4
Eramatoh ropa Ritonõpo a
1 Ynara ãko Ritonõpo mana:
— Izyraeu tomo, ooepyrykõ se ropa awahtao xine osehtoko ropa ya. Imehnõ neponãmarykõ se pyra ase ipunaka; toto enahkapotoko, jurumekara ropa ehtoko.
2 Mame ajohpe pyra õmirykõ etaporyhtao oya xine, zae rokẽ awahtao xine: “Ritonõpo netaryme te, Ritonõpo neneryme,” ãko matose. Mame imehnõ nonory põkõ emero kure toto ripõko mã toto ya, jeahmãko roropa mã toto.
3 Ynara ãko Ritonõpo mana Juta tõ orutua komo a, Jerusarẽ põkomo a roropa:
— Nono ahkatoko anarykara ro exikety, arykatohme. Otyro puhturu anarykara ehtoko ãtaryka htaka.
4 Juta tomo, Jerusarẽ põkõ roropa, õmihpyrykõ onetapohpyrykõ ya omipona ehtoko. Osekarotoko ya Oesẽkomo a; moro onyripyra awahtao xine ozehno xine jehtoh apoto sã zukãko mana popyra ehtoh poko oehtopõpyrykõke. Zahnõko mana apoto samo, mame onezehkasaromepyra exĩko imehnõ mana.
Juta tõ zehnotokõ oehnõko
5 Rue etotoko Juta nonory po emero!
Okohtatoko opore tuaro toto ehtohme!
Ynara kahtoko Juta tomo a Jerusarẽ põkomo a roropa:
ytotoko tururume pata tõ pona, towomase exiketomo a apuru tõ ke.
6 Osema enepotoko Xião pona ytotopo!
Osewomatoh taka epatoko! Oneraximara ehtoko!
Inikahpoe, popyra ehtoh enehpõko Ritonõpo mana,
itamurume tonahkasẽme exĩko.
7 Reão tũtary sã tõtonẽtoh tae, imehnõ nonory põkõ enahkane oehnõko Juta tõ enahkase.
Juta patary tõ tonahkasẽme exĩko,
patãpome exĩko mana.
8 Naeroro upo amurutoko kamisa topuxiximã risẽ ke tãkye pyra oehtohkõ enetupuhpotohme.
Oxitatoko, ihnamotoko awãnohtohkõ poko, kyzehno xine Ritonõpo ehtoh exikehpyra exiryke taro Juta nonory po.
9 Ynara ãko Ritonõpo mana:
— Moro ẽmepyry toehse ahtao tuisa tõ oserehnõko mã toto, kowenu poko erohketõ maro, Ritonõpo maro oturuketõ tykytyky ãko mã toto, urutõ kõ osenuruhkãko mã toto.
10 Mame ynara tykase ywy:
— Ritonõpo, Jesemy, Jerusarẽ põkõ tonekunohse oya ipunaka! “Towomasẽme exĩko matose, ozehnotokõ pyra exĩko,” mase repe, yrome tapema toehse mana toto esenarykõ pokona.
11 Ẽmepyry oehnõko mana ynara katohme Jerusarẽ põkomo a: “Tyryrykane axitunety oehnõko ona tonorẽ poe xiaro Ritonõpo poetory tõ pona. Tyryrykane pohto rokẽ pyra exĩko mana tiriiku pihpyry apiakatoh rokẽ pyra ipuhturu oxinamatohme.
12 Moro tyryrykane, Ritonõpo nenehpohpyry jamihme exĩko mana. Seromaroro Ritonõpo mã typoetory tõ apiakãko mana, toto wãnohtohme.”
Juta tõ tapuruse topetõkara a
13 Enetoko ke! Kuepetõkara oehnõko mã toto akurũ samo. Toto kahu tõ osetapaketõ wiriwirikane jamihme exikety sã mã kehko, eky tõ kawaru axĩ sã ytõko, piano axĩ ytory motye. Typoremãse sytatose myhene! Tonahkase sytatose!
14 Jerusarẽ põkomo, popyra oehtohkõ ikurikatoko okurohtao xine, typynanohsẽme oehtohkõme. Okynahxo matose oorypyrykõ poko osenetupuhnõko matose. Epo hnae moro poko oehtohkomo.
