22
Yuldav Yeiqsul bhai gaoqjaq-a nail ganl
1 Aq-u phao, Bhaqsaqkhaq bhaoqaiq dai khul nail, deqtsiq maq goe dai, khaqmul lav sav nail bhaoqaiq aqjail jail lal-a nail ngaol.
2 Philma juq khi mail aoldaoq kovqdaoq cavq nail cov nail juq neq, khalhai khi mail, Yeiqsul bhai aqtsi tsu dai deeq heivq heeq meeq dai, naoqjaoq nail ngaol. Khul khi mail dai ngal-aq neq, aqyu juq tsaol-aq munl munl ma al juq bhai geesil nail ngaol.
3 Aq-u phao yaqlaol tsel-nvq gaq nail lavqkhoel khe aol nail, Ilsaqgaqliqoq dai khul nail Yuldav al gaq nail neema lavqkhoel bhai, neivq Saqdaq aol lai-a nail ngaol.
4 Yuldav dov ail khi, Philma juq khi mail uqhuq thaoq nail ilkhaol il ma bhai heldaiq nail aqivq juq jaol nail bha lai khi mail, “Ngal Yeiqsul bhai nuljuq nail aqlavq lavqkhoel bhai khalhai khi ya av bhiq heeq” dai, aqyu juq jaol nail bha ge tsaoq pheeljaq lai-a nail ngaol.
5 Aqyu juq lavqkhiq tsail deedee lal bhiq khi mail, “Naoq bhai phul bivq naol” dai, ge bhiq-a nail ngaol.
6 Yuldav iqsanl neema tsaq khi, tsaol-aq munl munl ma maq jaol-u phao, Yeiqsul bhai aqyu juq nail aqlavq lavqkhoel bhai av bhiq nail, khaq mao eivq lal-ail meeq dai, halpov-a nail ngaol.
Bhaqsaqkhaq jaq nail haqbhoil lav sav thaq ail-a nail ganl
7 A bhai nee ngal-aq, Bhaqsaqkhaq bhaoqaiq lav sav nail haqbhoil yaol aqyaq ya heivq nail aqn pevq nail, deqtsiq maq goe dai, khaqmul lav sav nail aqn kev lal-a nail ngaol.
8 Aq-u phao, Yeiqsul Bheiqtuvluv khi mail Yaolhaq bhai khul khi, “Ngadao juq Bhaqsaqkhaq bhaoqaiq jaq kivq dai, ngadao juq nail haqbhoil lav sav thaq ail yaoq” dai, ge bhiq-a nail ngaol.
9 “Khul dao bhai bhi lav sav thaq-ail movq nail-aiq” dai, aqyu nvq gaq Yeiqsul bhai naldaiq-a nail ngaol.
10 Yeiqsul ge nail: “Nul-nq nvq gaq meenq bhai ail kev-u phao, meldel bavq-nvq thaq nail yaqyov-aq teevq gaq bhai ya thaoqphuq nail ngaol. Aq-u phao, aivq nail haoqnao tsaothel-aivq khi, aivq-i mail aol ail nail ilkhaol bhai aol ail yaoq.
11 Al khai-aq neq, ilheel gaq bhai niailhai ge bhiq yaoq: ‘Saqlaq ge nail: ngal ngaq nail yaqlaol juq nee mail Bhaqsaqkhaq bhaoqaiq jaq kivq dai, daq-i naq duq, khaq bha jiav nail geiq’ dai, naldaiq ail dei-eiq.
12 Aq-u phao, pultavq teiv-nvq bhai jiav nail lav sav-ai thaq nail daq-i naq duq teevq dao aivq nul-nq nvq gaq bhai hevqdaiq lavq nail ngaol. A bhai lav sav thaq ail yaoq” dai, aqyu nvq gaq bhai ge bhiq khi khoel gai-aivq-a nail ngaol.
13 Aqyu nvq gaq ail-u phao, Yeiqsul-i mail ge bhiq-a nail khe-ai ya moel khi, Bhaqsaqkhaq bhaoqaiq jaq nail haqbhoil lav sav ail-a nail ngaol.
