132
Ritonõpo netapohpyry Tawi a
Ytoytoketõ eremiatoh sero.
1 Ritonõpo, wenikehpyra exiko Tawi poko,
aetuarimatopõpyry poko roropa.
2 Wenikehpyra exiko aomihpyry poko oya, Ritonõpo Jamihmehxo Exikety, Jako Esemy, ynara tykase ahtao:
3 “Ytapyĩ taka ytopyra ase jynyhtoh taka oseremase;
4 ataxikara ase jynyhtohme,
5 Ritonõpo esary onyripyra ro jahtao,
Jamihmehxo Exikety Jako Esẽ tapyĩme.”
6 Perẽ po turuse ynanexiase Ritonõpo õmihpyry ẽ poko, moro tonese yna a ona Jearĩ po.
7 “Ehmaropa Ritonõpo tapyĩ taka, seahmatone apõ ẽpataka,” tykase yna.
8 Osehko Atapyĩ taka, Ritonõpo, õmihpyry ẽ maro, ajamitunuru enetupuhpotopo, moroto ehtohme jũme!
9 Ah oturuketõ zae ehtoh poko rokẽ nexĩ toto; ah opoetory tõ nykohtã toto atãkyemaryme!
10 Ritonõpo, õmiry mekaroase opoetory Tawi a;
onymenekahpyry tuisame onurumekara exiko.
11 Onetapohpyry Tawi a onytyoromara mana: “Opoenõ wino toiro menekãko ase tuisame ehtohme omyakãme.
12 Mame zae omũkuru tõ ahtao, ynetapohpyry
omipona, jomiry omipona roropa toto ahtao, imũkuru tõ roropa, tuisame exikehpyra exĩko mã toto, jũme.”
13 Ypy Xião tymenekase Ritonõpo a;
tosaryme moroto se ynororo nexiase, ynara tykase:
14 “Taro jesaryme exĩko mana jũme;
taro ypoetory tõ Esẽme jexiry se ase.
15 Jerusarẽ põkomo a ise toto ehtoh ekarõko ase pitiko rokẽ pyra; tymõkomokãkara a tonahsã ekarõko ase tãkye toto ehtohme.
16 Kure rokẽ oturuketõ nyriry tõ rĩko ase,
moro pata põkõ eremiãko, kohtãko roropa mã toto tãtãkyemarykõme.
17 Taro toiro Tawi pary rĩko ase tuisa imehxo,
taro roropa ynymenekahpyry poenõ jũme tuisame tyripõko ase.
18 Mokyro zehno exiketõ poremãkapõko ase,
ehxirõko mã toto. Yrome tuisame aehtoh imehxo exĩko, emãnõko roropa mã kehko.”