4
Miqyail neekhaol sil dai aqdoevq khalhai ya doevq nail ganl
1 Aqivq jaqbheq juq-ol, nvjuq Heeqphaq Yeiqsul bhai juq khi, nuljuq bhai niailhai hal hal-ail, gaq bivq movq-ail haq nail ngaol. Nuljuq Miqyail neekhaol sil dai, aqdoevq khalhai ya doevq nail ganl nvjuq nuljuq bhai cavq bhiq cov bhiq-a nail ngaol. Niil aq-il nuljuq tsaothe thailthaiq nail khe-ai, iqmoeq phao iqsanl a dai nee maq tsil tsaothe dav laivq yaoq.
2 Nvjuq Heeqphaq Yeiqsul nail bhaqaoq bhai juq khi, khalhai ya doevq ya jaol nail ganl cavq bhiq cov bhiq-a nail bhai nuljuq heeq nia nail ngaol.
3 Nuljuq aqhaol haol dai doevq khi khaqmiq maq sev dai doevq haq neq, Miqyail neema tsaq nail ngaol.
4 Nuljuq yaoq gaq yaoq-ao nee yovqgavq nail aqmaol bhai yovqgavq gaq lai nail lavqkhoel nee aqhaol haol dai jaol khi yovqgavq nail khaqma bhai ev khi aqmeeq-ai doevq tavq jaol tavq yaoq.
5 Miqyail bhai maq heeq nia nail yu nail jeq-e jaq-a yovqgavq nail neekhaol teevq sil doevq tavq jaol tavq nail khe-ai, nuljuq maq ya doevq-ail.
6 Tsaol-aq teevq gaq-ail yovqgavq nail aqivq jaqbheq Khali yaq juq-i mail aqtsaoq hal bhao-ai thaq nail bhai maq ya bheeq maq ya leel-ail, maq ya kav jaq-ail dai, jel lal-u phao nvjuq nuljuq bhai aqmeeq-ai cavq bhiq-a nail khe-ai, Heeqphaq Yeiqsul neq, alhai nl nail tsaol-aq bhai yalkhaq dal bhiq nail ngaol.
7 Khul khi mail dai ngal-aq neq, aqjiivq aqcavq nail haoqnao bhi doevq nail dai khi, Miqyail ngadao juq bhai khul-a nail maq ngel-ail. Aqmeeq aqhaol haol dai bhi doevq nail haqbhoil Miqyail ngadao bhai khul lavq-a nail ngaol.
8 Alheel ngel-i mail, daoq al juq bhai khaonq nail tsaol-aq neq, tsaol-aq nail daoq bhai khaonq nail maq ngel-ail. Nuljuq nail lavqkhoel bhai Meeqnail Haolnail Aqhaqlal bhi jaol lee-a nail Miqyail al gaq nail daoq bhai, khaonq nail ngaol.
9 Aqivq jaqbheq Khali yaq nail gaiqlaq bhai khalhai ya goil ya gaiq-a nail ganl nvjuq nuljuq bhai haoqgavq gevq bhiq nail maq loq yaoq-aol. Khul khi mail dai ngal-aq neq, teevq gaq nee teevq gaq gaiq-a yaoq dai, Miqyail nuljuq bhai cavq bhiq cov bhiq gaq-ao nail ngaol.
10 Maldil dai, ge haq neq, nuljuq jaol nail Maqgeiqdaolnil milkhaoq khaoq lao bhai jaol nail aqivq jaqbheq Khali yaq iqsanl bhai gaiq-a nail ngaol. Thailhai ngaol-aoq, aqivq jaqbheq juq-ol, a dai nee maqtsil aqyu juq bhai gaiq-a jaiq lal yaoq dai, nvjuq nuljuq bhai gaq bivq nail ngaol.
11 Nvjuq nuljuq bhai ge bhiq-ail ceevq-a nail khe-ai, laijai nail lavqkhoel nee, neema ivqdao dai jaol khi, yu nail ganl bhai maq suqsaq-ail mail, yovqgavq nail ganl nl nl-ail doevq dal laiq yaoq.
12 Alhai doevq haq neq, Yeiqsul bhai neema maq thaqtsaol nail juq, nuljuq bhai ev khi yovqgavq loq nail phaq, yu bhai maq ya juq mail aqdoevq doevq kivq lal nail ngaol.
Heeqphaq Yeiqsul yavq kha lee nail ganl
13 Aqivq jaqbheq juq-ol, khul teevq phaq-ail noeqthunq nail phaq maq jiav nail tsaol-aq noeqhaq nail khe-ai, nuljuq maq ya noeqhaq dai, sil jel-a nail tsaol-aq nail ganl nvjuq nuljuq bhai bhi heeq kivq movq-ail nial.
14 Yeiqsul sil khi gaoq doevq kovq lal-a nail ngaol dai, ngadao neema thaqtsaol nail ngaol. Alheel ngel-i mail, Yeiqsul bhai neema thaqtsaol khi sil-a nail juq bhai Yeiqsul nee mail teevq gaq khe-ai, Miqyail hevqkovq lavq naol dai, ngadao neema thaqtsaol nail ngaol.
15 Nvjuq Yeiqsul-i mail cavq-a nail daoq bhai juq khi nuljuq bhai niailhai ge lavq bhel. Yeiqsul yavq kha lee-u kev dai, aqdoevq doevq thailthaiq nail ngadao juq neq, sil jel-a nail tsaol-aq juq nail iqmoeq nee ya kev lai nail maq ngel-ail.
16 Yeiqsul nqtavq kovtavq nee yavq kha lee-u phao, daoq bivq nail aqthel bhai maqkhaiq, eeq jaiq nail nqtavq gaqkhoel gaq nail aqthel bhai maqkhaiq, Miqyail nail nqbho jiiv nail aqthel bhai maqkhaiq, ya gaiq nail ngaol. Aq-u phao, Yeiqsul bhai neema thaqtsaol khi sil jel-a nail juq iqmoeq gaoq doevq kovq lal nail ngaol.
17 A bhai nee ngal-aq, aqdoevq doevq nail ngadao juq iqsanl aqyu juq nee mail teevq gaq khe-ai, nqdil jiav duq bha tsiq dal lai lavq khi daqmoe bha Yeiqsul nee mail ya thaoqphuq lai nail ngaol. Alheel ngel-i mail, ngadao juq Yeiqsul nee khaq mao iqsanl ya jaol nail ngaol.
18 Alheel ngel-i mail, nuljuq teevq gaq nee teevq gaq ganl niil ge ge-ail gaq bivq yaoq.