23
Yeiqsul bhai heeqphaq Phillav jaol nail bha hel-aivq-a nail ganl
1 Aq-u phao, jil lal-a nail tsaol-aq iqsanl mail tsaoq thul lal khi, Yeiqsul bhai heeqphaq Phillav jaol nail bha hel-aivq-a nail ngaol.
2 Aqyu juq, Yeiqsul nail kovtavq bhai oeqbal thaq thaq-ail khi ge nail: “Tsaol-aq niil gaq, nvjuq nail jeq-e jaq-a bhai gailkhaol hevq bheel-aivq khi, heeqphaq Gailsaq bhai khaon thaq dov bhiq dai, lav tsoiq nail ngaol. A bhai nee pultavq, ‘Ngal neq, Khali dai khul nail heeqphaq ngaol’ dai, iqsanl aivq ge nail bhai nvjuq ya gaiq, ya moel-a nail ngaol” dai, aqyu juq ge nail ngaol.
3 “Naol Yuldav tsaol-aq nail heeqphaq ngaol laiq” dai, Phillav Yeiqsul bhai naldaiq-a nail ngaol. “Naol ge nail khe-ai, ngel naol” dai, Yeiqsul ge kovq bhiq-a nail ngaol.
4 “Ngal aivq nail lavqkhoel khe laiq nail tsa nail teevq phaq iqsanl maq moel-al” dai, Phillav Philma juq khi tsaol-aq munl munl ma juq bhai ge bhiq-a nail ngaol.
5 Thailhai ngaol-aoq, aqyu juq iqmoeq-u nee maqtsil, gaoq laijai lal khi gul nail: “Tsaol-aq niil gaq Gaqliqlail milkhaoq nee mail niai kev dai, Yuldav milkhaoq doi dai cavq bhiq cov bhiq khi, milkhaoq yaq juq suqsaq lal dai, gaq bivq nail ngaol” dai, gul bhiq-a nail ngaol.
Yeiqsul bhai heeqphaq Heiqlol jaol nail bha hel-aivq-a nail ganl
6 Gaqliqlail dai, ge nail daoq al daoq bhai, Phillav ya gaiq-u phao, “Aivq Gaqliqlail nail tsaol-aq laiq” dai, naldaiq-a nail ngaol.
7 Yeiqsul neq, heeqphaq Heiqlol uvthaiq nail milkhaoq bhai jaol nail tsaol-aq ngaol dai, Phillav heeq nia-u phao, Yeiqsul bhai Heiqlol jaol nail bha bhi hel-aivq-a nail ngaol. Heiqlol neq, yanq al nail lavqkhoel bhai, Yeiqlulsaqlaiq meenq bha jaol nail ngaol.
8 Heiqlol Yeiqsul bhai ya moel-u phao, lavqkhiq tsail deedee nail ngaol. Khul khi mail dai ngal-aq neq, Yeiqsul nail ganl aivq ya gaiq daiq khi, Yeiqsul-i mail nl nail bhi heeq bhi moel nail teevq phaq ganav nl daiq lavq nail bhai, moel movq nail, maoq lal-aoq nail ngaol.
9 Aq-u phao, aivq Yeiqsul bhai mee nia phaq naldaiq khi ngaol-aoq, Yeiqsul neq, aivq bhai daoq teevq daoq iqsanl maq ge kovq bhiq-al.
10 Philma juq khi aoldaoq kovqdaoq cavq nail cov nail juq a bhai thulphaol khi, Yeiqsul nail kovtavq bhai oeqbal thaq deedee nail ngaol.
11 Heiqlol neq, aivq nail genl dev nail tsaol-aq juq nee mail teevq gaq khe-ai, Yeiqsul bhai khal nl movq-ail nl bhiq khi, meeq deedee nail heeqphaq nail aqgaq aqdoi aqnel bhi doi khi mail, meelnaq meelnaq-ail helsil nail ngaol. A bhai nee ngal-aq, Phillav jaol nail bha bhi hevq kol laivq-a nail ngaol.
12 Aq-u n-gaol neq, heeqphaq Heiqlol khi heeqphaq Phillav teevq gaq nee teevq gaq aqtsaoq tsaoq nail ngaol. Jel lal-u phao neq, teevq gaq nee teevq gaq neejiav jiav lao thaq nail ngaol.
Yeiqsul bhai tavq heivq yaoq dai, dalceiv bhiq-a nail ganl
13 Aq-u phao, Phillav-i mail Philma juq, aqivq jiovq nail juq khi mail, milkhaoq yaq juq bhai khul jil-a nail ngaol.
14 Phillav aqyu juq bhai ge bhiq-a nail: “Tsaol-aq niil gaq, milkhaoq yaq bhai hevq bheeq nail gaq ngaol dai, nuljuq ge khi mail, ngal jaol nail bha hel lavq-a nail ngaol. Nuljuq nail sivtavq bhai ngal aivq bhai naldaiq-u phao, nuljuq-i mail aivq nail kovtavq bhai oeqbal thaq nail khe-ai, ngal oeqbal teevq phaq iqsanl maq moel-al.
