9
Gaqkhoel teevq gaq-i mail ya-a nail aqkhaoqanq khi ya nl nail ganl juq
1 Ngal neq, jel ail-a nail tsaol-aq maq ngel-ail laiq. Ngal gaqkhoel iqsanl, maq ngel ail laiq. Ngal ngadao nail Heeqphaq Yeiqsul Khali bhai ya moel-a nail maq ngel-ail laiq. Nuljuq neq, Yeiqsul nail lavqkhoel-ai ngaq-i mail nl-ai thaq nail ganl, maq ngel-ail laiq.
2 Ngal neq, yu nail haqbhoil gaqkhoel maq ngel khi ngaol-aoq, nuljuq nail haqbhoil gaqkhoel ngaol. Khul khi mail dai ngal-aq neq, ngal Yeiqsul nail gaqkhoel pevq nail salkhil neq, nuljuq ngaol.
3 Yu ngaq bhai tsao tsel lal haq neq, ngal niailhai ge kovq bhiq nail ngaol.
4 Nv-nvq gaq-i mail ganl nl-a nail aqphoiq, ngal jaq nail daol nail maq geel-nvq-ail laiq.
5 Gaqkhoel yaoq juq yaoq khi Yeiqsul nail jaqbheq maqkhaiq, Bheiqtuvluv aqyu juq, yovqgavq nail khaqma yovqgavq hevq khi tsao nail aqkhaoqanq jiav nail ngaol. Nv-nvq gaq iqsanl aqyu juq khe-ai, neema thaqtsaol nail khaqma hevq khi tsao nail aqkhaoqanq maq jiav-ail laiq.
6 Bhaqnaqbhal nv-nvq gaq taivq-ail yovqgavq nail aqlavq-i mail ganl ya nl jaq nail laiq.
7 Yovqgavq nail phul yuq khi genl dev nail tsaol-aq jiovq nail jaol naol laiq. Aqheeq tsilju nail gaoqkhail nl khi aqheeq tsilju aqheeq maq koevq jaq nail tsaol-aq jaol naol laiq. Yaol tsu khi yaol nail aqtsil maq nieivq daol nail tsaol-aq jaol naol laiq.
8 Ngal niailhai ge nail niil neq, tsaol-aq yaq nail neenoeq ge nail ngel-ail laiq. Aoldaoq kovqdaoq nail lavqkhoel bhai iqsanl alhai gevq-ai thaq nail maq ngel-ail laiq.
9 “Gov bhai bhi naoq thailthaiq nail niaoqnel bhai moeqkeivq thaq keivq” dai, Molseiq nail aoldaoq kovqdaoq lavqkhoel bhai gevq-ai thaq nail jiav nail ngaol. Miqyail alhai ge-ai thaq nail al, niaoqnel bhai ge movq-ail teevq-eel laiq.
10 Ngadao juq bhai ge movq nail maq ngel-ail laiq. Ngel naol. Ngadao juq nail haqbhoil ge-ai thaq nail ngaol. Daiyal tseq nail gaq maqkhaiq, gov deeq nail gaq maqkhaiq, gov ya lal nail bhai noeqthunq khi nl nail ngaol.
11 Nv-nvq gaq nuljuq nail lavqkhoel aqhaqlal phao khe aqiq haiq khi, aqsivq haqjoil phao khe gov ya gaiq haq neq, nvjuq nl bheeq-a nail ngaol dai, nuljuq noeq nail laiq.
12 Tsaol-aq yaoq juq yaoq nuljuq nail aqsivq haqjoil phao khe gov gaiq nail aqkhaoqanq jiav haq neq, nvjuq neq, a dai nee maqtsil, aqkhaoqanq jiav nail, maq ngel-ail laiq. Nv-nvq gaq aqkhaoqanq jiav khi ngaol-aoq, alhai maq nl-ail. Khul khi mail dai ngal-aq neq, Khali nail lavqkhiq tsail nail geeqlaoq daoq bhai maq ya lav tsoiq dai, nv-nvq gaq iqsanl bhai ol nail ngaol.
13 Uqhuq thaoq nail ilkhaol il ma bhai ganl nl nail tsaol-aq, uqhuq thaoq nail ilkhaol il ma bhai tavq nail jaqjaq daoldaol ya jaq khi, laol duq bhai ganl nl nail tsaol-aq iqsanl, laol bhiq-ai thaq nail teevq pav ganav juq bhai ya bhi jaq nail ngaol dai, nuljuq maq heeq kivq-ail laiq.
14 Alhai dul dai, lavqkhiq tsail nail geeqlaoq daoq cavq nail juq iqsanl, geeqlaoq daoq al cavq nail ngel-i mail, ya jaq ya daol nail ngaol dai, Heeqphaq Yeiqsul daoq bivq-ai thaq nail ngaol.
15 Ngal alhai nl nail aqkhaoqanq jiav khi ngaol-aoq, maq nl. Nuljuq ngaq bhai alhai bhi nl bhiq movq nail ngel-i mail, ngal haoqgavq niil gevq bhoel-ai lavq-a nail maq ngel. Khul khi mail dai ngal-aq neq, ngaq-i mail neema eeq duq jiav nail niilniai tsaol-aq teevq gaq ganav lav peivq lav boev lal nail nee maqtsil, ngal sil nail neq, meeq nail ngaol.
