4
1 Ilheel juq-ol, nuljuq nail yaqkav juq bhai aqtsaq aqdaol daol dai, teevq di dai, nl bhiq yaoq. Nuljuq nail ilheel gaq iqsanl, nqtavq kovtavq-ai jaol nail bhai, thaq nioilpeivq dei-eiq.
Khoel-ail ceevq-a nail ganl
2 Khaq mao iqsanl gaq maq bhaq dai, geeqlaoq hal hal-ail jaol yaoq. Geeqlaoq hal-u phao, aqgeel geel dai, Miqyail bhai tsiqeeq tsiqeeq-ail, hal yaoq.
3 Khali nail ganl oiltsail-ai thaq nail phaq bhai tavq nail Miqyail nail daoq bhai nvjuq cavq bhiq kivq dai, Miqyail gailkhaol phao lavq nail haqbhoil geeqlaoq hal tsao lavq yaoq. Khul khi mail dai ngal-aq neq, ngal Miqyail nail daoq cavq nail ngel-i mail, niil aq-il thaonq bhai ya aol thailthaiq nail ngaol.
4 Alheel ngel-i mail, ngal ya ge heeq phaq-ail tsaq nail daoq al juq bhai, yu gov heeq nia dai, cavq bhiq kivq nail haqbhoil iqsanl geeqlaoq hal tsao lavq yaoq.
5 Yeiqsul bhai neema maq thaqtsaol nail juq nail sivtavq bhai neenoeq neekha aol nail tsaol-aq pevq yaoq. Aqyanq khal ya-u phao, teevq peivq-ail maq bhi sunq-ail dai, nl thailthaiq yaoq.
6 Tsaol-aq yaoq gaq yaoq-ao nee bhai khalhai ya ge kovq bhiq nail dai heeq nia lal dai, nuljuq daoq ge-u phao, khaq mao iqsanl yu loq nail bhai tsaq lai nail daoq khi naldaiq meeq nail daoq taivq-ail ge yaoq.
Haoqnao naosaq khe daoq
7 Ngal mailma-ail gaiq-a nail jaqbheq Duljil neq, ngaq nail ganl iqsanl mail nuljuq bhai ge lavq nail ngaol. Aivq neq, ngaq-ai nee mail Miqyail nail ganl nl nail lavqkhoel, saljial ivq nail ganl nl nail gaq ngaol.
8 Nvjuq khalhai pevq thailthaiq nail dai, nuljuq ya heeq kivq dai maqkhaiq, aivq nuljuq nail neema bhai gaq bhi kav lal dai maqkhaiq, ngal aivq bhai nuljuq jaol nail bha bhi lal naol.
9 Al ovqtavq, nuljuq nail munl lavqkhoel khe teevq gaq pevq nail, ngadao mao-ail gaiq-a nail saljial ivq nail jaqbheq Aolneiqsiqmul bhai iqsanl, aivq nee mail bhi lee naol. Niai khal pevq lal thailthaiq nail yaoq phaq yaoq-ao nee aqyu nvq gaq nuljuq bhai ge lavq nail ngaol.
10 Ngaq-ai nee mail teevq gaq khe-ai thaonq bhai aol thailthaiq nail Aqliqdaqgul neq, nuljuq bhai noeq moel naol dai, daoq cavq cavq bhoel-ai lavq-a nail ngaol. Bhaqnaqbhal nail jaqbheq Maqkul iqsanl, nuljuq bhai noeq moel naol dai, daoq cavq cavq bhoel-ai leevq-a nail ngaol. Maqkul nail ganl ngal nuljuq bhai daoq cavq cavq bhoel-ai leevq-a nail ngaol. Aivq nuljuq jaol nail bha lee haq neq, aivq bhai hav yaoq.
11 Yulthul dai khul nail Yeiqsul iqsanl, nuljuq bhai noeq moel naol dai, daoq cavq cavq bhoel-ai leevq-a nail ngaol. Yuldav nail tsaol-aq nail lavqkhoel khe, Miqyail Milkhaoq nail haqbhoil niil aq-il ngaq-ai nee ganl nl thailthaiq nail juq neq, niil juq teevq-eel ngaol. Aqyu juq bhaqda nee ngal neesal ya deedee-ail nial.
12 Nuljuq nail munl bhai tavq nail, Yeiqsul Khali nail yaqkav Ilbhaqphaqlal iqsanl, nuljuq bhai noeq moel naol dai, daoq cavq cavq bhoel-ai leevq-a nail ngaol. Miqyail neema tsaq nail yaoq phaq yaoq-ao nee nail lavqkhoel nuljuq yovkav eeq lal khi, ivq lal bhee lal dai, aivq nuljuq nail haqbhoil khaq mao iqsanl laijai laijai-ail, geeqlaoq hal nail ngaol.
13 Aivq neq, nuljuq nail haqbhoil maqkhaiq, Laoldilciv meenq khi Heiqlaqbhaollil meenq bhai jaol nail tsaol-aq nail haqbhoil maqkhaiq, khadai laijai nail ganl, ngal salkhil khanq kivq nail ngaol.
14 Nvjuq mao-ail gaiq-a nail jagaq coev nail saqlaq Lulkavq khi Deiqmav iqsanl, nuljuq bhai noeq moel naol dai daoq cavq cavq bhoel-ai leevq-a nail ngaol.
15 Laoldilciv meenq bhai jaol nail aqivq jaqbheq Khali yaq juq bhai maqkhaiq, Noqphal khi aivq nail ilkhaol bhai jil lai nail Khali yaq munl bhai maqkhaiq, ngal noeq moel naol dai, ge bhiq ail dei-eiq.
16 Haoqgavq niil nuljuq ge gaq haq neq, Laoldilciv meenq bhai jaol nail Khali yaq munl bhai iqsanl bhi ge daiq dei-eiq. Aqyu juq-i mail ya-a nail haoqgavq al iqsanl, nuljuq ge daiq dei-eiq.
17 “Yeiqsul-i mail naoq bhai bhi nl lavq-a nail ganl bhai nl gil-u phao kev dai, aqmeeq-ai nl-ail yaoq” dai, Aqgilpuv bhai iqsanl ge bhiq-ail dei-eiq.
18 Ngal neq, Paolluv ngaol. Nuljuq bhai noeq moel naol dai, ngaq nail aqlavq-i mail gevq bhoel-ai leevq-a nail ngaol. Ngal thaonq bhai aol thailthaiq nail bhai thaq nioilpeivq dei-eiq. Miqyail nail geeqlaoq eeljaol nuljuq nail kovtavq bhai jiav dei-eiq.