98
Ja wi't xcye' Kataj te yi tetz contr
1 Chibitziju' jun ac'aj bitz tetz Kataj, na ja bnix yi e'chk takle'n balaj ta'n.
Nin ja xcye' i' te yi e' tetz contr tan yi tetz ẍchamil yi wi'nin xanil.
2 I' te'n i' na tzan tan talche'n:
“Ja chinxcye' scye'j incontr.”
Nin ja lajluchax yi tetz tajtza'kl yi tz'aknak cu'n ẍchiwutz cyakil jilwutz wunak.
3 Tan yi banl talma' ja el cu'n i' te yi yol yi suknak sketz yi o' xonl Israel.
Nin cyakil wunak yi ate' bene'n tzi'n wi munt, ja quil yi at ẍchamil i'.
4 Chibitzinku' yi e'u' yi najlche'u' bene'n tzi'n wi munt.
Tzatzin cu'n chibitzinku'.
Chibitzinku' tetz cu'n cyalma'u'.
Quil chimaku' yi tzatzin yi na jal te cyalma'u'.
5 Ba'n chibitziju' e'chk balaj bitz tetz Kataj.
Ba'n xcon e'chk kbetz cyanu', chi tane'n arpa yi ba'n xcon yi wutz tan telse'n e'chk balaj bitz.
6 Cyak'e'u' chik'ajsbilu' tetz Kataj, na i' yi ketz kareyil.
Ba'n xcon yi ma'cl cyanu' chi tane'n su' nka chun tan tak'le'n chik'ajsbilu' tetz.
7 Ba'n chiẍch'in cyakil yi e'chk jilwutz txuc yi ate' xe mar, ncha'tz cyakil yi ate' wuxtx'otx', tan yi tzatzin yi ate' cu'nt.
8 Nin cyakil yi e'chk tzanla' ba'n wajcan, nin cyakil yi e'chk ju'wtz ba'n chiẍch'in tan bi'l yi tzatzin yi ate' cu'nt yil tz'ul tzaj Kataj.
9 Na tz'ocopon Ryos tan cawu'n tzone'j wuxtx'otx'.
Scawunk squibaj cyakil jilwutz tnum, nin nicy' nintu' ltulej cawbe'n cyetz.