Bhaqsaqkhaq bhaoqaiq jaq nail ganl
14 Bhaqsaqkhaq jaq nail yanq kev lal-u phao, Yeiqsul kovqkhail bhai jaoljaoq-a nail ngaol. Aivq nail gaqkhoel juq iqsanl, aivq nee mail jaoljaoq-a nail ngaol.
15 Aq-u phao, Yeiqsul ge nail: “Ngal haq dee aoq deedee phaq bhai maq ya daq-u nee mail, nuljuq nee teevq gaq khe-ai, Bhaqsaqkhaq bhaoqaiq niil, jaq movq deedee-ail nial.
16 Ngal nuljuq bhai ge lavq bhel. Miqyail Milkhaoq lavqkhoel bhaoqaiq niil nail daoqceevq maq bhee lal-u kev dai, bhaoqaiq niilniai ngal maq jaq yaoq-aol” dai, aqyu juq bhai ge bhiq-a nail ngaol.
17 A bhai nee ngal-aq, aivq khaoqanq tsiq khi, Miqyail bhai tsiqeeq gaq khi mail ge nail: “Khaoqanq niil tsiq khi teevq gaq micil micil dai, daol yaoq.
18 Ngal nuljuq bhai ge lavq bhel. Miqyail Milkhaoq maq kev lee-u kev dai, ngal aqheeq tsilju nail ullul maq daol yaoq-aol” dai, Yeiqsul aqyu juq bhai ge bhiq-a nail ngaol.
Yeiqsul bhai noeq kev khi, iqmoeq ilmoeq khaqmul jaq tavq-a nail bhaoqaiq
19 Aivq khaqmul oil khi, Miqyail bhai tsiqeeq-a nail ngaol. A bhai nee ngal-aq, khaqmul al ngaoqpav khi, yaqlaol juq bhai tsiq bhiq khi ge bhiq-a nail: “Niil neq, nuljuq nail haqbhoil laol bhiq-a nail, ngaq nail aqmaol ngaol. Ngaq bhai ya noeq kev dai niailhai nl yaoq” dai, ge bhiq-a nail ngaol.
20 Alhai dul dai, aoq kivq jaq gaq-u phao, Yeiqsul aqheeq tsilju nail ullul deq nail khaoqanq tsiq khi ge nail: “Khaoqanq niil neq, daoqma saljial aqsivq bhai tavq nail, ngaq nail aqsivq ngaol. Aqsivq niil, nuljuq nail haqbhoil bhi il lee nail ngaol” dai, ge bhiq-a nail ngaol.
Khul gaq Yeiqsul bhai yu nail aqlavq lavqkhoel bhai av bhiq nail-aiq.
21 Yeiqsul gaoq ge nail: “Thailhai ngaol-aoq, ngaq bhai yu nail aqlavq lavqkhoel bhai av bivq nail al gaq ngaq-ai nee mail kovqkhail teevq khail bhai taivq-ail jaq thailthaiq nail ngaol.
22 Tsaol-aq nail Yaqyov neq, Miqyail-i mail aivq nail ganl noeqceiv-ai thaq nail khe-ai, ya sil nail ngaol. Thailhai ngaol-aoq, aivq bhai yu nail aqlavq lavqkhoel bhai av bhiq nail gaq neq, geeqlaoq aqdoil ya nail ngaol” dai, ge bhiq-a nail ngaol.
23 Aq-u phao, yaqlaol al juq: “Ngadao juq nail lavqkhoel khe, khaq sil gaq Yeiqsul bhai, yu nail aqlavq lavqkhoel bhai av bhiq nail meeq” dai, aqyu juq nail gaiqlaq bhai ge pheeljaq nail ngaol.
Khul gaq eeq jaiq nail-aiq
24 Al ovqtavq, “Ngadao juq nail lavqkhoel, khul gaq yu nee maqtsil eeq jaiq nail-aiq” dai, yaqlaol juq nail gaiqlaq bhai ge pheeljaq-a nail ngaol.
