5
Heeqphaq Yeiqsul yavq kha lee nail haqbhoil lainq-ai thaq yaoq
1 Aqivq jaqbheq juq-ol, Yeiqsul yavq kha lee nail yanq yanq lao khi aqkovq aqlav nail ganl, nvjuq nuljuq bhai gevq bhiq nail maq loq yaoq-aol.
2 Khul khi mail dai ngal-aq neq, hul-iq tsilma khoiqbhaoq bhaoq lee nail khe-ai, Yeiqsul yavq kha lee nail aqn kev lee nail ngaol dai, nuljuq heeq nia nail ngaol.
3 Milkhaoq sal lal khi, geesil nail maq jiav yaoq-aol dai, yu ge thailthaiq-u phao, luq-ail seil-ail nail phaq aqyu juq nail kovtavq bhai kev lee nail ngaol. Yaq tsiq nail aqyanq tsaq lal-a nail aqma teevq gaq ovqmav nal dov lal-a nail khe-ai, thaiqphuq dai kev lee khi, aqyu juq maq jel-ail nia-ail.
4 Thailhai ngaol-aoq, aqivq jaqbheq juq-ol, nuljuq neq aqnav nail lavqkhoel bhai jaol nail tsaol-aq maq ngel nail ngel-i mail, Yeiqsul lee nail aqn aqyanq al khoiqbhaoq bhaoq lee nail khe-ai thaiqphuq dai, nuljuq nail kovtavq bhai maq kev lee-ail.
5 Khul khi mail dai ngal-aq neq, nuljuq iqsanl aqbhaq nail lavqkhoel bhai jaol nail yaq khi, n-gaol nail yaq ngaol. Neema thaqtsaol nail ngadao juq neq, nqkiv nail yaq khi, aqnav nail lavqkhoel bhai jaol nail yaq maq ngel-ail.
6 Alheel ngel-i mail, yu iqthaiq kovq-ai thaq nail khe-ai, ngadao iqthaiq iqthaiq-ail maq ya jaol-ail. Ngadao aqmeeq-ai yovqgavq nail neema bhai yovqgavq gaq lai khi aqgeel geel dai, ya jaol nail ngaol.
7 Khul khi mail dai ngal-aq neq, tsaol-aq yaq neq nqkiv phao iqthaiq nail ngaol. Jilpheeq daol bov nail tsaol-aq juq iqsanl, nqkiv phaoq daol bov nail ngaol.
8 Ngadao neq, n-gaol nail yaq ngel-i mail, yovqgavq nail neema bhai yovqgavq gaq lai bhel. Neema thaqtsaol nail phaq khi mail goil nail gaiq-a nail phaq bhai, doeq daq duq khe-ai doi khi, hevqkovq nail phaq ya dai, noeqthunq nail phaq bhai hail uqtsaoq khe-ai tsaoq khi jaol bhel.
9 Khul khi mail dai ngal-aq neq, Miqyail aivq yalkhaq dal nail phaq bhai bhi daq nail dai khi, ngadao bhai tsel dov lavq-a nail maq ngel-ail. Ngadao nail Heeqphaq Yeiqsul Khali bhaqda nee hevqkovq nail phaq ya dai, aivq ngadao bhai tsel dov lavq-a nail ngaol.
10 Yeiqsul yavq kha lee-u phao, ngadao doevq khi ngaol-aoq, sil khi ngaol-aoq, aivq nee mail teevq gaq khe-ai ya jaol dai, Yeiqsul neq, ngadao juq nail haqbhoil sildan-a nail ngaol.
11 Alheel ngel-i mail, niil aq-il nuljuq teevq gaq nee teevq gaq gaq bivq khi, eeq lal heel lal thailthaiq nail khe-ai, iqmoeq phao iqsanl nl dal laivq yaoq.
