104
Eremiatoh Ritonõpo eahmaryme
1 Ritonõpo Jesemy, imehxo mase! Enekure mase
tuisamehxo, saerehkatoh amuruhpõme mase;
2 upo amurũko mase, saerehkatoh ke.
Kapu tytywyhmase oya
kamisa tywyhmary samo tapyime,
3 atapyĩ tyrise oya tuna epoe, kae kapu ao.
Akurũ tõ rĩko mase akahõme, etonatoh kyryryme;
tyryrykane aporiry tõ po ytõko mase.
4 Tyryrykane tõ rĩko mase onenyohtyãme,
nenenehkane tõ õmipona exiketõme tyrĩko mase.
5 Sero nono tyrise oya apõ tõ po, tũpore samo,
tosary winoino jũme esyryhmara exĩko mana.
6 Sero nono tyõtose oya tuna konõto ke,
zuemũ ke zupõme samo,
moro tuna tõ zueme toehse, ypy tõ emory epoe.
7 Yrome tuna tõ tupokase ahtao oya,
toepase toh nexiase; õmiry etaryke tyya xine,
tykohtase ahtao oya, tururume toytose toto.
8 Tuna toytose tururume ypy tõ epozakuroko,
mame tyhtose jakanahmã pona tosaka xine,
onyrihpyry tõ aka, toto esaryme.
9 Tuna ehpio tyrise oya moro ehpio
onymotyẽkara tuna ehtohme,
oehpyra ropa mã kehko sero nono poro,
nono nerypyra ropa ehtohme.
10 Tuna enatyry rĩko mase jakanahmã tõ ao,
iporiry tõ roropa ypy tõ rãnakuroko.
11 Otunary poko tuna ẽnõko onokyro tõ mana;
otunary jumẽtu tõ zamaro mana
tutunazehnase toto ahtao.
12 Tuna ehpio torõ tõ tymỹkõ rĩko mã toto,
eremiãko mã toto wewe amoriry tõ poe.
13 Kapu poe konopo enehpõko mase ypy tõ pona,
onyrityã kurã nono zamaro mana.
14 Onahpoty ahtanohpõko mase pui tõ napyryme,
tykyrysã roropa, tiriiku tõkehko ahtanohpõko mase
ahno napyryme, morohne arykatohme
kyya xine tonahsãme.
15 Nono poe uwa eukuru ripõko mase ahno a sekese toto ehtohme; azeite roropa tãkye toto ehtohme, wyi roropa jamihme toto ehtohme.
16 Konopo itamurume oehnõko wewe tõ pona,
Ritonõpo Kuesẽkõ kyryry apupari tõ pona,
inarykatyã pona ypy tõ Ripano po.
17 Moroto torõ tõ tymỹkõ rĩko mã toto,
sekonia tõ tymỹkõ rĩko mã toto wewe pinieiro tõ po.
18 Poti tõ itu htaõ tosarykõ menekãko mã toto
kae ypy tõ po,
onokyro tõ otonẽnõko mã toto topuimo tõ rãnao.
19 Nuno tyrise oya nuno tõ kuhtohme;
xixi tuaro mana tyomõtoh toehse ahtao.
20 Koko tyrise oya, imeimehnõ onokyro tõ
tũtãko mã toto tykohmãse ahtao.
21 Reão tõ wãtara ro exiketõ panaikato kuime
urakanãko mã toto,
Ritonõpo nekarory zupiryhtao tyya xine tohkõme.
22 Yrome xixi tũtaryhtao ytõko ropa mã toto
kohrame ehtohme tosaka xine.
23 Mame ahno ytõko mã toto erohse,
toerokurukõ poko kohmãnõko mã toto.
24 Ritonõpo, onyrityã tuhke rokẽ rahkene,
tuaro oehtoh ke morohne tyrise oya.
Sero nono pehme mana onyrityã ke.
25 Moroto mã tuna konõto, zumohxo mana tukuaõke,
onokyro inunomo, pisarara exiketõ roropa,
tuhke mã toto, ekuhpỹme.
26 Tuna konõto poro wapu tõ ytõko,
zue ao Rewiatã osemeikãko mana,
onokyroimo nakuaono onyrihpyryme toexiryke.
27 Mokaro emero oeraximãko mã toto,
tonahsẽ eraximãko onekarory eya xine
inapyrykõme omise toehse toto ahtao.
28 Toto napyry ekarõko mase, otuhnõko mã toto,
tuesapare exĩko.
29 Toto winoino oeramaryhtao oserehnõko mã toto;
toto oserematoh tupuxihkase ropa oya ahtao
orihnõko mã toto,
nonome exĩko ropa nono risẽme toexirykõke.
30 Yrome, oserematoh ekaroryhtao oya
enurũko mã toto; moro saaro
isene exiketõ ekarõko mase sero nono põkomo a.
31 Ah Ritonõpo Kuesẽkõ saeremehxo ehtoh jũme
exikehpyra nexino! Ah tãkye nexino tynyrityã poko!
32 Sero nono eneryhtao Ritonõpo a tykytyky ãko mana; ypy tõ aporyhtao eya orexĩto tũtãko mana.
33 Eremiãko ase Ritonõpo eahmaryme isene ro jahtao; eremiãko ase Ritonõpo netaryme jorihtoh ponãmero.
34 Ritonõpo zamaro se ase jeremiatoh tonõ ke, ipoe tãkye jexiryke.
35 Ah enahketyme nexĩ toto mokaro Ritonõpo enetuputyry se pyra exiketomo, ah popyra exiketõ tonahkasẽme nexĩ toto!
Yjamitunuru ke porehme oeahmary se ase,
Ritonõpo Jesemy! Kure mase, Ritonõpo!