34
Moses-ele apwerte athirnte arrpenhe atherre arrpeme atywerrenge ayeye ikwere-atherreke-arleke intelhe-iletyeke
1 YAHWEH Moses-eke angkeke, “Apwerte athirnte arrpenhe atherre arrpaye nhenge The ngenhe arrwekele ileke-arteke, apwerte athirnte arrpenhe yanhe atherre-arteke nhenge unte kwene-akerle iweke-arle ultakemele. The atywerrenge Atyinhe apwerte nhenhe ikwere atherreke-arleke arrernetyenhenge.
2 Ingwenthe ingweleme apwerte athirnte arrpenhe atherre akngetyaye, Atyenge-werne apetyaye apwerte akngerre Sinai-werne, Ayenge ngkwenge angketyenhenge.
3 Tyerrtye arrpenhe ngkwengenge akngetyetyale, arrangkwe-arle. Tyerrtye areye ayakaye apwerte nhenhe ikwere itwe-werne apetyeme-ketye, yepe-yepe-arlke, pweleke-arlke ayakaye, name atherrke arlkweme-ketye apwerte akngerre atnartengele lyaperlenge-arle.”
4 Kenhe Moses-ele apwerte athirnte atherrame ineke arratye, renhe-atherrenhe arrpemele alyere-alyere-iletyeke. Arlte arrpenhele re apwerte akngerre Sinai akertne-werne antyeke apwerte yanhe atherre-akerte. Alakenhe renhe YAHWEH-ele renhe arrekwele ileke mpwaretyeke.
5 YAHWEH anteme apwerte akngerre Sinai-werne apetyeke angkulye kwenenge. Re apetyemele Moses itwele tnetye-alheke angkemele, “Ayenge-arle YAHWEH.”
6 Re Moses-enge arrwekele anpere alheke ikwere angkemele, “Ayenge kwenhe YAHWEH Ngkarte. The kwenhe tyerrtye areye akwetethe mwantye-mwantye-ilerle-aneme, itneke mwerre anemele. Nhenge itne akurne anerlenge Atyenge-ketye, Ayenge itneke iparrpe ahele-irretyakenhele, arrangkwe-arle. Ayenge itneke ahentye akwete aneme. Nhenge The arne iwenheke apeke alhilemele, The renhe anthemele renhe inirtnetyakenhe awethe. Ayenge kwenhe itneke akwetethe arratye angkeme.
7 Arratye anthurre yanhe. Ayenge kwenhe tyerrtye atningke anthurreke mwerre aneme. Nhenge itne akurnentye anerlenge Atyenge-ketye, ikwere iperrele anteme itne Atyenge-werne utepe-irrirtneme, The itnenhe yernetyakenhele, arrangkwe-arle. The akurne itnekenge urrpareme arriletyakenhele. Kenhe itne apeke arne akurne akwete mpwarerlte-anerlenge, Atyenge-werne utepe-irrirtnetyakenhele, The itnenhe arratye anthurre anteme arriletyenhe. The itnenhe ware arriletyakenhe anetyenhe apeke, The ampe itnekenhe-arlke, ampe itnekenhe areye-arlke akenhe akwete arriletyenhe, alakenhe renhe The akwetethe mpwarerle-anetyenhe.”
8 Kele Moses iparrpe anthurre ahelhe-werne kwene-irreke YAHWEH tnakemele.
9 Moses Ikwere angkeke, “YAHWEH, the kwenhe tyerrtye nhenhe areye itelareme, anwerne kwenhe akaperte apwerte-arteke aneme, mwernte akwete aneme. The itelareme anwerne akurne aneme akurnentye anerlte-anemele. Unte apeke atyenge akangkentye akwete aneme, anwernenge irlkwatherre apetyaye nthenhe-werne re apeke anwerne alherlte-iwerlenge. Anwernenhe atnyenaye anwerne tyerrtye aharle Ngkwinhe anetyeke.”
10-28
Moses apwerte akngerre Sinai-ngentyele apetyalpeme inngerre pwarrtyemele anthurre
29 Nhenge Moses apwerte akngerre Sinai-ngentyele apetyalpemele, Re apwerte athirnte atherre iltyele atnyenetyamele. Inngerre ikwerenhe pwarrtyeme rarle YAHWEH-eke angketyamenge apwerte akngerre ikwerenge. Kenhe re akenhe akutne aneke alakenhe ikwere.
30 Nhenge Aaron uthene Israel-arenye areye uthenele areke inngerre Moses-kenhe pwarrtyerlenge itne ikwere-werne itweke-irretyakenhe aneke itne-arle ikwere-ketye atere-irrekenge.
31 Moses anteme itneke arlkeke, “Atyenge-ketye atere-irretyalaye, itwe-werne apetyaye!” Aaron uthene akngerrepate arrpenhe areye uthene ikwere-werne apetyewarreke, Moses anteme itneke angkeke.
32 Kele imerte tyerrtye areye anteme Moses-werne itwe apetyewarreke, re itneke atywerrenge ileke YAHWEH-elarle ikwere ilekeke apwerte akngerre Sinai akertnenge.
33 Nhenge Moses tyerrtye areyeke angkeke-iperre, re inngerre ikwerenhe manterele artelhemele.
34 Nhenge Moses Ilthe Ameke-ameke kweneke irrpemele YAHWEH-eke angketyeke, re mantere akweke renhe inngerre ikwerenhe-ngentyele irlwetyarte. Nhenge re Ilthe ikwerenge arratemele alhetyarte, Re tyerrtye areyeke arne ingkirreke anthurre iletyarte YAHWEH angketyartenge.
35 Tyerrtye areyele inngerre ikwerenhe pwarrtyerlenge aretyarte. Alakenhe ikwerenge anteme Re inngerre ikwerenhe manterele artelhetyarte, nhenge rarle YAHWEH-eke angkeke iperre.