25 Aq-u phao Yeiqsul ge nail: “Miltsaq kovtavq khe heeqphaq heeq ma juq neq, miltsaq yaq bhai uvthaiq nail ngaol. Miltsaq yaq neq, aqyu juq nail kovtavq bhai bhaqaoq jiav nail juq bhai, geeqlaoq nl lavq-a nail juq dai, khul nail ngaol.
26 Thailhai ngaol-aoq, nuljuq alhai thaq khi. Nuljuq nail lavqkhoel, yu nee maqtsil eeq nail gaq, yu nee maqtsil nil nail gaq khe-ai jaol yaoq. Aqivq jiovq nail gaq iqsanl, yaqkav khe-ai jaol yaoq.
27 Khul gaq eeq jaiq nail-aiq, jaoldeel khi jaq thailthaiq nail gaq laiq. Maq ngel haq neq, aoqbhaol lav sav bhiq nail gaq laiq. Jaoldeel khi jaq thailthaiq nail gaq, eeq jaiq nail maq ngel-ail laiq. Thailhai ngaol-aoq, ngal neq, nuljuq bhai aoqbhaol lav sav bhiq nail gaq khe-ai dul nail ngaol.
28 Ngal jalmul mul nail bhai ya daq-u phao, nuljuq neq, khaq mao iqsanl ngaq-ai nee mail jaol nail tsaol-aq ngaol.
29-30 Ngaq nail aqbhu, ngaq bhai heeqphaq bhi jiovq lavq khi bhi uvthaiq lavq-a nail khe-ai dul dai, nuljuq ngaq nail Milkhaoq nail lavqkhoel bhai jaol khi jaq nail daol nail bhai maqkhaiq, doiqbev bev ma bhai jaoldeel khi, Ilsaqleiqlal nail jeq-e tsel-nvq jeq-e bhai yalkhaq dal dai maqkhaiq, ngal nuljuq bhai alyaq bivq naol” dai, ge bhiq-a nail ngaol.
Bheiqtuvluv, “Naol ngaq bhai maq heeq kivq-ail dai, jil naol” dai, Yeiqsul ge nail
31 Yeiqsul gaoq ge nail: “Silmoq-ol, Silmoq-ol, gov bhai pheeqjaiq-i mail aoq nail khe-ai, neivq Saqdaq nuljuq bhai aoq nail dai, khi hal ya-ai thaq nail ngaol.
32 Thailhai ngaol-aoq, naol neema thaqtsaol nail phaq maq ya cov-ail dai, ngal naoq nail haqbhoil geeqlaoq hal-a nail ngaol. Naol noeq pov khi kovq lal-u phao, naoq nail aqtsaoq yaqlaol juq bhai gaq bivq yaoq” dai, ge bhiq-a nail ngaol.
33 Aq-u phao Silmoq ge nail: “Heeqphaq-ol, thaonq bhai maqkhaiq, sil nail phaq bhai maqkhaiq, ngal naoq-ai nee mail teevq gaq khe-ai ail nail dai khi ngal lainq-ai thaq nail ngaol” dai, Yeiqsul bhai ge bhiq-a nail ngaol.
34 Yeiqsul ge nail: “Bheiqtuvluv-ol, ngal naoq bhai ge lavq bhel. Yanq-nl kiv yavphoil maq doil lal nail lavqkhoel, naol ngaq bhai, maq heeq kivq-ail dai, hail pov kev dai, jil naol” dai, ge bhiq-a nail ngaol.
Haq nail phaq kev lee nail aqjail jail lal-aoq nail ganl
35 Aq-u phao, Yeiqsul aqyu juq bhai ge bhiq-a nail: “Ngal nuljuq bhai khoel gai-aivq-u phao, phul baivluvq, phalthaoq khi mail saiqnaov thaq oil-aivq dai, ge bhiq-a nail ngaol. Aq-u phao, nuljuq teevq phaq ganav loq nail laiq” dai, Yeiqsul naldaiq-u phao, “Teevq phaq-ail maq loq-ail” dai, aqyu juq ge bhiq-a nail ngaol.
