23
Yeiqsul aoldaoq kovqdaoq cavq nail cov nail juq khi mail Phaqliqsail juq bhai khaq-a nail ganl
1 A bhai nee ngal-aq, Yeiqsul tsaol-aq munl munl ma juq khi mail aivq nail yaqlaol juq bhai niailhai ge bhiq-a nail ngaol:
2 “Aoldaoq kovqdaoq cavq nail cov nail juq khi mail Phaqliqsail juq neq, Molseiq nail doiqbev bhai jaoldeel-nvq thaq nail ngaol.
3 Alheel ngel-i mail, aqyu juq nuljuq bhai khoel nail khe-ai nl yaoq. Thailhai ngaol-aoq, aqyu juq nl nail khe-ai thaq nl. Khul khi mail dai ngal-aq, aqyu juq ge nail khe-ai, aqyu juq maq nl ail.
4 Aqyu juq maq phi tsaol nail yalkav yu bhai tsiq phi bhiq-a nail ngaol. Thailhai ngaol-aoq, aqyu juq neq, yu-i mail phi-nq thaq nail yalkav bhai aqphai phai lal dai lavqnoil-i mail iqsanl thoeq tsi nail neema maq aol-ail.
5 Aqyu juq-i mail, khal nl khal hal nail iqsanl mail yu ya moel dai taivq-ail nl nail hal nail ngaol. Aqyu juq nail neeqthel khi mail lavqneev bhai pheethaiq-ai thaq nail Jalliq teevq pav ganav juq gevq bav-ai thaq nail haqkov baivluvq al juq khadai guvq eeq-ai thaq nail ngel-ail dai, heldaiq yaoq, aqyu juq nail phailkhaoq phail daoq bhai covq nail daoqhel khadai heel nail ngel-ail dai iqsanl, heldaiq yaoq.
6 Bhaoqaiq lav sav-u phao, yu-i mail thaqeeq-ai thaq nail jaol juq bhai aqyu juq jaoldeel movq-ai bhiq khi, uqhuq thaoq nail ilkhaol juq bhai iqsanl sivtavq phao jiav nail khaoqsail eeq nail doiqbev bhai jaoldeel movq-ai bhiq nail ngaol.
7 Leiv lavqkhoel bhai tsao-u phao, yu aqyu juq bhai bhi ev movq-ai bhiq nail nee ovqtavq, saqlaq dai, bhi khul movq-ai bhiq nail ngaol.
8 Yu nuljuq bhai, saqlaq dai, thaq bhi khul. Khul khi mail dai ngal-aq neq, nuljuq nail saqlaq teevq gaq taivq-ail jaol khi, nuljuq neq, iqsanl mail aqivq jaqbheq pevq nail ngaol.
9 Miltsaq kovtavq bhai jaol nail tsaol-aq teevq gaq bhai iqsanl aqbhu dai, thaq khul. Khul khi mail dai ngal-aq neq, nuljuq nail Aqbhu teevq gaq taivq-ail jaol nail ngaol. Aivq neq, nqtavq kovtavq bhai jaol nail Aqbhu ngaol.
10 Yu nuljuq bhai aqivq jiovq nail gaq dai, thaq bhi khul. Khul khi mail dai ngal-aq, nuljuq bhai aqivq jiovq nail gaq neq, Khali teevq gaq teevq-eel ngaol.
11 Nuljuq nail lavqkhoel yu nee maqtsil eeq jaiq nail gaq, nuljuq nail yaqkav ya jiovq nail ngaol
12 Yovqgavq bhai yovqgavq thaqeeq nail tsaol-aq khul gaq maqkhaiq, thaqtheq nail bhai ya daq nail ngaol. Yovqgavq bhai yovqgavq thaqtheq nail tsaol-aq khul gaq maqkhaiq, thaqeeq nail bhai ya daq nail ngaol.
