꞌ ibiani, “Kidungwaga tsiraꞌ, u ni nan bini.”
40 I ribarangan irat i rungꞌ guta Arangan i nan fain.
Manga Narunggan Kristus?
(Matiu 22:41-46; Markus 12:35-37)
41 Ida Yisu igut i ribarangan, “Ibubianungꞌ ida rib ini Kristus igi Tafit yangin gan?
42 Tafit runggan ini nan igi wasi imingꞌ papiar nida Mint Tsarifa Anutu,
‘Nifutsarif Yawe ini da dzi Nifutsarifangꞌ ibiani,
“Wampa dzi bangingꞌ bini
43 nasangꞌ dzi rasuda u garam ipiapam
nasu bintip i u rima fagam yaba gin.” ’
44 Tafit ifaringꞌ arangan ‘Nifutsarif’, da ibubi anungꞌ da busuda Tafit yangin gan?”
Watsanga Runggam Sib i Garam Gudzupuꞌ i Nan Faidagin
(Matiu 23:1-7; Markus 12:38-40)
45 Rib santan rungꞌ ringanta i nan da Yisu ini da gan riban atsungꞌa gin,
46 “Watsanga runggam sib i garam gudzupuꞌ i nan faidagin. Maran yari i atsufa ngarukui tsiraꞌ faga guntiꞌ da yunga ampan maran mingꞌa maket i garam tsarifan da rima bingan tsiraꞌ rutin. Da maran yari i uda mumai miamun angu mingꞌa ungar mpruꞌa ruan gin da mingꞌa nam gadan tsiraꞌ.
47 Da bitsintaꞌ ribarangan yiyuꞌ sagat yaruf i uda i nam bunumpan da ini runggan bini i udagin faga guntiꞌ bingan. Garam bida nigi da bungꞌ awaꞌ da nam tsakia tsiraꞌ nayus.”