137
Omuhpe Izyraeu ehtopõpyry poko
1 Typorohse ynanexiase tuna tõ ehpiõ po
Papironia po; xitãkone ynanexiase wenikehpyra
yna ahtao Jerusarẽ poko.
2 Rira tõ tynomose yna a tyhwyme moroto wewe tõ pokona.
3 Mokaro typoetoryme yna aronanõ yna eremiary etary se toh nexiase, tãkyemaporykõ se toh nexiase yna a: “Oeremiatoko eremiatoh tonõ Xião poko,” tykase toto.
4 Yrome imehnõ nonory po yna ahtao
otãto eremiãko yna nae Kuesẽkõ eahmaryme?
5 Pata Jerusarẽ, opoko tuenikehse jahtao,
jũme rira etory rumekary se ase.
6 Opoko tuenikehse jahtao, jũme jeremiary rumekary
se ase jãkyemaneme Jerusarẽ osenetupuhkepyryhtao.
7 Ritonõpo, wenikehpyra exiko etomita tõ
nyrihpyry poko Jerusarẽ poremãkatopõpyry poko! Wenikehpyra exiko aomihpyrykõ poko: “Pata Jerusarẽ ikararahtoko emapotohme nono pona,” tykase toto.
8 Pata Papironia, omoro tykararahsẽme exĩko!
Tãkye exĩko mokaro mana oryhmananomo,
yna poko onyrihpyrykõ emetakame,
9 opoenõkõ pisarara apoiryhtao eya xine,
toto apihpytanohpotohme topu pona!