13 Aoldaoq kovqdaoq cavq nail cov nail juq khi mail Phaqliqsail juq-ol. Nuljuq geeqlaoq aqdoil ya nail ngaol. Khul khi mail dai ngal-aq neq, nuljuq goiqbhaoq al jaiq-ail bhaoq nail niil. Nqtavq Milkhaoq lavqkhoel bhai, yu maq ya aol lai dai, nuljuq lolgov pheeqthaiq-ai thaq nail ngaol. Nuljuq maq aol lai nail nee ovqtavq, aol lai movq nail tsaol-aq bhai iqsanl, lav tsoiq nail ngaol.
14 [Aoldaoq kovqdaoq cavq nail cov nail juq khi mail, Phaqliqsail juq-ol. Nuljuq geeqlaoq aqdoil ya nail ngaol. Khul khi mail dai ngal-aq neq, nuljuq goiqbhaoq al jaiq-ail bhaoq nail niil. Nuljuq miqtsiq miqma nail ilkhaol khi ildaoq maoqgaiq bhai khoeq jaq kav jaq-a nail ngaol. Nuljuq yu bhai bhi moel nail dai khi, geeqlaoq heelma ma dai hal nail ngaol. Alheel ngel-i mail, yu nee maqtsil Miqyail-i mail yalkhaq dal nail bhai ya daq nail ngaol.]
15 Aoldaoq kovqdaoq cavq nail cov nail juq khi mail, Phaqliqsail juq-ol, nuljuq goiqbhaoq al jaiq-ail bhaoq nail niil. Tsaol-aq teevq gaq nuljuq nail yaqlaol pevq lal dai, miltsaq kovtavq bhai khi mail ulcuvq kovtavq bhai nuljuq ail doi-a nail ngaol. Tsaol-aq al gaq nuljuq nail yaqlaol pevq lal-u phao, nuljuq nee maqtsil nvq bhoil, aivq bhai daqovq laoma nail yaq bhi pevq lal-a nail ngaol.
16 Gailkhaol cavq naq nail maivpeivq juq-ol, nuljuq geeqlaoq aqdoil ya nail ngaol. Khul khi mail dai ngal-aq neq, nuljuq ge nail: Tsaol-aq teevq gaq ganav uqhuq thaoq nail ilkhaol il ma bhai juq khi khanq haq neq, aivq-i mail khanq-a nail khe-ai maq nl khi ngaol-aoq, khul maq khi ail. Thailhai ngaol-aoq, uqhuq thaoq nail ilkhaol il ma nail lavqkhoel bhai jiav nail heel bhai juq khi khanq haq neq, aivq-i mail khanq-ai thaq nail khe-ai ya nl nail ngaol dai, nuljuq ge nail ngaol.
17 Maivpeivq peivq nail yaqjaoq khaqlal miqthoi juq-ol. Khul phaq eeq jaiq nail-aiq. Heel eeq jaiq nail laiq. Maq ngel haq neq, heel bhai bhi meeq bhi haol lal-a nail uqhuq thaoq nail ilkhaol il ma eeq jaiq nail laiq.
18 Nuljuq niailhai gaoq ge nail: ‘Tsaol-aq teevq gaq ganav laol duq bhai juq khi, khanq haq neq, aivq-i mail khanq-ai thaq nail khe-ai maq nl khi ngaol-aoq, khul maq khi-ail. Thailhai ngaol-aoq, laol duq bhai laol bhiq-ai thaq nail phaq bhai juq khi khanq haq neq, aivq-i mail khanq-ai thaq nail khe-ai, ya nl nail ngaol’ dai, nuljuq ge nail ngaol.
19 Maivpeivq juq-ol. Khul phaq eeq jaiq nail-aiq. Laol bhiq-a nail phaq eeq jaiq nail laiq. Maq ngel haq neq, laol bhiq-ai thaq nail phaq bhai bhi meeq bhiq haol lal-a nail laol duq eeq jaiq nail laiq.
20 Alheel ngel-i mail, laol duq bhai juq khi khanq nail tsaol-aq, laol duq bhai iqsanl, laol duq kovtavq bhai khal laol-ai thaq nail iqsanl bhai gail juq khi khanq-a nail ngaol.
