9
1 Jupuhpyry tuna pẽkamãme ehtoh sã se ase repe,
jenuru soesoekaneme sã se ase roropa repe yxity ke, ywy yxitatohme saereme, koko roropa wekyry tõ hnamoryme, totapase aexityamo.
2 Osa se ase jesaryme ahno esao pyra, ameke jehtohme wekyry tõ winoino.
Imeimehnõ nohpo tõ poko mã toto,
imehnõ ewokananõme oxikone mã toto.
3 Tahxime ajohpe oturũko mã toto imehnomo a.
Ajohpe rokẽ mã toto sero nono po,
zae ehtoh poko pyra mã toto.
Ynara ãko Kuesẽkõ mana:
“Ypoetory tõ popyra ehtoh poko exikehpyra mã toto,
Ritonõpome jenetupuhpyra mã toto.”
4 Tomeseke se mã toto topekõ maro,
osenekunohpopyra toehtohkõme emero porehme.
Takorõ tõ zae onekaropyra mã toto,
zae pyra toto exiryke emero, Jako samo.
Tope tõ kerekeremãko mã toto ajohpe ehtoh ke.
5 Tope tõ enekunohnõko roropa mã toto emero porehme,
zae ehtoh onekaropyra mã toto.
Tunurukõ amorepãko mã toto ajohpe ehtohme;
tyyrypyrykõ poko mã toto,
iirypyryme toehtohkõ onurumekara mã toto.
6 Imehnõ ryhmãko mã toto,
mame iiryhmazomõko ropa mã toto, enekunohnõko,
mame enekunohnõko ropa mã toto.
“Yse pyra ypoetory tõ mã toto Tosẽkõme,” ãko Ritonõpo mana.
7 Morara exiryke Ritonõpo Jamihmehxo Exikety ynara ãko mana:
“Ypoetory tõ kurãkãko ase parata kurãkary sã apoto ao.
Toto kuhnõko ase kure toto ehtoh enepotohme.
Popyra ehtoh poko toehse ypoetory tõ mana,
oty ropa tyrĩko ha toto a?
8 Inuru pyrou sã mana, topinohse orihmato ke,
ajohpe oturũko mã toto.
Typãnary maro kure sã oturũko mã toto, ipyrypãko,
yrome ahno apoitoh rĩko mã toto typãnary apoitohme tyya.
9 Naeroro mokaro wãnohnõko ase toto nyrityã emetakame.
Moro sã jahtao zae pyra hano oya?
Zae pyra hano mokaro wãnopyryhtao ya?
Ywy Ritonõpo, oturuno.”
10 Ywy Jeremia, ynara ase:
“Xitãko ase ypy tõ pokoino, onahpoty pokoino roropa,
toorihse exiryke,
ytoketõ moro ae ytopyra mã toto.
Pui tõ omiry osetara mana moroto;
torõ tõ roropa, onokyro tõ toepase, mya toytose mã toto.”
11 Ynara tykase Ritonõpo:
“Pata Jerusarẽ rĩko ase ypyme topu tõ osepona, kaikuxi panõ esaryme.
Juta patary tõ rĩko ase patãpo tõme, tytaõke pyra exĩko mana.”
12 Oturupoase:
— Ritonõpo Jesemy, oty katohme yna nonory tonahkase nah? Oty katohme tonore toehse, ona tonorẽ samo, tonore exiryke moro ae ytoketõ ytopyra mã toto? Onoky tuarohxo exikety moro enetupuhnõko nae? Onoky tamorepase oya morohne poko, imehnõ amorepatohme eya?
13 Mame ynara tykase Ritonõpo:
— Serara toehse ynamorepatopõpyryme ypoetory tomo a turumekase exiryke eya xine. Jomihpyry omipona pyra toehse toto. Ynyripohpyry onyripyra toh nexiase.
