143
Ritonõpo enetuputyry poko
Tawi nymerohpyry.
1 Ritonõpo, jomiry etako! Zae oexiryke kuetako; kuezuhko anamonohpyra oexiryke!
2 Opoetoryme jexiryke japiakara exiko,
zae nymyry pyra ynanase emero porehme oneneryme.
3 Yzehno exiketomo a tokahmase ywy japoitoh pona, typoremãkase ywy eya xine ipunaka. Ãpuruhpyry xinukutumã taka tõmase ywy eya xine, pake aorihtyã sã ase.
4 Naeroro apotũkehnõko ase, ehtomãko ase,
enahkety sã ase ukurohtao.
5 Pake ehtopõpyry poko wenikehpyra ase,
onyrityã poko osenetupuhnõko ase;
wenikehpyra ase onyrityã poko emero.
6 Jemary tõ anỹnõko ase oneneryme, Ritonõpo,
jotururume oya;
nono tonorẽ sã tuna zehnãko ase opoko.
7 Axĩ ke kuezuhko, Ritonõpo Jesemy
tapotũkehse jexiryke oeraximary poko.
Ywino otonẽpyra exiko,
jorikyryino imehnõ orihketõ maro.
8 Ẽmepyry ae rokẽ kuruko ropa ypyno oehtoh poko,
oenetuputyryke ya ypynanohneme.
Oturũko ase oya; zae ehtoh riry poko
tuaroh kamexipoko.
9 Ritonõpo, kypynanohko yzehnotokõ wino,
oya ytõko ase jewomatohme.
10 Omoro mase Ritonõpo Jesemy;
kuamorepako õmiry omipona jehtohme.
Kure rokẽ kyriko, kuakorehmapoko Ouzenu a
zae jesemary ae jytotohme, towomaneke jehtohme.
11 Kypynanohko, Ritonõpo, õmihpyry ae ro ya!
Kure oexiryke kuanỹko jetuarimatoh wino.
12 Ypyno oexiryke mokaro yzehno exiketõ etapako;
yyryhmananõ enahkapoko, opoetoryme jexiryke.