33
1-6
Moses YAHWEH-eke angkeme Ilthe Ameke-ameke kwenenge
7 Moses-ele ilthe artetyarte, itne-arle “Ilthe Ameke-ameke” akekeke, nhenge arlenge-ulkereke Israel-arenye areye anetyamenge. Re renhe akeke “Ilthe Ameke-ameke.” Nhenge tyerrtye areyele YAHWEH iwenhe apeke renhe apayuthnetyeke, itne apmere itnekenhe impemele arlenge anthurre unthetyarte Ilthe Ameke-ameke ikwere-werne alhetyeke.
8 Nhenge Moses Ilthe Ameke-ameke-werne alhetyarte, tyerrtye areye tnerrirretyarte, itne ilthe arriwe itnekenhe-arrpenge tnetyarte. Itne renhe aretyarte re Ilthe Ameke-ameke kwene-werne irrpenherlenge.
9 Nhenge Moses Ilthe Ameke-ameke-werne irrpenhetyarte angkulye arlpentye akngerre anthurre apetyetyartenge, re Ilthe Ameke-ameke arriwenge arrwekele tnetyartele. Nhenge angkulye yanhe ikwerele anerlenge, YAHWEH Moses-eke angketyarte.
10 Tyerrtye areyele angkulye renhe aretyarte, re Ilthe Ameke-ameke ikwere itwe anthurrele tnetyartenge. Itne ilthe itnekenhe-arrpele tnerrirremele YAHWEH tnakewarretyarte.
11 YAHWEH Moses-eke angketyarte Ilthe Ameke-ameke kwenenge. Ratherre arerretyarte nhenge angkerremele, tyerrtye areyele mpwareme-arteke nhenge itne angkerremele. Ikwere iperrele anteme Moses apmere-werne alpetyarte. Kenhe Joshua akenhe Ilthe Ameke-ameke kwenenge anetyarte renhe impetyakenhele. Joshua Moses-kenhe kwertengerle-arteke anetyarte.
12 Ikwere iperrele Moses YAHWEH-eke angkeke, “The ngenhe arne iwenhe-akweyeke apayuthnetyeke ahentye aneme. Unte ayenge ileke tyerrtye nhenhe areye Egypt-ngentyele arratelhe-iletyeke itnekenge apmere arrpenhe-werne arrwekele-irretyeke. Angwenhe-ame Unte atyenge-werne yernetyenhe atyengenge warrke-irretyeke? Unte atyenge alakenhe renhe iletyakenhe aneke. Unte atyenge arrwekele nhenge ileke Unte-arle ayenge itelareme, atyenge akangkemele anemele.
13 Mwerre anthurre alakenhe! Unte apeke atyenge akangkentye anthurre aneme, atyenge ilaye nthakenhe-ame unte irretyenhe. Ikwere iperre anteme the Ngenhe awethe itelaretyenhe, nthakenhe-arle Unte itirremele. Kele imerte the Ngenhe akwetethe anthurre akangkemele mpwaretyenhe atyenge. Tyerrtye nhenhe areyeke alkngwirretyale anaye. Unte kwenhe itnenhe akngakeke.”
14 YAHWEH anteme Moses-eke angkeke, “Ayenge ngkwengenge alhetyenhe. Ikwere iperre anteme unte mwerre nterte anetyenhe.”
15 Moses anteme Ikwere angkeke, “Unte apeke nhenhele aneme anwernekenge alhetyakenhele, anwernenhe apmere arrpenhe-werne yernetyale anaye.
16 Unte apeke nhenhele aneme, anwernekenge alhetyakenhele, nhenge anwerne apeke apmere nhenhe imperlte-alhemele Ngkwenge-kwenyele, arrpenhe areyele anwernenhe itelaretyakenhe anetyenhe, Unte-arle atyenge akangkemele aneme, tyerrtye nhenhe areyeke-inpe. Anwerne kwenhe tyerrtye Ngkwinhe areye aneme. Anwerne apeke alheme Ngkwenge-kwenyele, anwerne tyerrtye arrpenhe areye-arteke anteme aneme, anwerne iltye-ante aneme itne-arteke. Anwerne tyerrtye arrpenhe areye-arteke anetyakenhe Unte-arle anwernekenge anemenge.”
17 YAHWEH anteme Moses-eke angkeke, “Yewe, Ayenge arrekantherrenge alhetyenhe, The kwenhe ngenhe itelareme anthurre, Ayenge ngkwenge akangkentye anthurre aneme.”
18 Moses anteme YAHWEH-eke angkeke. “The kwenhe Ngenhe aretyeke pwarrtyerlenge ngangkere Ngkwinhe-akerte.”
19 YAHWEH ikwere angkeke, “Yewe, Ayenge anpere alhetyenhe ngkwenge imernetyenhenge Ayenge mwerre-arle anemele, The ngkwenge arratye-iletyenhenge arritnye ameke-ameke Atyinhe. Arritnye atyinhe aneme YAHWEH. The tyerrtye areye akngakeke itneke mwerre anetyenhenge itnenhe mwantye-mwantye-iletyenhenge. Ayenge ngkwenge imernelhetyeke ahentye aneme.
20 The ngenhe ayaketyenhe inngerre Atyinhe areme-ketye. Angwenhele apeke inngerre Atyinhe aremele kele ilwemele.”
21 Kele YAHWEH anteme ikwere angkeke, “Apwerte arlwe akngerre itwe-ulkere tyarrpe-akerte aneme. Apwerte arlwe yanhe ikwere itwele tnetyeke alhaye.
22 Ayenge pwarrtyetyenhe nhenge apwerte yanhe ikwerenge anpere alhemele. The ngenhe apwerte arlwe tyarrpeke arrernetyekeke-amparre. Nhenge Ayenge anpere alhemele, The ngenhe iltyele artetyenhe.
23 The iltye anamelhe-iletyenhe anteme, unte artepe aretyenhenge. Unte inngerre Atyinhe aretyakenhe anetyenhe.”