15 Heiqlol iqsanl, aivq nail lavqkhoel khe laiq nail tsa nail phaq maq halpov moel nia nail ngel-i mail, ngal jaol nail bha bhi hevq kol lavq thaq nail ngaol. Aivq sil heeq phaq-ail nl laiq thaq nail teevq phaq iqsanl maq jiav-ail.
16 Alheel ngel-i mail, ngal aivq bhai deeq khi phaiq bhiq naol” dai, aqyu juq bhai ge bhiq-a nail ngaol.
17 [Bhaqsaqkhaq bhaoqaiq lav sav-u phao, yaoq kovq yaoq-ao nee, Phillav aqyu juq nail haqbhoil tsaol-aq teevq gaq bhai ya phaiq bhiq nail ngaol.]
18 Aq-u phao, tsaol-aq munl mul lao-ail gul nail: “Tsaol-aq niil gaq bhai tavq heivq yaoq! Nvjuq nail haqbhoil Bhaqlaqbhal bhai phaiq yaoq” dai, teevq gaq khe-ai mailma-ail gul nail ngaol.
19 Bhaqlaqbhal neq, meenq lavqkhoel milkhaoq yaq juq suqsaq lal dai nl nail nee ovqtavq, tsaol-aq bhai heivq-a nail ngel-i mail, thaonq bhai laol-ai thaq nail ngaol.
20 Phillav Yeiqsul bhai phaiq bhiq movq nail ngel-i mail, tsaol-aq al juq bhai teevq pov gaoq ge bhiq-a nail ngaol:
21 Thailhai ngaol-aoq, aqyu juq gaoq gul nail: “Aivq bhai lavqyavq kovtavq bhai tavq heivq yaoq. Tavq heivq yaoq” dai, aqyu juq mailma-ail gaoq gul nail ngaol.
22 Phillav hail pov teevq pov gaoq ge bhiq-a nail: “Khul khi mail, bhi tavq heivq movq nail-aiq. Aivq haqeiv nail phaq khul nl-a nail-aiq. Ngal aivq nail lavqkhoel khe sil heeq phaq-ail laiq nail tsa nail teevq phaq iqsanl maq moel-al. Alheel ngel-i mail, ngal aivq bhai deeq khi phaiq bhiq naol” dai, aqyu juq bhai gaoq ge bhiq-a nail ngaol.
23 Yeiqsul bhai, lavqyavq kovtavq bhai tavq heivq yaoq dai, aqyu juq mailma-ail gul thailthaiq nail ngel-i mail, aqyu juq jaol nail phao, gaq lai-a nail ngaol.
24 Alheel ngel-i mail, aqyu juq-i mail gul nail khe-ai, dalceiv bhiq-a nail ngaol.
25 Milkhaoq bhai suqsaq lal dai nl khi, tsaol-aq bhai heivq-a nail ngel-i mail, thaonq bhai laol-ai thaq nail Bhaqlaqbhal bhai, aqyu juq-i mail hal nail khe-ai phaiq bhiq-a nail ngaol. Yeiqsul bhai neq, aqyu juq-i mail khal nl movq nail khe-ai nl dai, aqyu juq nail aqlavq lavqkhoel bhai av bhiq-a nail ngaol.
Yeiqsul bhai tavq heivq nail khi hel-aivq-a nail ganl
26 Genl dev nail tsaol-aq juq, Yeiqsul bhai hel-aivq-u phao, Khulleiqniq meenq bhai jaol nail Silmoq dai mil-ai thaq nail gaq, yalgaol bha lai khi kovq lal nail bhai nieivq thaiq khi, Yeiqsul nail lavqyavq bhi bavq khi mail Yeiqsul nail haoqnao bhi tsaothel-aivq-a nail ngaol.
27 Tsaol-aq teevq munl, Yeiqsul nail haqbhoil noeqhaq khi, nioilkhaoq khaoq nail yaqmai-aq teevq juq, Yeiqsul nail haoqnao tsaothe jaol nail ngaol.
28 Aq-u phao, Yeiqsul aqyu juq bhai haoqnaol naolkovq kovq khi ge bhiq-a nail: “Yeiqlulsaqlaiq meenq bha jaol nail yaqmai-aq juq-ol, ngal bhaqda nee thaq nioil. Nuljuq yovqgavq nail haqbhoil khi yovqgavq nail yaq nail haqbhoil nioil yaoq.