36 Yeiqsul ge nail: “Thailhai ngaol-aoq, niil thal khe pov neq, phul baivluvq jiav nail tsaol-aq juq, oil-aivq yaoq. Phalthaoq jiav nail tsaol-aq, hal-aivq yaoq. Thaoma maq jiav nail tsaol-aq, yovqgavq nail aqgaq aqdoi gaoq khi, thaoma ul ail yaoq.
37 Ngal nuljuq bhai ge lavq bhel. ‘Aivq bhai haqeiv nail tsaol-aq nee mail yu saol-nvq bhoel naol’ dai, gevq-ai thaq nail Jalliq daoq al daoq, ngaq nail lavqkhoel bhai ya bhee lal nail ngaol. Khul khi mail dai ngal-aq neq, ngaq nail ganl gevq-ai thaq nail juq ya bhee lal nail ngaol” dai, aqyu juq bhai ge bhiq-a nail ngaol.
38 Aq-u phao, aqyu juq ge nail: “Heeqphaq-ol, niilniai thaoma nvq keiv jiav-ail nial” dai, ge bhiq-u phao: “Thailhai phal-iq neq, gaq-ao nial” dai, Yeiqsul aqyu juq bhai ge bhiq-a nail ngaol.
Yeiqsul Saqloq gaoqjaoq bhai geeqlaoq hal lai-a nail ganl
39 Yeiqsul meenq nee dov ail khi, aivq aol jiav nail khe-ai, Saqloq gaoqjaoq bha dav lai-a nail ngaol. Yaqlaol juq iqsanl aivq nail haoqnao tsaothel laivq-a nail ngaol.
40 Yeiqsul a bhai lai kev-u phao, “Nuljuq jalmul mul nail haoqnao maq ya tsaothel-aivq dai, geeqlaoq hal hal-ail jaol yaoq” dai, aivq aqyu juq bhai ge bhiq-a nail ngaol.
41 Yaqlaol juq jaol nail nee lovmav teevq liv livkheel kivq dai, ail eq khi, peevqceevq kovdoiq doiq khi mail, geeqlaoq hal ail-a nail ngaol.
42 “Aqbhu-ol, naol neema tsaq haq neq, haq dee aoq deedee nail niil nee, ngaq bhai bhi jel-ail lavq yaoq. Thailhai ngaol-aoq, ngal neema tsaq nail khe-ai, thaq bhi pevq. Naol neema tsaq nail khe-ai, bhi pevq yaoq” dai, geeqlaoq hal-a nail ngaol.
43 Aq-u phao, nqtavq gaqkhoel teevq gaq nqtavq nee mail dov lee khi, Yeiqsul bhai gaq bivq lee-a nail ngaol.
44 Aivq nail neema lavqkhoel bhai haq aoq nl deedee nail ngel-i mail, iqmoeq-u nee maqtsil geeqlaoq hal-a nail ngaol. Aq-u phao, aivq nail khiqtsal aqsivq sivq phai khe-ai, pevq-ail khi, miltsaq bhai jiav kha nail ngaol.
45 Aivq alhai geeqlaoq hal gaq khi, thul khi mail yaqlaol juq jaol nail bha kovq lal-u phao, aqyu juq noeqhaq deedee nail lavqkhoel nee iqthaiq nail bhai, ya moel-a nail ngaol.
46 “Khul khi mail nuljuq iqthaiq nail-aiq. Thul yaoq. Jalmul mul nail haoqnao maq ya tsaothel-aivq dai, geeqlaoq hal hal-ail jaol yaoq” dai, Yeiqsul aqyu juq bhai ge bhiq-a nail ngaol.