16 Ngal lavqkhiq tsail nail geeqlaoq daoq cavq nail neq, ngal neema eeq duq maq jiav-ail. Khul khi mail dai ngal-aq neq, Miqyail ngaq bhai bhi cavq lavq-a nail ngel-i mail, maq cavq mail khul maq khi kivq-ail. Maq ngel haq neq, ngaq bhai geeqlaoq aqdoil kev lee nail ngaol.
17 Ngal nl movq nail phaq tsel khi nl haq neq, aqphoiq ya nail ngaol. Thailhai ngaol-aoq, ganl niil ganl Miqyail-i mail ngaq bhai av lavq-a nail ngel-i mail, ngal ya nl nail ngaol.
18 Thailhai phal-iq neq, ngal khul nail aqphoiq ya nail-aiq. Lavqkhiq tsail nail geeqlaoq daoq cavq-u phao, aqphoiq oil nail aqkhaoqanq jiav khi ngaol-aoq maq oil-a nail al neq, ngal ya nail geeqlaoq ngaol.
19 Ngal tsaol-aq teevq gaq nail yaqkav maq ngel khi ngaol-aoq, tsaol-aq maodai gaq nail neema bhai gaq lai khi, Khali bhai neema thaqtsaol lal dai, tsaol-aq iqsanl nail yaqkav pevq lal-a nail ngaol.
20 Yuldav nail tsaol-aq Khali bhai neema thaqtsaol lal dai, aqyu juq nail haqbhoil ngal Yuldav nail tsaol-aq khe-ai aqdoevq doevq nail ngaol. Ngal aoldaoq kovqdaoq nail kov-uvq bhai maq jaol khi ngaol-aoq, aoldaoq kovqdaoq nail kov-uvq bhai jaol nail tsaol-aq Khali bhai neema thaqtsaol lal dai, aqyu juq nail haqbhoil aoldaoq kovqdaoq nail kov-uvq bhai jaol nail tsaol-aq khe-ai, aqdoevq doevq nail ngaol.
21 Aoldaoq kovqdaoq maq jiav nail tsaol-aq Khali bhai neema thaqtsaol lal dai, aqyu juq nail haqbhoil aoldaoq kovqdaoq maq jiav nail tsaol-aq khe-ai, pevq lal-a nail ngaol. Maldil dai, ge haq neq, Miqyail nail sivtavq bhai ngaq nail haqbhoil aoldaoq kovqdaoq maq jiav nail maq ngel-ail. Ngal Khali nail aoldaoq kovqdaoq nail kov-uvq bhai aqdoevq doevq nail ngaol.
22 Gaq bhaq nail tsaol-aq Khali bhai neema thaqtsaol lal dai, ngal aqyu juq nail haqbhoil gaq bhaq nail tsaol-aq khe-ai, pevq lal-a nail ngaol. Khalhai khi mail tsaol-aq teevq pav ganav juq hevqkovq nail phaq ya nia dai, tsaol-aq iqsanl nail haqbhoil, ngal yaoq phaq yaoq-ao nee pevq daiq gil-aoq nail ngaol.
23 Ngal iqsanl, lavqkhiq tsail nail geeqlaoq daoq nail geeqlaoq bhai ya dai, geeqlaoq daoq al nail haqbhoil, al juq iqsanl bhai nl thailthaiq nail ngaol.
24 Tsaoq doel pheeljaq-u phao, tsaoq doel pheeljaq nail tsaol-aq iqsanl mail tsaoq doel pheeljaq khi ngaol-aoq, teevq gaq taivq-ail kovpavq ya nail ngaol dai, nuljuq maq heeq kivq-ail laiq. Alheel ngel-i mail, nuljuq kovpavq ya dai, laijai khi tsaoq yaoq.
25 Tsaoq doel pheeljaq nail bhaoqaiq lavqkhoel-ai tsaoq doel pheeljaq nail tsaol-aq yaoq gaq yaoq-ao nee ol ol-ail ya tsaoq jao nail ngaol. Aqyu juq luq-ail seil-ail nia nail aqeiv nail uqtsaoq ya dai, laijai nail ngaol. Thailhai ngaol-aoq, ngadao neq, maq luq maq seil-ail nia nail uqtsaoq bhai ya dai, laijai thailthaiq nail ngaol.
26 Alheel ngel-i mail, ngal gaq lai dai, noeq cov-ai khi tsaoq thailthaiq nail ngaol. Teevq gaq nee teevq gaq aqlavq-i mail thaoq pheeljaq nail bhaoqaiq lav sav-u phao, ngal aqnieivq-ail lilmoel bhai thaoq nail khe-ai maq thaoq-ail.
27 Ngal yu bhai daoq cavq daoq cov cov gaq haq neq, khaonq ha-ai thaq nail tsaol-aq ngal maq ya pevq dai, ngaq nail aqmaol bhai ngal thaoq thaoq-ail khi, ngaq nail aqmaol niil ngaq nail yaqkav bhi jiovq nail ngaol.