29 Khul khi mail dai ngal-aq neq, ‘Maq bhao aqma juq neq, geeqlaoq eeq nail ngaol. A bhai nee ovqtavq, yaqbeiv maq uvq daiq-a nail yaqmai-aq khi yaq bhai aqtsil maq bhiq cuvq daiq-a nail yaqmai-aq neq, geeqlaoq eeq naol’ dai, ya ge nail aqn aqyanq kev lee nail ngaol.
30 Aq-u phao, aqyu juq gaoqjaoq juq bhai niailhai ge bhiq nail ngaol. ‘Nvjuq bhai doeqkhaiq lee yaoq.’ Gaoqjaoq jaoq yaq juq bhai iqsanl, ‘Nvjuq bhai phalthaiq lavq yaoq’ dai, ge bhiq nail ngaol.
31 Khul khi mail dai ngal-aq neq, aqyu juq aqbhaol aqjiq bhai niidai phaq-ail nl bhiq haq neq, aqbhaol aqgee bhai neq, khadai gaoq nl bhiq nail ngel-ail” dai, ge bhiq-a nail ngaol.
Yeiqsul bhai tavq heivq-a nail ganl
32 Aq-u phao, aqyu juq Yeiqsul nee mail teevq gaq khe-ai tavq heivq nail dai khi mail, haqeiv nail tsaol-aq nvq gaq bhai iqsanl, hevq dol-aivq-a nail ngaol.
33 Uqcov dai khul nail gaoqjaoq bhai lai kev-u phao, aqyu juq Yeiqsul bhai lavqyavq kovtavq bhai tavq thaiq-a nail ngaol. Haqeiv nail tsaol-aq al nvq gaq bhai iqsanl, aivq nail lavqmal phao teevq gaq, lavqtsel phao teevq gaq dai, tavq thaiq-ai thaq nail ngaol.
34 Aq-u phao, Yeiqsul ge nail: “Aqbhu-ol, aqyu juq nail oeqbal phaiq bhiq yaoq. Khul khi mail dai ngal-aq neq, aqyu juq khalhai nl thailthaiq nail dai, aqyu juq maq heeq nia-ail” dai, ge bhiq-a nail ngaol. A bhai nee ngal-aq, genl dev nail juq neq, Yeiqsul nail aqgaq aqdoi bhai khul gaq khul keiv ya dai, eellaoq bheq khi bhoilpav khi oil-a nail ngaol.
35 Tsaol-aq maodai a bhai thulphaol khi heldaiq-u phao, Yuldav tsaol-aq nail aqivq aqtsu juq Yeiqsul bhai meelnaq meelnaq-ail khi ge nail: “Aivq neq, yu bhai hevqkovq kivq naol geiq. Aivq neq, Miqyail-i mail tsel dov-ai thaq nail Khali dai, khul nail gaq ngel haq neq, aivq nail aqmaol bhai aivq bhi hevqkovq daiq yaoq” dai, ge nail ngaol.
36-37 Genl dev nail juq iqsanl aivq nail aqjail bhai lal khi, aqtsel mao-ail tsel nail aqheeq tsilju nail ullul aivq bhai bhi daol bhi daol-ail khi ge nail: “Naol Yuldav nail tsaol-aq nail heeqphaq ngel haq neq, naoq nail aqmaol bhai naol bhi jel-ail yaoq” dai, meelnaq meelnaq-ail khi ge nail ngaol.
38 “Tsaol-aq niil gaq neq, Yuldav nail tsaol-aq nail Heeqphaq ngaol” dai, gevq khi, Yeiqsul nail uqhuq pultavq phao tavq thaiq-ai thaq nail ngaol.
39 Aivq nee mail bhi tavq heivq-a nail tsaol-aq al nvq gaq nail lavqkhoel khe teevq gaq ge nail: “Naol Khali maq ngel laiq. Naoq nail aqmaol bhai bhi jel-ail khi, nv-nvq gaq bhai iqsanl bhi jel-ail lavq yaoq” dai, Yeiqsul bhai khal ge movq-ail ge bhiq-a nail ngaol.
40 Thailhai ngaol-aoq, nvq gaq teevq gaq aivq nail aqtsaoq bhai khaq khaq-ail khi ge nail: “Naol aivq khe-ai dalceiv-ai thaq nail bhai ya daq khi ngaol-aoq, Miqyail bhai maq geesil lal-ail laiq.
41 Ngadao nvq gaq niailhai ya daq nail neq, tsaq naol. Ngadao nvq gaq nl laiq-a nail ngel-i mail, daq heeq phaq-ail tsaq nail ngel-i mail ya daq nail ngaol. Thailhai ngaol-aoq, tsaol-aq niil gaq neq, khul teevq phaq iqsanl maq nl laiq-al” dai, ge bhiq-a nail ngaol.
