109
Tyyryhmase exikety otururu Ritonõpo a
Tawi nymerohpyry.
1 Oeahmãko ase, Ritonõpo; mynyhme rokẽ pyra exiko!
2 Jyhxirõko popyra exiketõ mã toto,
ajohpe exiketõ roropa;
ajohpe oturũko mã toto ykerekeremãko.
3 Popyra jehtoh ekarõko mã toto, ymaro osetapãko mã toto typoko xine pyra jahtao ro.
4 Jyhxirõko mã toto, typyno xine ro jahtao,
tõturuse roropa jahtao Ritonõpo a ipoko xine.
5 Ynyriry kurã epehmãko mã toto popyra ehtoh ke, ipyno xine jehtoh emetakamãko mã toto yse pyra toehtohkõke.
6 Ritonõpo, popyra exikety imenekako
jepekara apiakaneme,
ah epekara ihxironeme nexino roropa.
7 Mame tapiakase ynororo ahtao,
ah ynara nykano apiakane eya: “Popyra mase,
awãnohpõko ase!”
Ah aomiry oya iirypyryme nexino!
8 Ah jepekara norihno nuaseme ro tahtao.
Ah imepỹ imyakãme nexino aerohtoh poko.
9 Ah ipoenõ poetõpome nexĩ toto,
ah ipyty pytỹpome nexino!
10 Ah ipoenõ tytapyĩke pyra nexĩ toto,
tonahsẽ ekaroponeme toto ehtohme imehnomo a.
Ah taroposẽme nexĩ toto patãpo tõ tosarykõ poe!
11 Ah imõkomohpyry emero tupuxihkasẽme nexino inepehmary epehmatohme!
Ah imehnõ imõkomohpyry esẽme nexĩ toto
inapoihpyry toerohtamitume!
12 Ah imehnõ ipyno pyra nexĩ toto,
ah ipoenõpyry onypynanohpyra nexĩ toto
poetõpome aexityamo!
13 Ah ipoenõ norihno toto, ipakomotyã roropa
axĩ wenikehtohme ipoko!
14 Ah Ritonõpo wenikehpyra nexino itamuru tõ
popyra ehtopõpyry poko,
iirypyryme jeny ehtopõpyry poko roropa!
15 Ah Ritonõpo wenikehpyra nexino iirypyrykõ
poko; yrome mokaro ehtoh poko ah wenikehtohme nexĩ toto.
16 Ynara exiryke: kure ehtoh onyripyra nexiase
imehnomo a, tymõkomokãkara tyyryhmase eya,
totapase roropa toto eya, omise exiketõ roropa,
takorehmaneke pyra exiketõ roropa.
17 Popyra ehtoh enehpory se nexiase imehnõ
pona, ah popyra ehtoh noehno eya! Kure ehtoh
enehpory se pyra nexiase imehnõ pona,
ah kurãkõ onenehpopyra nexĩ toto eya!
18 Torẽnase ynororo popyra ehtoh enehpory
poko imehnõ pona upo amururu sã eya.
Ah inyripohpyry nomõno ipũ aka tuna samo
jehpyry aka roropa azeite samo!
19 Ah inyripohpyry enahpỹme nexino zupõme samo, imetỹ earyme sã roropa.
20 Ritonõpo, moro sã jepetõkara epehmako, xihpyryme ykerekeremananõ roropa.
21 Yrome, Ritonõpo Jesemy, kuakorehmako
onetapohpyry ae ro ya, kypynanohko kure oexiryke,
yna pyno oexiryke.
22 Ywy ase tymõkomoke pyra, omise ase roropa;
tapurose ywy ukurohtao.
23 Okynã pyra ase jerutume samo kohmãsasaka ahtao;
tyryrykane a tarose ywy taparara arory samo.
24 Otuhpyra jehtopõpyryke tuhke, jesekumuru tõ
tykytyky ãko nase kehko,
joko ypihpyry rokẽ toehse mana zehpo maro.
25 Jeneryhtao imehnomo a ypoihtõko mã toto,
jeunohnõko roropa mã toto.
26 Kuakorehmako Ritonõpo Jesemy!
Kypynanohko ypyno exikehpyra oexiryke.
27 Jepetõkara a zuaroh kamexipoko:
ypynanohneme oexiry poko!
28 Ypona popyra ehtoh enehpõkõ mã toto,
yrome omoro kure rokẽ jyrĩko mase.
Ah yyryhmananõ typoremãkase nexĩ toto,
mame ywy, opoetory, tãkye ehxi!
29 Ah jepetõkara typoremãkasẽme nexĩ toto,
aehxirotohkõme, upo amururu sã imehnõ emero
neneryme, ah nehxirõ toto.
30 Opore, “Kure mase,” ãko ase Ritonõpo
Kuesẽkomo a; eahmãko ase oximõmãkõ netaryme
31 tymõkomokãkara ewomaryke eya,
toto pynanohnõko roropa mana
etapapory se exiketõ winoino.