10
Toponãmasã poko Jeahmary sã pyra
1 Izyraeu tomo, etatoko ke Ritonõpo Oesẽkõ nekarohpyry oya xine!
2 Ynara ãko mana:
“Imehnõ ahno nyrityã onypoenohpyra ehtoko.
Oserehnõko mã toto kapu poko exiketõ tyoro sã eneryke tyya xine.
Yrome amarokõ oserehpyra ehtoko.
3 Mokaro enetuputyry typahsẽme sã mana ipunaka.
Wewe akohnõko mã toto itu htao;
mame ipoko erohkety moro wewe axikãko tytapema ke kehko,
tyneponãmary rĩko mana.
4 Mame emeporyme parata rĩko uuru maro,
perẽku ke tũpore tyrĩko mã toto apõ po epukara ehtohme, ehmopyra roropa ehtohme.
5 Mokaro toponãmasã oturusaromepyra mã toto:
torõ tõ erehtoh sã mã toto tupito rãnao tarykase ahtao otyro ke.
Tarorykõ se rokẽ mã toto, ytoytosaromepyra toexirykõke.
Mokaro zuno pyra ehtoko:
imehnõ onyryhmasaromepyra mã toto,
imehnõ kure onyrisaromepyra roropa mã toto.”
6 Ritonõpo, yna Esemy, imepỹ asã exikety pyra mana.
Imehxo mase, jamihme mase,
oesety jamihme mana.
7 Onoky ouno pyra hnae, emero nono põkõ Esẽme mase?
Kure kuhse mase yna a, imehxo oexiryke.
Imepỹ pyra mana asã exikety, tuaro exiketõ rãnao, ahno tuisary tõ rãnao.
8 Mokaro emero zuaro pyra mã toto,
putupyra exiketõ sã mã toto.
Toto anamorepara ineponãmarykõ wewe risẽ mana?
9 Mokaro neponãmary tyõtose parata ke Expania poe, uuru ke roropa Upaze poe; ahno nyrityã emero.
Tupohtose mã kehko upo ke kamisa kurã risẽ ke,
kamiraramã ke roropa tyrise emese kure exiketomo a.
10 Yrome omoro mase Ritonõpo nymyry;
Ritonõpo isene exikety, Tuisame jũme exikehpyra exiketyme.
Zehno awahtao sero nono tykytyky ãko mana;
ahno tõ zehno awahtao enahnõko mã toto.
11 Amarokomo, mokaro zurutoko, ynara kahtoko eya xine: “Mokaro toponãmasã sero nono onyripyra exiketomo, kapu onyripyra exiketomo, tonahkasẽme exĩko. Osenepyra exĩko mã kehko ipunaka sero nono po.”
Eremiatoh kure Ritonõpo riry poko
12 Tyjamitunuru ke sero nono tyrise Ritonõpo Kuesẽkomo a;
tuaro toehtoh ke sero nono tyrise eya.
Kapu roropa epozakoxi tyrise eya tõsenetupuhtopõpyry ae ro.
13 Tyripose ahtao eya tuna tõ aryryãko kapu ao:
akurũ tõ onuhmanohpõko mana nono etyhpyry poe.
Neneneh kamexipõko mana konopo maro,
tyryrykane tũtanohpõko mana esary poe.
14 Morohne eneryke ahno a, tuaro pyrahme sã osekarõko mã toto, putupyra sã ipunaka.
Tyneponãmary rinanõ ehxirõko mã toto tynyrityã ajohpe rokẽ exiryke, isene pyra exiketyme exiryke.
15 Typahsẽme rokẽ mã kehko,
toiparo rokẽ tyrise mã kehko.
Tonahkasẽme exĩko mã kehko
tooehse Kuesẽkõ ahtao toto wãnohtohme.
16 Yrome Jako Esẽ mokaro sã pyra mana;
emero Rihpõme mã ynororo,
Izyraeu tõ tymenekase eya typoetoryme toto ehtohme.
Esety mã Ritonõpo, Jamihmehxo Exikety.
Ahno taroposẽme exĩko tynonorykõ poe
17 Jerusarẽ põkomo, apatary tapuruse oepetõkara a! Õkyryrykõ akimatoko,
18 seromaroro oematorỹko Ritonõpo exiryke mya, ononorykõ poe; ãkuhmotorỹko mana tuaro oehtohkõme. Ywy Ritonõpo oturũko ase.
19 Jerusarẽ põkõ tykohtase:
“Tapurose sytatose, myhene!
Kuapurotopõpyry tõ ekurãkara mana!
‘Seanahtoatose,’ tykase kymarokõ repe.
20 Yrome kytapyĩkõ tonahkase mã kehko,
eary tõ imyhtoh tonõ tamohse kehko.
Kypoenõkõ toytose toto kywinoino xine.
Tonahse toto ipunaka,
tapyi rine pyra toehse kuakorehmatohkõme tapyi ritohme ropa,
apuru tõ kamisa risẽ anỹnanõ pyra toehse sytatose kymaro xine aehtohme rahkene.”
21 Ynara tykase ywy:
“Kutuisarykõ tuaro pyra mã toto;
onekaropopyra mã toto Ritonõpo Kuesẽkomo a takorehmapotohkõme.
Morara exiryke torẽse mã toto,
kuekyrykõ sapararahme toehse roropa mã toto.
22 Etatoko pahne! Omi toehse!
Ahno inikahpoe panaikato ke oximõnõko mã toto.
Isoutatu tõ oehnõko Juta patary tõ ritohme patãpome, onokyro tõ esaryme.”
Jeremia otururu Ritonõpo a tyekyry tõ poko
23 Ritonõpo yna Esemy, zuaro ase,
ahnome rokẽ yna exiryke imeĩpo yna ehtoh waro pyra ynanase;
imeĩpo ehtoh onytyoromasaromepyra ynanase.
24 Ritonõpo, yna ikurãkako zae yna ehtohme,
yrome onymotyẽkara exiko.
Yna onuwãnohpyra exiko zehno awahtao, yna enahkaryino.
25 Imehnõ nonory põkõ zuãnohko yronymyryme,
oeahmara exiketomo,
tosẽkõme oenetuputyry se pyra exiketomo.
Yna, opoetory tõ totapase eya xine, Jako pakomotyamo.
Yna nonory patãpome tyrise roropa eya xine, enara.