14 Yrome putupyra sã toehse toh nexiase. Ritõ panõ Paau tõkehko toahmase eya xine, tumykõ namorepatopõpyry ae.
15 Seromaroro etatoko pahne, ywy, Ritonõpo Jamihmehxo Exikety, Izyraeu tõ Esẽ ynara tyrĩko ase: Otyro itunety ekarõko ase ypoetory tomo a inapyrykõme, tuna roropa topinohse orihmato ke ekarõko ase eya xine aukurukõme.
16 Sapararahme ypoetory tõ aropõko ase imeimehnõ nonory pona. Mokaro ehtoh waro pyra toh nexiase. Itamuru tõ mokaro ehtoh poko zuaro pyra roropa toh nexiase. Imehnõ soutatu tõ enehpõko ase etonatohme ypoetory tõ maro toto enahkatoh pona ipunaka.
Takorehmarykõ se Jerusarẽ põkomo
17 Ritonõpo Jamihmehxo Exikety ynara tykase:
“Etatoko pahne!
Aorihtyã hnamonanõ enehpotoko, nohpo tomo, ekepyry zonẽtoh eremiary waro exiketomo.”
18 Ahno ynara ãko:
“Axĩ ke eremiaketõ enehpotoko, eremiatohme emynyhmatoh poko ynanetaryme,
yna enuru pehkatohme yna xity ke, tuna tũtatohme yna enuru ae, yna xitaryme!”
19 Etatoko Xião põkõ xitary, ynara ãko mã toto:
“Tonahkase sytatose! Typoremãkase sytatose!
Kytapyĩkõ tykararahse kehko,
tomase roropa kehko nono pona.
Kynonorykõ turumekapose kyya xine.”
20 Ynara tykase ywy:
“Nohpo tomo, otato ehtoko Ritonõpo Oesẽkõ omiry oya xine,
Aomiry omipona ehtoko.
Oẽxirykõ amorepatoko tyxitary waro toto ehtohme;
oepe tõ amorepatoko toremiarykõ waro emynyhmatoh poko.
21 Omato sã kuorikyrykõ tomõse osenuhmatoh ae kytapyĩkõ taka,
kutuisarykõ tapyĩ konõto taka tomõse;
poetohti tonahkase osema tõ ae, nuasemãkõ roropa osepekahtoh tao.
22 Aorihtyã ekepyry epukãko,
onokaro ety sã sapararahme typahse ona po,
tykyrysã tysahkase ahtao samo
mame aepukaryke tynomose apoinanomo a,
tonahsemy sã tynomose rokene.
Moro Ritonõpo nekarohpyry ya ourutohkõme.”
23 Ynara ãko Ritonõpo mana:
— Tuaro exiketomo, epyrypara ehtoko tuaro oehtohkõ poko, jamihme exiketomo, epyrypara ehtoko ajamitunurukõ poko, tymõkomoke exiketomo, epyrypara ehtoko tytineruke oehtohkõ poko.
24 Epyrypary se awahtao epyrypako juaro oehtoh poko, jomiry enetuputyry poko roropa oya. Ywy, Ritonõpo Oesẽkõme ase, opyno xine exikehpyra ase, zae ehtoh rĩko ase zae jexiryke sero nono po. Morohne yzamaro mana. Ywy, Ritonõpo oturũko ase:
25-26 — Okynã pyra ahno wãnohnõko ase: Ejitu põkomo te, Juta põkomo te, Etõ põkomo te, Amõ põkomo te, Moape põkomo emero ona põkõ maro; torẽnase toto tũsety sahkary poko mytyhse samo. Mokaro emero aĩkõpotapihpyry tysahkase repe, yrome jomiry omipona pyra mã toto. Ypoetoryme toto ehtoh enetupuhtoh moro, aĩkõpotapihpyry sahkary repe. Yrome mokaro emero Izyraeu tõ roropa ynyripohpyry eya xine turumekase eya xine, ypoetoryme nymyry sã pyra toehse toto.