105
Ritonõpo, typoetory tõ maro
(1 Koronika 16.8-22)
1 “Kure mase,” kahtoko Ritonõpo Kuesẽkomo a,
imehxo aehtoh ekãtotoko; imehnõ nonory põkõ zurutoko inyrityã poko.
2 Oeremiatoko Ritonõpo eahmaryme,
inyrityã kurã osenuruhkatoh ekarotoko.
3 Tãkye ehtoko ipoetoryme kuexirykõ poko.
Kuesẽkõ poko oseahmaketõ emero, atãkyematoko.
4 Ritonõpo zupitoko, ãkorehmatohkõme;
oneahmakehpyra ehtoko kokoro rokene.
5-6 Amarokõ, Ritonõpo poetory Aparão
pakomotyãme matose, inymenekahpyry Izyraeu pakõme matose, wenikehpyra ehtoko Ritonõpo nyrityã poko tyjamitunuru ke, kuepekõkara wãnohtopõpyry poko eya.
7 Ritonõpo Kuesẽkõme mana;
inyripohpyry sero nono põkõ akorehmatohme mana emero porehme.
8 Jũme wenikehpyra ynororo tõmiry etapotopõpyry poko, miu motye zumakahpõkõ pona, jũme tõmihpyry omipona anamonohpyra mana.
9 Tõmiry totapose Aparão a, anamonohpyra mana: “Morara tyrĩko ase,” katopõpyry Izake a roropa.
10 Tõmihpyry totapose Jako a, jũme enahpyra ehtohme.
11 Morara ahtao ynara tykase Ritonõpo eya:
“Kanaã nonory ekarõko ase oya, mame jũme ononoryme exĩko mana, oesarykõme.”
12 Tuhke pyra toh kynexine, katonõme sã rokẽ Kanaã nonory po.
13 Imeimehnõ nonory poro toytose toto, tuisa esary poe, imepỹ tuisa esary pona.
14 Yrome mokaro onyryhmapopyra Ritonõpo kynexine imehnomo a, mame toto ewomatohme ynara tykase ynororo tuisa tomo a:
15 “Ypoetoryme ynymenekatyã onerekohmara ehtoko; ypoe urutõ kõ onyryhmara ehtoko.”
16 Ritonõpo poe tomitapãse toto inonorykõ po
toto napyry tonahkapose eya.
17 Yrome orutua tonyohse osemazuhme esety Joze, ekarohpyry imepỹ namotome.
18 Ipupuru tõ keti ke tymyhse kynexine,
ipymyry pokona esenao kurimene risẽ tyrise.
19 Ãpuruhpyry tao Joze kynexine morohne
katopõpyry eya ehtoh pona.
Ritonõpo omiry tonetupuhpose zae
Joze ehtopõpyry poko.
20 Naeroro Ejitu tuisary a tutũtanohpose ropa ynororo; imoihmãkõ tuisary a touse ropa ynororo ãpuruhpyry tae.
21 Tuisamehxo tyrise ynororo eya,
tynonory põkõ esẽme, typatary tõ esẽme emero.
22 Tuisamehxo toehse Joze imehnõ tuisa akorehmananõ rohmanohpotohme, tuisa amorepananõ roropa amorepatohme.
23 Moromeĩpo Jako toytose Ejitu pona moroto ehse.
24 Tuhke ipoenõ tokarose Ritonõpo a typoetory tomo a, topetõkara motye tyjamihtanohse roropa toh eya.
25 Typoetory tõ zehno Ejitu põkõ tyrise eya,
ipoe Izyraeu tõ tonekunohse Ejitu põkomo a.
26 Mame typoetory Moeze tonyohse eya Arão maro,
tynymenekahpyryme.
27 Ritonõpo jamitunuru tonepose eya xine Ejitu po,
inyripohpyry kurã tyrise eya xine
aosenuruhkatohkõme.
28 Tykohmãkapose Ritonõpo a Ejitu po,
yrome aomihpyry omipona pyra Ejitu põkõ kynexine.
29 Munume Ejitu tunary tõ tyripose eya,
kana tõ itunary kuao taorihmapose eya emero.
30 Pororu tyripose eya Ejitu põkõ tapyĩ takuroko,
tuisa tapyĩ typehkase pororu ke.
31 Moromoro tõ tyripose Ritonõpo a, mapiri panõ kõ maro, moro nono poro porehme.
32 Konopoimo tonehpose eya topu sã tũpore,
nenenehkane maro nono pona, konopo myakãme.
33 Ĩkyryrykõ tonahkase eya tupito po toto narykahpyry uwa tomo te, fiku tõ maro, wewe tõkehko typahpose eya.
34 Taparara tõ tonehpose roropa Ritonõpo a, mame taparara tõ tooehse, tuhke miujão motye, ikuhpỹme.
35 Emero arykatyã tonahse eya xine, toto tupi po ĩkyryrykõ tonahkase eya xine.
36 Ejitu põkõ poenõ taorihmapose eya,
imũkurukõ osemazuhme aenurutyamo,
ipynohxo aexityã jekyry tomo a itapyĩ taõkomo a.
37 Mame Izyraeu tõ touse eya Ejitu poe; aytorykohtao parata te, uuru roropa tarose tymaro xine. Kure rokẽ toh kynexine jamihme roropa.
38 Tãkye toehse Ejitu põkõ kynexine Izyraeu tõ toytose ahtao, toto zuno toehse toexirykõke.
39 Akurũ tyrise Ritonõpo a typoetory tõ epozakoxi,
apoto panõ tyrise eya koko, toto ezurume.
40 Tokaropose eya xine, mame aramixi panõ tonehpose
Ritonõpo a, kapu poe wyi panõ tokarose eya xine,
emitapãpyra toto ehtohme.
41 Topu tapiakase eya, mame tuna tutũtase serereme, iporiryme ona poro.
42 Wenikehpyra kynexine tõmihpyry kurã poko
typoetory Aparão a.
43 Naeroro tynymenekatyã typoetoryme tarose Ritonõpo a Ejitu poe toremiarykõme, tutũtase toto, kohkohtãko oseahmãko, tãkye rokene.
44 Toto esaryme, imehnõ nonory tokarose kynexine eya xine itupikõme, tỹkyryneke toto ehtohme,
45 Tosẽkõ omihpyry omipona toto ehtohme,
inyripohpyry onurumekara aehtohkõme.
Kure mase, Ritonõpo! kahtoko eya.