Yeiqsul bhai nieivq-a nail ganl
47 Yeiqsul alhai ge thailthaiq-u phao, gaqkhoel tsel-nvq gaq nail lavqkhoel bhai aol nail Yuldav dai khul nail al gaq, tsaol-aq munl munl ma hevq khi lee-a nail ngaol. Aivq Yeiqsul bhai moeqsaol saol nail dai khi, Yeiqsul nail aqjail bhai jiiv lai-a nail ngaol.
48 Aq-u phao, Yeiqsul ge nail: “Yuldav-ol, naol moeqsaol saol nail khe-ai tavq khi, tsaol-aq nail Yaqyov bhai yu nail aqlavq lavqkhoel bhai av bhiq nail laiq” dai, ge bhiq-a nail ngaol.
49 Yeiqsul nee mail jaol nail juq neq, khalhai pevq lal nail ganl heeq nia khi, “Heeqphaq-ol, nvjuq thaoma-i mail ya tsil nail laiq” dai, naldaiq-a nail ngaol.
50 Aqyu juq nail lavqkhoel khe teevq gaq, Philma nail yaqkav bhai tsil gai-aivq khi, lavqmal phao khe naqkov ceiv ail-a nail ngaol.
51 Yeiqsul ge nail: “Gaq-ao naol! Thaq gaoq nl” dai, ge khi, yaqkav al gaq nail naqkov bhai thoiqtsi khi mail lav meeq bhiq-a nail ngaol.
52 Aq-u phao, Yeiqsul aivq jaol nail bha lee kev-ai thaq nail Philma juq, uqhuq thaoq nail ilkhaol il ma bhai heldaiq nail aqivq juq khi mail, Yuldav tsaol-aq nail aqivq aqtsu juq bhai ge bhiq-a nail: “Nuljuq tsaolpheel bhai nieivq nail khe-ai, thaoma khi mail doiqthoi bavq khi, ngaq bhai nieivq lee-a nail laiq.
53 Ngal yaoq n yaoq n nee mail uqhuq thaoq nail ilkhaol il ma bhai nuljuq nee mail jaol khi ngaol-aoq, nuljuq ngaq bhai maq nieivq-al. Thailhai ngaol-aoq, yanq niil yanq neq, nuljuq nail yanq ngaol. Niil aq-il neq, aqnav nail bhaqaoq uvthaiq nail ngaol” dai, ge bhiq-a nail ngaol.
“Yeiqsul bhai maq heeq kivq-ail” dai, Bheiqtuvluv jil-a nail ganl
54 Aq-u phao, aqyu juq Yeiqsul bhai nieivq khi, Philma nail ilkhaol bha hel-aivq-a nail ngaol. Bheiqtuvluv neq, Yeiqsul nail haoqnao al jaiq-ail maq eq nail bhai tsaothe jaol-nvq thaq nail ngaol.
55 Ilkhaol nail khainl lavqkhoel bhai tsaol-aq teevq pav ganav juq miqjaq sivtovq khi teevq dao bhai taivq-ail jaoldeel-nvq thaq nail bhai, Bheiqtuvluv iqsanl aqyu juq nee mail jaoldeel lai-a nail ngaol.
56 Bheiqtuvluv miqjaq aqbhaq bhaq nail bhai jaoldeel-nvq thaq nail bhai, yaqkav jiovq nail yaqmai-aq teevq gaq ya moel khi, aivq bhai heldaiq cov-ai thaq khi mail: “Thoil gaq iqsanl, Yeiqsul nee mail jaol nail tsaol-aq ngaol” dai, ge nail ngaol.
57 “Yaqmiq-ol, naoq-i mail ge nail gaq bhai, ngal maq heeq kivq-ail” dai, Bheiqtuvluv jil-a nail ngaol.
58 Teevq yanq gaoq khi-al ngal-aq neq, yaoq gaq yaoq Bheiqtuvluv bhai moel khi, “Naol iqsanl, aqyu juq nail munl lavqkhoel bhai aol nail teevq gaq nial” dai, ge bhiq-u phao, “Aqtsaoq-ol, ngal maq ngel-ail” dai, Bheiqtuvluv ge kovq bhiq-a nail ngaol.
