1 Theilsaqlolni
Gevq-a nail gaq
Haoqgavq niil keiv iqmoeq ilmoeq bhai gaqkhoel Paolluv aivq-i mail gevq-a nail ngaol dai, gevq-ai thaq nail ngaol. Al ovqtavq, milnee uqnee khe Khali yaq juq iqsanl, Paolluv-i mail gevq-a nail ngaol dai, noeq nail ngaol.
Gevq-a nail aqyanq khi mail aqduq
Gevq-a nail aqyanq neq, A.D. 51 kovq niidai bhai gevq-a nail ngaol. Gevq-a nail aqduq neq, gaqkhoel Paolluv milkhaoq doi dai, lavqkhiq tsail nail geeqlaoq daoq cavq cavq-ail tsao nail nvq pov teevq pov bhai, Gaolliqthu meenq bhai jaol khi gevq-a nail ngaol.
Khaq sil gaq bhai gevq bhiq-a nail
Haoqgavq niil keiv neq, Theilsaqlolni meenq bhai jaol nail Khali yaq munl bhai gevq bhiq-a nail ngaol. Theilsaqlolni meenq neq, ngaqkha daoljail bhai jiav khi jaiq gaiq jaiq kha kha nail al jaiq-ail mao nail meenq meenq ma teevq meenq ngaol. Tsaol-aq nvq sainv gaq niidai jaol nail ngaol. Theilsaqlolni Khali yaq munl neq, Paolluv-i mail daoqthaoq thaoq-a nail ngaol. A bhai khe Khali yaq jemao Yuldav tsaol-aq maq ngel dai, yuq nail jeq-e jaq-a ngaol.
Khul bhai noeqthunq khi gevq-a nail
Gaqkhoel Paolluv lavqkhiq tsail nail geeqlaoq daoq cavq nail ngel-i mail, Theilsaqlolni meenq bhai jaol nail tsaol-aq teevq pav ganav juq thaoqphaoq aqma maolkhoel bhai uqhuq thaoq nail khaonq ha-ail ceevq khi Khali yaq pevq lal-a nail ngaol. Paolluv Theilsaqlolni meeq nee mail lavqtsail mail ya dov lee-a nail ngel-i mail, khal cavq movq nail phaq maq ya cavq dan-a nail bhaqda nee haoqgavq niil keiv gevq khi, khoeq nail jiovq nail phaq bhai neema ivqdao dai, ya daq nail ngaol dai, gaq bivq-a nail ngaol. Khali yaq aqdoevq khalhai ya doevq khi, yovqgavq nail nlmaoq hal dao bhai aqmeeq-ai nl yaoq dai, gaq bivq-a nail ngaol. Al taivq-ail maq ngel dai, Yeiqsul Khali nvq pov teevq pov maldil yavq kha lee nail ngaol dai, gevq bhiq-a nail haoqgavq pevq nail ngaol.
1
Iqmoeq ilmoeq khe daoq
1 Ngal Paolluv, Siqlav khi Tilmolseiq nvjuq hail gaq, Aqbhu Miqyail khi mail Heeqphaq Yeiqsul Khali nail lavqkhoel bhai jaol nail, Theilsaqlolni meenq khe Khali yaq munl juq bhai haoqgavq niil gevq bhoel-ai leevq-a nail ngaol. Geeqlaoq eeljaol khi mail neesal-ovq nail phaq nuljuq nail kovtavq bhai jiav dei-eiq.
Theilsaqlolni meenq bhai jaol nail Khali yaq juq nail neema thaqtsaol nail phaq
2 Nvjuq Miqyail bhai khaq mao iqsanl geeqlaoq hal-u phao, nuljuq iqsanl nail haqbhoil tsiqeeq tsiqeeq-ail, Miqyail bhai geeqlaoq hal nail ngaol.
