22
Khaqma hevq nail ganl daoqma uqhuq daoq
1 Yeiqsul daoqma uqhuq daoq nee mail aqyu juq bhai niailhai gaoq ge bhiq-a nail ngaol.
2 “Nqtavq Milkhaoq neq, niailhai dul nail ngaol: Heeqphaq teevq gaq aivq nail yaqyov nail haqbhoil khaqma hevq nail bhaoqaiq lav sav nail dai khi, lainq-ai thaq nail khe-ai dul nail ngaol.
3 Khaqma hevq nail bhai khul-ai thaq nail tsaol-aq juq bhai ‘Niil aq-il lal yaoq’ dai, aivq nail yaqkav juq bhai khoel khi, bhi khul ail-a nail ngaol. Thailhai ngaol-aoq, tsaol-aq al juq maq lal-al.
4 Yaoq pov yaoq yaqkav yaoq juq yaoq bhai gaoq khoel gai-aivq khi, ‘Jaqjaq daoldaol aqmeeq-ai lav sav-ai thaq nail ngaol. Ngaq nail niaoqnel juq khi mail, tsu tsul-ai thaq nail jaiqyaq heivq khi, yaoq phaq yaoq-ao nee aqmeeq-ai lav sav gil-ai thaq nail ngaol. Khaqma hevq nail bhai ge gaiq-ai thaq nail juq bhai lal yaoq geiq’ dai, gaoq bhi khul ail-a nail ngaol.
5 Thailhai ngaol-aoq, aqyu juq ganl al bhai teevq peivq-ail maq thaqeeq dai, teevq pav ganav juq neq, yalgaol bhai ail khi, teevq pav ganav juq neq, jaiqgaiq gaiq ail-a nail ngaol.
6 Teevq pav ganav juq neq, aivq nail yaqkav juq bhai nieivq khi mail khal nl movq-ail nl bhiq khi, heivq-a nail ngaol.
7 Aq-u phao, heeqphaq al gaq neema phail deedee lal bhiq-a nail ngaol. Alheel ngel-i mail, aivq nail genl dev nail tsaol-aq juq bhai khoel khi, aivq nail yaqkav juq bhai heivq-a nail tsaol-aq al juq bhai bhi heivq khi aqyu juq nail meenq iqsanl bhi kheq ha-a nail ngaol.
8 A bhai nee ngal-aq, heeqphaq al gaq aivq nail yaqkav bhai ge bhiq-a nail: ‘Khaqma hevq nail niil aqmeeq-ai lainq thaq gil-ai thaq nail ngaol. Thailhai ngaol-aoq, khul-ai thaq nail tsaol-aq juq neq, bhaoqaiq niilniai maq geel-nvq-il.
9 Alheel ngel-i mail, gailkhaol gail tsil gail lavq khe khal phuq khal moel lee nail tsaol-aq bhai khaqma hevq nail bha lal yaoq’ dai, bhi khul ail nail dai khi, khoel gai-aivq-a nail ngaol.
10 Aq-u phao, yaqkav al juq ail khi, gailkhaol gail tsil gail lavq khe, khal phuq khal moel lee nail tsaol-aq bhai khul khi, khaqma hevq nail bhai teevq bhee khul bheel lavq-a nail ngaol. Jil lal-a nail tsaol-aq al juq nail lavqkhoel tsaol-aq aqmeeq iqsanl aqdoil iqsanl aol nail ngaol.
11 Heeqphaq al gaq khaqma hevq nail bhai lal-a nail juq bhai heldaiq gai-aivq-u phao, khaqma hevq nail bhai lal-u phao, ya doi nail aqgaq aqdoi maq doi-nq thaq nail teevq gaq bhai ya moel-a nail ngaol.
12 ‘Aqtsaoq-ol, naol khaqma hevq nail bhai lal-u phao, ya doi nail aqgaq aqdoi khul khi mail maq doi-a nail-aiq’ dai, heeqphaq al gaq aivq bhai naldaiq bhiq-u phao, tsaol-aq al gaq khul teevq phaq iqsanl maq ge kovq bhiq-al.
13 Aq-u phao, heeqphaq al gaq aivq nail yaqkav bhai ge bhiq-a nail: ‘Tsaol-aq niil gaq bhai khil cuvq lavq cuvq cuvq khi lavqniil phao, navtsee deel bhai bavq ha ail yaoq. A bhai khal jaol nail tsaol-aq, noeqhaq deedee nail lavqkhoel nioil khi haoqgil keivq nail ngaol’ dai, ge bhiq-a nail ngaol.
14 Khul khi mail dai ngal-aq, khul-a nail tsaol-aq maodai jaol khi ngaol-aoq, tsel dov-a nail tsaol-aq micil teevq-eel ngaol” dai, Yeiqsul aqyu juq bhai ge bhiq-a nail ngaol.
