8
Thaoqphaoq aqma maolkhoel bhai laol bhiq-a nail jaqjaq daoldaol nail ganl
1 Thaoqphaoq aqma maolkhoel bhai laol bhiq nail jaqjaq daoldaol nail ganl neq, niailhai ngaol. “Ngadao yaoq gaq yaoq-ao nee, neenoeq neekha aol naol” dai, heeq kivq nail ngaol. Thailhai ngaol-aoq, neenoeq neekha neq, tsaol-aq yaq bhai neema bhi eeq lal khi, goil nail gaiq-a nail phaq neq, tsaol-aq yaq bhai bhi eeq bhi heel lal nail ngaol.
2 “Ngal neenoeq neekha aol naol” dai, teevq gaq ganav noeq haq neq, aivq heeq kivq heeq phaq-ail tsaq nail juq bhai, maq heeq nia heeq thaq-al.
3 Thailhai ngaol-aoq, tsaol-aq teevq gaq ganav, Miqyail bhai gaiq-a haq neq, Miqyail aivq bhai heeq nia nail ngaol.
4 Alheel ngel-i mail, thaoqphaoq aqma maolkhoel bhai laol bhiq nail jaqjaq daoldaol jaq nail ganl neq, niailhai ngaol. Thaoqphaoq aqma maolkhoel neq, maq doevq-ail. Aqsil ngaol dai, ngadao heeq kivq nail ngaol. Miqyail teevq gaq maq ngel nail neq, Miqyail yaoq gaq yaoq maq jaol-ail dai iqsanl, ngadao heeq kivq nail ngaol.
5 Nqtavq kovtavq bhai maqkhaiq, miltsaq kovtavq bhai maqkhaiq, miqyail dai khul nail maodai jaol khi, miqyail khi mail aqheel maodai gaq jaol nail ngaol.
6 Thailhai ngaol-aoq, ngadao nail Miqyail neq, teevq gaq taivq-ail jaol nail ngaol. Aivq neq, ngadao nail Aqbhu ngaol. Aivq nail lavqkhoel nee yaoq phaq yaoq-ao nee pevq dov lal khi, ngadao iqsanl aivq nail haqbhoil ngaol. Ngadao nail Heeqphaq teevq gaq taivq-ail jaol nail ngaol. Aivq neq, Yeiqsul Khali ngaol. Aivq bhaqda nee yaoq phaq yaoq-ao nee pevq lal khi, aivq bhaqda nee ngadao aqdoevq ya doevq nail ngaol.
7 Thailhai ngaol-aoq, tsaol-aq iqsanl mail neenoeq neekha al bhai maq heeq nia-ail. Tsaol-aq teevq pav ganav juq jel lal-u phao, thaoqphaoq aqma maolkhoel bhai thaqeeq daiq-a nail ngel-i mail, yanqgaol kev dai, jaqjaq daoldaol niil neq, thaoqphaoq aqma maolkhoel bhai laol bhiq nail phaq ngaol dai, saol-nvq khi jaq-a nail ngaol. Aqyu juq-i mail heeq nia nail neema alhai gaq bhaq nail ngel-i mail, aqyu juq nail haqbhoil aqjiivq aqcavq phaq pevq nail ngaol.
8 Jaqjaq daoldaol bhaqda nee, ngadao khi Miqyail nail gaiqlaq aqtsaoq tsaoq tavq nail bhai bhi meeq jaiq lal nail phaq maq ngel-ail. Ngadao maq jaq-a nail ngel-i mail, geeqlaoq theq ail-a nail iqsanl maq ngel-ail. Ngadao jaq-a nail ngel-i mail, geeqlaoq yaq jaiq nail iqsanl maq ngel-ail.
9 Alheel ngel-i mail, nuljuq nl kivq khi ngaol-aoq, gaq bhaq nail tsaol-aq nail haqbhoil phaqthiq thiq duq maq jiav dai, yaolphaol yaoq.
10 Naol alheel nail neenoeq neekha aol nail tsaol-aq bhai thaoqphaoq aqma maolkhoel jiav nail ilkhaol lavqkhoel bhai jaoldeel khi jaq thailthaiq nail dai, ge yaoq. Heeq nia nail neema gaq bhaq nail teevq gaq naol jaq nail bhai moel haq neq, aivq neema eeq lal khi, thaoqphaoq aqma maolkhoel bhai laol bhiq-a nail jaqjaq daoldaol jaq nail ngaol laq.
11 Naol alhai nl haq neq, naoq nail neenoeq neekha al bhaqda nee, gaq bhaq nail tsaol-aq teevq gaq cov-ail nail ngaol. Aqivq jaqbheq al gaq nail haqbhoil iqsanl Khali khanqsil-a nail ngaol.
12 Nuljuq aqivq jaqbheq juq bhai alhai nl bheeq khi, aqyu juq nail gaq bhaq nail heeq nia nail neema bhai lavq nal bhiq-a nail ngel-i mail, nuljuq Khali bhai iqsanl nl bheeq-a nail ngaol.
13 Thailhai phal-iq neq, jaqjaq daoldaol bhaqda nee ngal ngaq nail aqivq jaqbheq bhai bhi laiq bhi tsa-ail haq neq, ngaq nail aqivq jaqbheq maq ya laiq maq ya tsa-ail dai, ngal haqjoil maq jaq yaoq-aol.