97
Yi ketz Kataj i' yi kareyil
1 Chitzatzinku' yi e'u' yi najlche'u' bene'n tzi'n.
Chitzatzinku' alchok scyetz ama'lil kale ate'tu', na yi Kataj i' yi wi'tz rey.
2 Chin tz'o'tz nin tane'n xlajak i' tan sbak', nin yil tz'oc i' tan cawu'n chin tz'aknak cu'n sbne'.
3 Sbajxok jun chin k'ak' swutz i', nin ẍchitz'e'ok cyakil yi tetz contr ta'n.
4 Yi tetz xlak'cya'j bajk xtxekul bene'n tzi'n wi munt, nin cyakil wunak ẍchixobok yil quil.
5 Cyakil yi e'chk wutz tz'elepon a' chi na ban xcab yil tz'ul tzaj yi mero taw, Kataj Jehová.
6 Yi tcya'j na ẍchaj yi balajil i'.
Nin tz'elepon chitxum cyakil wunak yi at k'ej i'.
7 Ẍchitx'ixwok cyakil wunak yil quil nin wutz yi Wi'tz Ryos, na yi e' cyetz, ntin na cyak' k'ej e'chk ryos yi banij cuntu' tane'n.
Poro ẍchimejek cyakil chiryosila'tz swutz yi ketz kaRyosil.
8 Ilu' Kataj Jehová, na chitzatzin yi e' aj Sión yi na quibit yi ca'wlu'.
Ncha'tz yi e'chk mas tnum yi at tcwent Judá, na chitzatzin te e'chk ca'wla'tz.
9 Na yi ilu' teru' Ta', na cawunu' tibaj cyakil e'chk ama'l bene'n tzi'n.
Ej nin at mas k'eju' Ta' ẍchiwutz cyakil e'chk ryos yi ate' wuxtx'otx'.
10 Nin na pek'u' scye'j yi e' yi qui na chipek' te yi e'chk takle'n cachi'.
Nin na ocu' tan chicolche'n yi e' yi cho'n k'uklij chic'u'l te'ju'.
Nin na xcye'u' tan cyelse'n liwr yi e' yi ate' ẍchik'ab yi e' mal wunak.
11 Chin sk'il nin sbne' scyetz yi e' balaj, nin ẍchitzatzink yi e' yi jicyuch te cyajtza'kl.
12 Chitzatzink binu' tk'ab Kataj yi e'u' balaj.
Cuk chitzi'u' tan na'wse'n yi tetz bi' yi wi'nin xanil.