21 Uqhuq thaoq nail ilkhaol il ma bhai juq khi khanq nail tsaol-aq neq, uqhuq thaoq nail ilkhaol il ma bhai iqsanl al nail lavqkhoel bhai jaol nail Miqyail bhai iqsanl, juq khi khanq-a nail ngaol.
22 Nqtavq bhai juq khi khanq-a nail tsaol-aq Miqyail nail doiqbev bev ma bhai iqsanl, a bhai jaoldeel-nvq-ai thaq nail gaq bhai iqsanl, juq khi khanq-a nail phaq pevq nail ngaol.
23 Aoldaoq kovqdaoq cavq nail cov nail juq khi mail Phaqliqsail juq-ol, nuljuq geeqlaoq aqdoil ya nail ngaol. Khul khi mail dai ngal-aq neq, nuljuq goiqbhaoq al jaiq-ail bhaoq nail niil. Nuljuq laolhaol haoldao, gaollaol yasaol khi mail yasaol niil juq tsel bhoil teevq bhoil danq khi ngaol-aoq, aoldaoq kovqdaoq lavqkhoel khe eeq jaiq nail juq bhai, khaonq ha-ail ceevq-a nail ngaol. Eeq jaiq nail al juq neq, daolcoev dai nl nail phaq, gaoqhaq gaiq-a nail phaq khi mail, saljial ivq nail phaq niil juq ngaol. Nuljuq niil juq bhai nl heeq phaq-ail tsaq nail nee ovqtavq, yaoq phaq yaoq-ao bhai iqsanl khaonq ha nail maq tsaq-ail.
24 Gailkhaol cavq naq nail maivpeivq juq-ol. Nuljuq yaolthaol bhai jail ha khi ngaol-aoq, laolthao bhai moevq bhoel nail ngaol.
25 Aoldaoq kovqdaoq cavq nail cov nail juq khi mail Phaqliqsail juq-ol, nuljuq geeqlaoq aqdoil ya nail ngaol. Khul khi mail dai ngal-aq neq, nuljuq goiqbhaoq al jaiq-ail bhaoq nail niil. Nuljuq neq, maiqgaoq kovqlaol bhai lavqniil phao aqmeeq-ai tsiqhaol khi ngaol-aoq, lavqkhoel phao neq, maivjeel jeel nail phaq khi mail, yovqgavq nail neenoeq neekhaol oil movq nail phaq teevq bhee aol nail ngaol.
26 Maivpeivq peivq nail Phaqliqsail juq-ol, maiqgaoq khi mail kovqlaol lavqniil phao haol lal dai, lavqkhoel phao iqmoeq tsiqhaol yaoq.
27 Aoldaoq kovqdaoq cavq nail cov nail juq khi mail Phaqliqsail juq-ol, nuljuq geeqlaoq aqdoil ya nail ngaol. Khul khi mail dai ngal-aq neq, nuljuq goiqbhaoq al jaiq-ail bhaoq nail niil. Nuljuq neq, phulleq dai, leivq-ai thaq nail luqdaol khe-ai dul nail ngaol. Luqdaol neq, lavqniil phao heldaiq meeq khi ngaol-aoq, lavqkhoel phao neq, tsaol-aq nail haqeeq khi mail aqbuvq phaq teevq bhee aol nail ngaol.
28 Alhai dul dai, nuljuq iqsanl yu ya moel dai, yu nail sivtavq bhai tsaq nail daol nail tsaol-aq khe-ai dul khi ngaol-aoq, nuljuq nail neema lavqkhoel bhai neq, goiqbhaoq bhaoq nail phaq khi mail haqeiv nail phaq teevq bhee aol nail ngaol.
29 Aoldaoq kovqdaoq cavq nail cov nail juq khi mail Phaqliqsail juq-ol, nuljuq geeqlaoq aqdoil ya nail ngaol. Khul khi mail dai ngal-aq neq, nuljuq goiqbhaoq al jaiq-ail bhaoq nail niil. Nuljuq Miqyail nail haqbhoil gedan nail juq nail luqdaol bhai lav sav khi, tsaq nail daol nail tsaol-aq nail luqdaol kaovq-ai thaq nail bhai, heldaiq meeq lal dai lav sav-a nail ngaol.