42 A bhai nee ngal-aq, aivq ge nail: “Yeiqsul-ol, naol heeqphaq joiqjaq lee-u phao, ngaq bhai thaq nioilpeivq lavq dei-eiq” dai, ge bhiq-a nail ngaol.
43 Yeiqsul ge nail: “Ngal naoq bhai maldil dai, ge lavq bhel. Yanqgaol naol ngaq-ai nee mail Bhaqlaqdilsuv dai khul nail gaoqkhail lavqkhoel bhai ya jaol nail ngaol” dai, ge bhiq-a nail ngaol.
Yeiqsul sil-a nail ganl
44 Aqyanq al neq, n-gaol laolma nee mail, kivq hail lail ma naqli hail lavq bha kev dai, miltsaq kovtavq bhai navtsee dai pevq-ail khi, nlma nail aqbhaq iqsanl maq bhaq-ail.
45 Uqhuq thaoq nail ilkhaol il ma nail lavqkhoel khe thao pav-ai thaq nail haqphal phal ma iqsanl, gaoltsi nee mail nvq pav pav ail-a nail ngaol.
46 Aq-u phao, Yeiqsul mailma-ail gul khi ge nail: “Aqbhu-ol, ngaq nail aqhaqlal naoq nail aqlavq lavqkhoel bhai av bhiq naol” dai, ge nail ngaol. Aivq alhai ge gaq khi, aqhaq ceiv-a nail ngaol.
47 Alhai pevq lal-a nail bhai, genl dev nail teevq yal gaq nail aqivq teevq gaq ya moel-u phao, “Tsaol-aq niil gaq, maldil tsaq nail daol nail tsaol-aq ngel lao thaq nial” dai, ge khi, Miqyail bhai tsiqeeq nail ngaol.
48 A bhai heldaiq lal-a nail tsaol-aq iqsanl mail, alhai pevq lal-a nail bhai, ya moel-u phao, noeqhaq deedee nail lavqkhoel nee, neema bhai deeq deeq-ail khi, kovq ail-a nail ngaol.
49 Thailhai ngaol-aoq, aivq nail aqtsaoq juq khi mail Gaqliqlail milkhaoq nee mail aivq nail haoqnao tsaothel lavq-a nail yaqmai-aq juq neq, al jaiq-ail maq eq nail bhai thulphaol khi, pevq lal thailthaiq nail ganl al juq bhai heldaiq nail ngaol.
Yeiqsul bhai duq pheeq-a nail ganl
50-51 Aq-u phao, Yuldav milkhaoq bhai jiav nail Aqlilmaqthaiq meenq bhai jaol nail, Yaolsai dai mil-ai thaq nail teevq gaq jaol nail ngaol. Aivq neq, meeq nail jaq nail tsaq nail daol nail teevq gaq ngaol. Aivq iqsanl, Miqyail Milkhaoq bhai noeqthunq nail ngaol. Aivq neq, maoqbhaoq nl nail munl lavqkhoel bhai aol khi ngaol-aoq, aqyu juq-i mail maoqbhaoq nl khi ge ceiv-a nail ganl bhai neema maq tsaq-ail.
52 Aivq Phillav jaol nail bha Yeiqsul nail aqmaol hal lai-a nail ngaol.
53 Aivq Yeiqsul nail aqmaol bhai lavqyavq kovtavq nee bavq kha khi, haqphal-i mail maoltoev toev-a nail ngaol. A bhai nee ngal-aq, teevq gaq iqsanl maq bavq bhoel daiq-a nail, lovmav-i mail tavq-ai thaq nail luqdaol nail lavqkhoel bhai bavq duq ail-a nail ngaol.
54 Aq-u n-gaol neq, jaol n n-gaol nail haqbhoil lainq nail aqn pevq khi, jaol n kev lal-aiq nail ngaol.
55 Gaqliqlail milkhaoq bha nee mail, Yeiqsul nee mail lal-a nail yaqmai-aq al juq neq, luqdaol bhai maqkhaiq, aivq bhai bavq duq ail-a nail dao bhai maqkhaiq, tsaothel-aivq khi, heldaiq ail-a nail ngaol.
56 A bhai nee ngal-aq, aqyu juq kovq lai khi, huqbhiq nil nail aqtseel juq khi huqbhiq nil nail ulcuvq lainq-ai thaq nail ngaol. A bhai nee ngal-aq, aoldaoq kovqdaoq bhai gevq-ai thaq nail khe-ai, aqyu juq jaol n n-gaol gaqnaq naq-a nail ngaol.