3 Ngadao nail Aqbhu Miqyail nail sivtavq bhai, nuljuq neema thaqtsaol nail bhaqda nee, khalhai nl dol hal dol lavq-a nail ganl bhai maqkhaiq, goil nail gaiq-a nail bhaqda nee, khadai laijai khi nl thailthaiq nail ganl bhai maqkhaiq, nuljuq Heeqphaq Yeiqsul Khali bhai noeqthunq nail bhaqda nee neema ivq nail bhai maqkhaiq, Miqyail bhai khaq mao iqsanl geeqlaoq hal-u phao, nvjuq noeq kev nail ngaol.
4 Miqyail gaiq-a nail aqivq jaqbheq juq-ol, Miqyail nuljuq bhai tsel dov-ai thaq nail, nvjuq heeq kivq nail ngaol.
5 Khul khi mail dai ngal-aq neq, nvjuq-i mail cavq-a nail lavqkhiq tsail nail geeqlaoq daoq neq, daoq taivq-ail nuljuq jaol nail bha ge bhiq lee-a nail maq ngel-ail. Meeqnail Haolnail Aqhaqlal nail bhaqaoq lavqkhoel nee maqkhaiq, lavqkhiq tsail nail geeqlaoq daoq al maldil tsaq naol dai, neema thaqtsaol nail lavqkhoel nee maqkhaiq, nuljuq jaol nail bha kev lee-a nail ngaol. Nvjuq nuljuq nee mail jaol-u phao, nuljuq nail haqbhoil ganl tsoiq dai, nvjuq aqdoevq khalhai doevq-a nail bhai, nuljuq heeq nia nail ngaol.
6 Nuljuq nvjuq bhai maqkhaiq, Yeiqsul bhai maqkhaiq, saol oil-a nail ngaol. Khul khi mail dai ngal-aq neq, geeqlaoq daoq bhaqda nee, haq nail aoq nail phaq bhai nuljuq ya daq deedee khi ngaol-aoq, Meeqnail Haolnail Aqhaqlal-i mail bivq-a nail lavqkhiq tsail nail phaq teevq bheeq aol nail lavqkhoel, geeqlaoq daoq al bhai nuljuq hav bhoel-a nail ngaol.
7 Alheel ngel-i mail, nuljuq neq, Maqgeiqdaolnil milkhaoq khi, Aqgaqyal milkhaoq bhai jaol nail, neema thaqtsaol nail tsaol-aq iqsanl nail haqbhoil, saol oil duq pevq lal-a nail ngaol.
8 Khul khi mail dai ngal-aq neq, nuljuq bhaqda nee Miqyail nail daoq neq, Maqgeiqdaolnil milkhaoq khi Aqgaqyal milkhaoq bhai gaiq doi ail-a nail ngaol. Al ovqtavq, nuljuq Miqyail bhai neema thaqtsaol nail ganl yaoq dao yaoq-ao nee gaiq doi ail-a nail ngel-i mail, nuljuq nail ganl al nvjuq teevq pov gaoq ge bhiq nail, maq loq yaoq-aol.
9 Nvjuq nuljuq jaol nail bha lee-u phao, nuljuq nvjuq bhai khalhai hav lavq-a nail ganl khi mail, maldil tsaq khi maldil doevq nail Miqyail bhai uqhuq thaoq nail haqbhoil, nuljuq thaoqphaoq aqma maolkhoel bhai khalhai khaonq-ail ceevq khi, Miqyail jaol nail phao kovq lal-a nail ganl bhai, yu iqsanl mail ge thailthaiq nail ngaol.
10 Al ovqtavq, Miqyail-i mail bhi doevq kovq lal-a nail aivq nail Yaqyov nqtavq kovtavq nee yavq kha lee nail bhai, nuljuq noeqthunq khi daonq nail bhai iqsanl, yu ge thailthaiq nail ngaol. Yaqyov al gaq neq, yaqhao khe kev lee nail Miqyail neema phail nail phaq nee ngadao bhai bhi jel-ail lavq nail, Yeiqsul ngaol.