59 Naqli teevq lavq niidai bhee lal-u phao, “Thoil gaq iqsanl, maldil dai, Yeiqsul nee mail jaol nail tsaol-aq ngaol. Khul khi mail dai ngal-aq neq, aivq nail aqthel, Gaqliqlail nail tsaol-aq nail aqthel niil” dai, yaoq gaq yaoq mailma-ail ge nail ngaol.
60 “Yaqyov-ol, naol ge nail daoq bhai ngal maq heeq kivq-ail” dai, Bheiqtuvluv ge-a nail ngaol. Aivq alhai ge thailthaiq-u phao, teevq pov taivq-ail yavphoil doil lal-a nail ngaol.
61 Aq-u phao, Yeiqsul Bheiqtuvluv bhai haoqnaol naolkovq kovq daiq-a nail ngaol. “Yanq-nl kiv yavphoil maq doil lal nail lavqkhoel, naol ngaq bhai maq heeq kivq-ail dai, hail pov kev dai jil naol” dai, Yeiqsul-i mail ge bhiq-ai thaq nail daoq al daoq bhai, Bheiqtuvluv noeq dov lal-a nail ngaol.
62 A bhai nee ngal-aq, aivq dov ail khi nioil deedee-a nail ngaol.
Yeiqsul bhai meelnaq meelnaq-ail, deeq-a nail ganl
63 Yeiqsul bhai lovq nail tsaol-aq al juq, aivq bhai meelnaq meelnaq-ail, deeq-a nail ngaol.
64 Aqyu juq, aivq bhai maivpheeq pheeq khi, “Naoq bhai khaq sil gaq deeq nail-aiq dai, Miqyail nail haqbhoil gedan nail gaq khe-ai, nvjuq bhai ge daiq lavq yaoq” dai, ge bhiq-a nail ngaol.
65 A bhai nee ngal-aq, aqyu juq Yeiqsul bhai khal ge movq-ail mee nia phaq ge bhiq-a nail ngaol.
Maoqbhaoq nl nail munl munl ma juq Yeiqsul bhai yalkhaq dal-a nail ganl
66 Nqbhaq bhaq lal-u phao, Yuldav tsaol-aq nail aqivq aqtsu jiovq-ai thaq nail juq khi, Philma juq khi mail, aoldaoq kovqdaoq cavq nail cov nail juq maoqbhaoq nl nail khi, jil lal-a nail ngaol. Aq-u phao, yu Yeiqsul bhai aqyu juq nail sivtavq bhai hel-aivq-a nail ngaol.
67 “Naol Khali phal-iq neq, nvjuq bhai ge lavq yaoq” dai, aqyu juq Yeiqsul bhai ge bhiq-a nail ngaol. Yeiqsul ge nail: “Ngal ge bhiq khi ngaol-aoq, nuljuq neema maq thaqtsaol-ail.
68 Ngal nuljuq bhai teevq phaq ganav gaoq naldaiq khi ngaol-aoq, nuljuq maq ge kovq lavq-ail.
69 Thailhai ngaol-aoq, tsaol-aq nail Yaqyov neq, yaqhao bhaqaoq aol nail Miqyail nail lavqmal phao ya jaoldeel nail ngaol” dai, aqyu juq bhai ge bhiq-a nail ngaol.
70 Thailhai phal-iq neq, “Naol Miqyail nail Yaqyov laiq” dai, aqyu juq iqsanl mail, Yeiqsul bhai naldaiq-a nail ngaol. “Nuljuq-i mail ge nail khe-ai, ngal pevq naol” dai, Yeiqsul aqyu juq bhai ge kovq bhiq-a nail ngaol.
71 Aqyu juq ge nail: “Ngadao juq khul nail salkhil gaoq loq nail-aiq. Ngadao juq aivq ge nail daoq ya gaiq-ao nail ngaol” dai, aqyu juq ge nail ngaol.