Paolluv aqyu juq bhai gaq bivq-a nail ganl
12 Aqivq jaqbheq juq-ol, nvjuq nuljuq bhai niailhai hal nail ngaol. Nuljuq nail lavqkhoel bhai Miqyail nail ganl nl nail juq bhai ev yaoq. Aqyu juq neq, Yeiqsul nail aqmil kov-uvq nee nuljuq bhai heldaiq phail khi, aqmeeq-ai cavq lavq cov lavq nail ngaol.
13 Aqyu juq alhai nl-a nail bhaqda nee nuljuq nail neema lavqkhoel nee aqyu juq bhai gaiq-a khi mailma-ail ev yaoq. Alhai dul dai, nuljuq nail gaiqlaq bhai iqsanl tsaq lai jil lai yaoq.
14 Aqivq jaqbheq juq-ol, nvjuq nuljuq bhai gaq niailhai bivq nail ngaol. Khul teevq phaq iqsanl maq nl maq hal nul nail tsaol-aq bhai aqmeeq-ai cavq bhiq cov bhiq yaoq. Al ovqtavq, geesil nia nail tsaol-aq juq khi gaq bhaq nail juq bhai iqsanl gaq bivq yaoq. Tsaol-aq iqsanl nail kovtavq bhai neema heelma ma dai, thaq yaoq.
15 Yu aqdoil phaq nl lal khi ngaol-aoq, aqdoil phaq teevq gaq bhai iqsanl thaq nl kovq bhiq. Nuljuq nail gaiqlaq bhai maqkhaiq, tsaol-aq iqsanl bhai maqkhaiq, khaq mao iqsanl aqmeeq phaq taivq-ail ya nl bhiq dai, laijai yaoq.
16 Khaq mao iqsanl lavqkhiq tsail yaoq.
17 Maq ceiv lai dai, geeqlaoq hal yaoq.
18 Khalheel phaq bhai ya thaoqphuq khi ngaol-aoq, Miqyail bhai tsiqeeq yaoq. Nuljuq Yeiqsul Khali nail lavqkhoel-ai aqdoevq alhai doevq nail bhai Miqyail neema tsaq nail ngaol.
19 Aqhaqlal Miqyail nl nail hal nail bhai thaq lav tsoiq.
20 Miqyail nail haqbhoil gedan nail juq nail daoq bhai khal ge movq-ail thaq ge.
21 Thailhai ngaol-aoq, yaoq phaq yaoq-ao nee aqmeeq-ai tsaotsel daiq khi aqmeeq phaq bhai nieivq thaiq-ai thaq yaoq.
22 Maq meeq nail yaoq phaq yaoq-ao nee bhai, gail jao jao yaoq.
Haoqnao naoq saq khe daoq khi geeqlaoq bivq nail daoq
23 Ngadao bhai neesal-ovq nail phaq bivq lavq nail Miqyail nuljuq bhai teevq bhee teevq lovq bhi meeq bhi haol lal khi, ngadao nail Heeqphaq Yeiqsul Khali yavq kha lee-u phao, nuljuq nail neema, aqmaol, aqhaqlal iqsanl bhai, oeqbal thaq duq maq jiav dai, Miqyail heldaiq phail dei-eiq.
24 Nuljuq bhai khul-a nail Miqyail neq, nuljuq bhai alhai heldaiq phail lavq nail ngaol. Khul khi mail dai ngal-aq, aivq neq, saljial ivq nail ngaol.
25 Aqivq jaqbheq juq-ol, nvjuq nail haqbhoil iqsanl geeqlaoq hal tsao lavq yaoq.
26 Aqivq jaqbheq Khali yaq juq iqsanl bhai meeq nail haol nail lavqkhoel nee, aqlavq he yaoq.
27 Haoqgavq niil aqivq jaqbheq Khali yaq juq iqsanl bhai ge daiq bhiq yaoq dai, ngal Yeiqsul bhai juq khi nuljuq bhai hal nail ngaol.
28 Nuljuq nail kovtavq bhai ngadao nail Heeqphaq Yeiqsul Khali nail geeqlaoq eeljaol jiav dei-eiq.