Heeqphaq Gailsaq bhai khaon dov bhiq nail ganl
15 Aq-u phao, Phaqliqsail juq dov ail khi, Yeiqsul bhai oeqbal thaq kivq nail haqbhoil, aivq bhai ya ge bheeq dai, khalhai khi bhiq heeq dai, maoqbhaoq nl pheeljaq ail-a nail ngaol.
16 A bhai nee ngal-aq, aqyu juq nail yaqlaol teevq pav ganav juq khi mail Heiqlol nail tsaol-aq teevq pav ganav juq bhai, Yeiqsul jaol nail bha khoel gai-aivq-a nail ngaol. Aqyu juq Yeiqsul bhai ge bhiq-a nail: “Saqlaq-ol, naol neq, maldil tsaq nail daoq taivq-ail ge nail tsaol-aq ngaol. Naol maivphaoq eeq nil maq tsel dai, Miqyail nail gailkhaol nee daolcoev dai, cavq bhiq cov bhiq nail ngaol dai, nvjuq heeq kivq nail ngaol.
17 Alheel ngel-i mail, naol khalhai noeq nail dai, nvjuq bhai ge lavq yaoq. Heeqphaq Gailsaq bhai khaon dov bhiq nail tsaq naol laiq, maq tsaq-ail laiq” dai, naldaiq bhiq-a nail ngaol.
18 Thailhai ngaol-aoq, aqyu juq neema maq daol nail bhai Yeiqsul heeq nia khi, ge bhiq-a nail: “Goiqbhaoq bhaoq nail tsaol-aq juq-ol. Khul khi mail nuljuq ngaq bhai laonqdaiq nail-aiq.
19 Khaon dov-u phao, tavq nail phul teevq bavq ngaq bhai bhi heldaiq lavq yaoq” dai, ge bhiq-u phao, aqyu juq Yeiqsul bhai bivq khi bhi heldaiq-a nail ngaol.
20 “Khaq sil gaq nail maolkhoel, khaq sil gaq nail aqmil aol nail ngel-aiq” dai, Yeiqsul aqyu juq bhai naldaiq-u phao, “Heeqphaq Gailsaq nail niil” dai, aqyu juq ge kovq bhiq-a nail ngaol.
21 “Thailhai phal-iq neq, Gailsaq bhai tavq nail phaq neq, Gailsaq bhai bivq yaoq. Miqyail bhai tavq nail phaq neq, Miqyail bhai bivq yaoq” dai, Yeiqsul aqyu juq bhai ge bhiq-a nail ngaol.
22 Aqyu juq daoq al daoq bhai ya gaiq-u phao, noeq-u maq dov dai, pevq-ail khi, Yeiqsul jaol nail nee dov ail-a nail ngaol.
Gaoq doevq kovq lal nail ganl Yeiqsul bhai naldaiq-a nail ganl
23 Aq-u n-gaol, sil thaq nail tsaol-aq maq doevq kovq lal nia-ail dai, ge nail Saqduqgail nail tsaol-aq teevq pav ganav juq, Yeiqsul jaol nail bha lal khi, niailhai naldaiq lal-a nail ngaol:
24 “Saqlaq-ol, Molseiq-i mail ge-ai thaq nail niailhai jiav nail ngaol: ‘Tsaol-aq teevq gaq yaq maq jaol lee-u nee mail sil haq neq, aivq nail jeq-e jaq-a maq ya peivq-ail dai, jaqbheq gaq aivq nail aqtsu bhai ya hevq nail ngaol’ dai, gevq-ai thaq nail ngaol.
25 Jel lal-u phao, nvjuq nee mail mailnail sivq gaq jaol-a nail ngaol. Aqivq ivqsaq gaq khaqma hevq khi, yaq maq jaol lee-u nee mail sil-a nail ngaol. A bhai nee ngal-aq, jaqbheq gaq aivq nail algao nail khaqma bhai hevq-a nail ngaol.
26 Nvq gaq teevq gaq iqsanl yaq maq jaol lee-u nee mail gaoq sil-a nail ngaol. Alhai dul dai, hail gaq teevq gaq khi mail, sivq gaq teevq gaq bhai kev dai, alhai sil gil-a nail ngaol.
27 Aqyu juq sivq mail sil gil-a nee ngal-aq, yaqmai-aq al gaq iqsanl sil-a nail ngaol.
28 Thailhai phal-iq neq, sil thaq nail tsaol-aq gaoq doevq kovq lal-u n-gaol, yaqmai-aq al gaq khaq sil gaq nail khaqma pevq nail-aiq. Khul khi mail dai ngal-aq neq, aqyu juq mailnail sivq gaq sivq gaq-ail yaqmai-aq al gaq bhai hevq-a nail ngaol” dai, ge bhiq-a nail ngaol.
29 Yeiqsul aqyu juq bhai ge kovq bhiq-a nail: “Nuljuq neq, Jalliq bhai iqsanl, Miqyail nail bhaqaoq bhai iqsanl maq heeq nia nail ngel-i mail, noeq bheeq-ai thaq nail niil.