30 Nuljuq ge nail: ‘Ngadao juq aqphiq aqbhal juq nail yeel bhai ya jaol-a kheel nul, aqyu juq nee mail Miqyail nail haqbhoil gedan nail juq bhai maq deeq heivq-ail’ dai, ge nail ngaol.
31 Nuljuq alhai ge nail neq, nvjuq neq, Miqyail nail haqbhoil gedan nail juq bhai deeq heivq-a nail juq nail aqjievq lilheel juq ngaol dai, salkhil khanq nail phaq pevq nail ngaol.
32 Nuljuq neq, nuljuq nail aqphiq aqbhal juq-i mail iqmoeq ilmoeq nl-a nail phaq bhai nl gil yaoq.
33 Haqeiv nail eellel khe-ai dul nail yaq juq-ol, yalkhaq dal-u n-gaol daqovq laoma nee, khalhai khi jel-ail heeq.
34 Heldaiq dei-eiq. Miqyail nail haqbhoil gedan nail juq, neenoeq neekha aol nail juq khi mail, aoldaoq kovqdaoq cavq nail cov nail juq bhai ngal nuljuq jaol nail bha bhi lee naol. Thailhai ngaol-aoq, nuljuq neq, teevq pav ganav juq bhai deeq heivq khi teevq pav ganav juq bhai lavqyavq kovtavq bhai tavq heivq nail ngaol. Teevq pav ganav juq bhai uqhuq thaoq nail ilkhaol juq nail lavqkhoel bhai deeq nail nee ovqtavq, teevq meenq nee teevq meenq nuljuq aqyu juq bhai the khi, aqyu juq bhai khoeq bhiq jiovq bhiq nail ngaol.
35 Alheel ngel-i mail, tsaq nail daol nail Aqbheiqlal nail aqsivq nee mail, uqhuq thaoq nail ilkhaol il ma bhai khi mail laol duq nail gaiqlaq bhai nuljuq-i mail deeq heivq-a nail Bhaqlaqgil nail yaqyov Saqkhaqlil nail aqsivq bhai kev dai, miltsaq kovtavq bhai khal kha ail-a nail Miqyail nail tsaol-aq nail aqsivq iqsanl mail nuljuq nail kovtavq bhai kev lee nail ngaol.
36 Ngal nuljuq bhai maldil dai, ge lavq bhel. Al juq nail do iqsanl mail niil yeel nail tsaol-aq nail kovtavq bhai kev lee nail ngaol” dai, ge bhiq-a nail ngaol.
Yeiqsul Yeiqlulsaqlaiq meenq nail haqbhoil noeqhaq deedee nail ganl
37 Yeiqsul gaoq ge nail: “Yeiqlulsaqlaiq meenq-ol. Yeiqlulsaqlaiq meenq-ol. Miqyail nail haqbhoil gedan nail juq bhai naol khaq mao iqsanl heivq khi, naol jaol nail bha khoel-ai leevq nail juq bhai, naol khaq mao iqsanl lovmav-i mail liv heivq nail ngaol. Yavciv yav ma aivq nail yav yaq bhai uvthaiq-ai thaq nail khe-ai, ngal naoq nail yaq bhai khadai pov uvthaiq movq khi ngaol-aoq, nuljuq maq bhi uvthaiq lavq-al.
38 Naldaiq yaoq. Miqyail nuljuq nail uqhuq thaoq nail ilkhaol il ma bhai khaonq ha nail ngaol dei-eiq.
39 Ngal nuljuq bhai ge lavq bhel. ‘Heeqphaq Miqyail nail aqmil kov-uvq nee lee-a nail gaq neq, geeqlaoq eeq dei-eiq’ dai, nuljuq maq ge-u kev dai, nuljuq ngaq bhai maq ya moel-ail” dai, ge bhiq-a nail ngaol.