15 Omi enehnanõ pata Tã poe, ypy tõ Eparaĩ poe roropa popyra ehtoh oepyry poko kuurutorỹko mã toto, kuepetõkara oepyry poko.
16 Imeimehnõ nonory põkõ enaroximapoko, ãko mã toto, Jerusarẽ põkõ zurutoko roropa: kuepetõkara moino oehnõko mã toto, opore kui ãko mã toto Juta patary tõ netaryme, toto maro etonatohme.
17 Pata Jerusarẽ apurũko mã toto tupito apururu sã erase tomo a tarykase ahtao, Ritonõpo Kuesẽkõ turumekase exiryke kynonorykõ põkomo a.
18 Juta tomo, onyrityã emetakame sero popyra ehtoh oehnõko mana, popyra ehtoh poko toehse oexirykõke. Oorypyrykõ pokoino atasamãko matose, sam ãko roropa matose. Ywy, Ritonõpo oturũko ase.
Jeremia emynyhmatoh tyekyry tõ poko
19 Sam ãko ase!
Emynyhmãko ase ipunaka ukurohtao!
Ukurohtao jeano tahtah ãko jamihme sã mana!
Mynyhme ehsaromepyra ase.
Rue totase ya exiryke, kui kui katoh tonõ roropa etonatoh poko.
20 Popyra ehtoh oehnõko kypona xine atakenaka samo.
Sero kynonorykõ tytororo tonahkase.
Axĩ kytapyĩkõ pahnõko mã toto, ikamisã risẽ toexihkase pisarara mã kehko.
21 Otara ahtao kuepetõkara kamisã pãteira tõ enekehnõko ha?
Otara ahtao rue etory etakehnõko roropa ha osetapary poko?
Epo hnae moro enery, moro etary roropa ya, enara!
22 Ynara ãko Ritonõpo mana:
“Ypoetory tõ tuaro pyra mã toto,
juaro pyra roropa mã toto.
Poeto pitiko sã mã toto, putupyra rokene,
onenetupuhpyra mã toto.
Popyra ehtoh poko tuarohxo mã toto.
Yrome zae ehtoh poko zuaro pyra mã toto ipunaka.”
Enahkatopo imeĩpo
23 Mame osenuhmase.
Sero nono patãpome nexiase tytaõke pyra,
Kapu ao ezuru pyra nexiase.
24 Osenuhmase ypy tõ pokoxi, tykytyky ãko toh nexiase;
Emorymãkomo roropa kywyh ãko nexiase xia, mya ropa.
25 Osenuhmase ro, ahno onenepyra exiase ipunaka.
Torõ tõ roropa kapu ae ytoketõ toepase toto.
26 Osenuhmase ro moro nono kurã tykyrysã zamaro aexihpyry patãpome nexiase.
Pata tõ roropa typahse Ritonõpo a,
tonahkase toto eya, toto zehno toexiryke.
27 Ynara tykase Ritonõpo: moro nono emero patãpome exĩko mana, yrome emero porehme onenahkapopyra ase.
28 Moro nono xitãko mana,
kapu kohmãnõko mana xinukutume,
Ritonõpo tõturuse exiryke, onytyoromara mana.
Tynyriry waro toehse ynororo, ekurehpyra mana.
29 Panaikato etaryhtao, kawaru po ytoketomo, pyrou ekomananõ roropa, tũtãko mã toto emero, tururume.
Toitoine itu htaka ytõko,
imehnõ topu tõ pona onuhnõko mã toto.
Pata tõ emero tytaõke pyra exĩko,
patãpome exĩko mã kehko.
30 Pata Jerusarẽ, tuãnohsẽme exĩko mase!
Oty katoh upo kamiraramã amurũko mah?
Oty katoh õkyry tõ amurũko,
oenuru tõ zonohnõko roropa hma?
Toiparo rokẽ enekure oriry se mase!
Opoko typenetase aexityã orumekase ropa,
seromaroro oetapary se mã toto.
31 Kui kary etase, nohpo kui kary sã aenururuhtao, nohpo kui kary samo apitorymã enurumaryhtao eya.
Jerusarẽ põkõ nohpo sã mã toto,
kui ãko, apotũkehnõko,
tomary anỹnõko toetuarimaryme ynara ãko:
“Tonahkasẽme exĩko ase!
Oehnõko mã toto jetapase, myhene!”