138
“Kure mase, Ritonõpo,” kary poko
Tawi nymerohpyry.
1 Kure mase, Ritonõpo, oeahmãko ase yronymyryme;
imehnõ ritõ tõ neneryme eremiãko ase
oeahmaryme.
2 Yna pyno oexiryke te, anamonohpyra roropa
oexiryke, jesekumuru po porohnõko ase
oeahmatohme Atapyĩ kurã myhtokoxi.
Ynara menepoase ya, emero motye oesety mana,
õmiry roropa emero motye mana.
3 Kuezukuase okohmaryhtao ya,
ajamitunuru ke jamihme kyriase ropa ukurohtao.
4 Ritonõpo yna Esemy, tuisa tõ emero sero nono po oeahmãko mã toto õmiry etaryhtao tyya xine.
5 Eremiãko mã toto onyrityã poko,
saerehkatoh sã imehxo oehtoh exiryke.
6 Kaehxo awahtao ro sero nono epoe, osanume exiketõ pyno mase, epyrypaketõ roropa otonẽsaromepyra mã toto owinoino.
7 Tomyehmase jahtao popyra ehtoh ke, jewomãko mase. Yzehnotokõ poremãkãko mase; ypynanohnõko mase ajamitunuru ke.
8 Õmihpyry ae ro ya tyrĩko mase emero.
Ritonõpo Jesemy, jũme ypyno oehtoh exikehpyra mana. Oerohtoh onurumekara exiko, erohko ro onyriry otyhkatohme.