108
Oturutoh Ritonõpo a
(Saumu 57.7-11; 60.5-12)
Tawi nymerohpyry.
1 Oenetupuhkehpyra ase, Ritonõpo,
oenetupuhnõko ase; eremiãko ase opoko oeahmaryme. Apakako, ukurohtao!
2 Ykyryry tõ haapa, rira roropa apakatoko!
Xixi ẽpakãko ase ẽmepyryme.
3 Ritonõpo, “Kure mase,” ãko ase ahno tõ rãnao.
Oeahmãko ase imoihmãkõ rãnao.
4 Yna pyno oehtoh kaetokohxo sã mana kapu epoe.
Zae oehtoh anamonohpyra mana, akuru pona samo.
5 Ritonõpo, imehxo oehtoh enepoko kapu ao.
Saereme oehtoh enepoko sero nono poro porehme!
6 Yna ipynanohko ajamitunuru ke; yna otururu oya etako, opoetory tõ typynanohsẽme toto ehtohme, ipyno xine oexiryke.
7 Tytapyĩ tao ynara tykase Ritonõpo:
“Typoremãkase toto ahtao ya Xikẽ patary apiakãko ase,
jakanahmã Sukote roropa apiakãko ase
ypoetory tõ esaryme ehtohme.
8 Kireate ynonoryme mana, Manase roropa;
Eparaĩ ykyryryme mana, jupuhpyry ẽ kapasete samo.
Juta roropa ypoetory esẽme mana,
ynyripohpyry ekaroneme.
9 Yrome Moape exĩko ypaxihãme ekurikatohme;
ysãtajã tõ emãko ase Etõ pona,
esẽme jehtoh enetupuhpotohme.
Pirixteu tõ roropa typoremãkasẽme exĩko mã toto ya,
moro poko eremiãko ase, orẽpyra jehtoh poko.”
10 Ritonõpo, onoky jarõko nae pata jamihmã taka,
towomase ahtao apuru konõto ke?
Onoky jarõko nae Etõ pona?
11 Ekaropoxi, yna turumekase nymyry oya?
Ytopyra ropa mahno yna soutatu tõ maro?
12 Yna akorehmako yna zehnotokõ
poremãkatohme; ahno a takorehmase ahtao
toiparo rokẽ mana.
13 Ritonõpo kymaro xine ahtao
orẽpyra exĩko sytatose;
kyzehnotokõ enahkãko mana.