30 Sil thaq nail tsaol-aq gaoq doevq kovq lal-u n-gaol, hevq pheel maol pheeljaq nail phaq maq bhao-ail. Nqtavq gaqkhoel khe-ai pevq lal nail ngaol.
31 Sil thaq nail tsaol-aq gaoq doevq kovq lal nail ganl nee tavq lai khi, Miqyail-i mail nuljuq bhai ge-ai thaq nail daoq bhai nuljuq teevq thal-iq maq ge daiq haq-al laiq.
32 ‘Ngal neq, Aqbhaqlaqhaq nail Miqyail, Ilcav nail Miqyail khi mail Yaqkov nail Miqyail ngaol’ dai, Miqyail ge-ai thaq nail ngaol. Aivq neq, sil-a nail tsaol-aq nail Miqyail maq ngel-ail. Aqdoevq doevq nail tsaol-aq nail Miqyail ngaol” dai, ge bhiq-a nail ngaol.
33 Tsaol-aq munl munl ma juq daoq al daoq bhai ya gaiq-u phao, aqyu juq Yeiqsul-i mail cavq nail cov nail bhai noeq-u maq dov dai, pevq ail-a nail ngaol.
Aoldaoq kovqdaoq iqsanl nail lavqkhoel khe eeq jaiq nail daoq
34 Saqduqgail juq Yeiqsul bhai daoq maq ge kovq bhiq nia nail ganl Phaqliqsail juq ya gaiq-u phao, aqyu juq jil lai khi maoqbhaoq nl pheeljaq-a nail ngaol.
35 Aqyu juq nail lavqkhoel khe aoldaoq kovqdaoq mao-ail heeq nia nail teevq gaq, Yeiqsul bhai laonqdaiq nail dai khi, niailhai ge bhiq-a nail ngaol:
36 “Saqlaq-ol, aoldaoq kovqdaoq iqsanl nail lavqkhoel bivq-ai thaq nail daoq khul daoq eeq jaiq nail-aiq” dai, Yeiqsul bhai naldaiq bhiq-a nail ngaol.
37 Yeiqsul aivq bhai ge kovq bhiq-a nail: “Naoq nail neema iqsanl, naoq nail aqhaqlal iqsanl, naoq nail neenoeq needul iqsanl, naoq nail Heeqphaq Miqyail bhai gaiq-a yaoq.
38 Bivq-ai thaq nail daoq niil daoq neq, iqsanl nee maqtsil eeq jaiq khi, aoldaoq kovqdaoq iqmoeq ilmoeq khe daoq ngaol.
39 Nvq daoq teevq daoq iqsanl, iqmoeq-u khe daoq khe-ai dul nail ngaol: Naoq nail aqmaol bhai gaiq-a nail khe-ai, naoq nail aqjail bhai jaol nail tsaol-aq bhai gaiq-a yaoq.
40 Aoldaoq kovqdaoq iqsanl khi mail, Miqyail nail haqbhoil gedan nail juq nail daoq iqsanl mail bivq-ai thaq nail daoq niil nvq daoq bhai cavq nail ngaol” dai, Yeiqsul aivq bhai ge bhiq-a nail ngaol.
Khali khaq sil gaq pevq nail ganl
41 Phaqliqsail juq jil lai khi jaol-u phao, Yeiqsul aqyu juq bhai niailhai naldaiq bhiq-a nail ngaol:
42 “Khali nail ganl nuljuq khalhai noeq nail-aiq, aivq neq, khaq sil gaq nail yaqyov pevq nail-aiq” dai, naldaiq bhiq-u phao, “Aivq neq, Daqbhil nail yaqyov ngaol” dai, aqyu juq Yeiqsul bhai ge kovq bhiq-a nail ngaol.
43 Yeiqsul ge nail: “Thailhai phal-iq, Daqbhil neq, Aqhaqlal Miqyail bhai juq juq-ail, Khali bhai Heeqphaq dai, khul khi mail khul nail-aiq.
44 Khul khi mail dai ngal-aq, Daqbhil ge nail:
‘Heeqphaq Miqyail
ngaq nail Heeqphaq bhai
ge bhiq-a nail:
Naoq bhai neejiav
jiav nail tsaol-aq bhai
naoq nail aqkhil
kov-uvq bhai
ngal bhi jaol-u
n-gaol kev dai,
ngaq nail lavqmal phao
jaoldeel yaoq’ dai,
ge-ai thaq nail ngaol.
45 Daqbhil Khali bhai Heeqphaq dai khul nail ngel haq neq, aivq khalhai khi Daqbhil nail yaqyov pevq nia nail-aiq” dai, naldaiq bhiq-a nail ngaol.
46 Tsaol-aq teevq gaq-ail Yeiqsul bhai daoq teevq daoq iqsanl maq ge kovq bhiq nia dai, pevq ail-a nail ngaol. Aq-u n-gaol nee dan khi tsaol-aq teevq gaq iqsanl Yeiqsul bhai daoq teevq daoq iqsanl maq naldaiq tseq dai, pevq ail-a nail ngaol.